ກາ​ຕາ ບໍ່​ຂັບ​ໄລ່​ພົນ­ລະ­ເມືອງ​ຂອງ​ບັນ­ດາປະ­ເທດ ​ທີ່​ໄດ້​ຕັດ​ສາຍ­ສຳ­ພັນ​ທາງ​ການ​ທູດ

54 13 ມິ.ນ. 2017 ຂ່າວຕ່າງປະເທດ
ກາ​ຕາ ບໍ່​ຂັບ​ໄລ່​ພົນ­ລະ­ເມືອງ​ຂອງ​ບັນ­ດາປະ­ເທດ ​ທີ່​ໄດ້​ຕັດ​ສາຍ­ສຳ­ພັນ​ທາງ​ການ​ທູດ

ສຳ­ນັກ​ຂ່າວ­ສານ Qatar ອ້າງ​ຕາມ​ແຈ້ງ​ການ​ຂອງ​ກະ­ຊວງ​ພາຍໃນ​ກາ​ຕາ ທີ່​ມີ​ອອກ​ມາ​ເມື່ອ​ວັນ​ທີ 10 ມິ­ຖຸ­ນາ​ ທີ່​ຜ່ານ​ມາ ວ່າ ພົນລະ​ເມືອງ​ຂອງ​ບັນ­ດາ​ປະ­ເທດທີ່​ໄດ້ຕັດ​ສາຍ­ສຳ­ພັນ​ທາງ​ການ​ທູດ​ກັບກາ​ຕາ​ໄປ​ກ່ອນ​ໜ້າ​ນັ້ນ ຍັງ​ຄົງ​ມີ​ສິດ​ຢູ່​ໃນ​ກາຕາ​ຕໍ່​ໄປ ​ຕາມ​ຂໍ້​ກຳ­ນົດ​ທີ່ໃຊ້ຢູ່​ໃນ​ປັດ­ຈຸ­ບັນ.

ແຈ້ງ​ການ​ຂອງ​ກະ­ຊວງ​ພາຍ​ໃນກາ​ຕາ ຊີ້​ແຈງ​ວ່າ ບໍ່​ມີ​ການ​ປ່ຽນ­ແປງ​ນະ­ໂຍ­ບາຍ​ທີ່​ມີ​ຕໍ່ “ບັນ­ດາ​ປະ­ເທດ​ອ້າຍ​ນ້ອງ ແລະ  ມິດ­ຕະ­ພາບທີ່​ໄດ້ຕັດ­ຂາດ ຫຼື​ ຫຼຸດ​ລະ­ດັບ​ການ​ພົວພັນ​ທາງ​ການ​ທູດ ຫຼັງ​ຈາກ​ເກີດ​ບັ້ນທີ່​ເປັນ​ພິດ​ອັນ­ຕະ­ລາຍ ແລະ ເປັນປໍລະ​ປັກ​ຕ້ານ​ກັບ​ກາ​ຕາ”.

ເມື່ອ​ວັນ​ທີ 5 ມິ­ຖຸ­ນາ ​ທີ່​ຜ່ານ​ມາ ອາ​ຣາ​ບີ ຊາ​ອຸ​ດິດ ສະ­ຫະ­ລັດ ອາ​ຣັບ ເອ​ມີ​ເຣດ (UAE) ແລະ​ ບາ​ເຣນ ລວມໄປ​ເຖິງ ​ເອຢິບ ຕ່າງ​ກໍ​ໄດ້​ປະ­ກາດ​ຕັດສາຍ­ສຳ­ພັນ​ທາງ​ການ​ທູດ​ກັບ​ກາຕາ ໂດຍ​ກ່າວ​ຫາ​ວ່າ ກາ​ຕາ “ໃຫ້­ການຊ່ວຍ­ເຫຼືອ​ກຸ່ມ​ກໍ່​ການຮ້າຍ ແລະ ແຊກ​ແຊງ​ເຂົ້າ​ວຽກ​ງານ​ພາຍ​ໃນຂອງ​ບັນ­ດາ​ປະ­ເທດ​ໃນ​ພາກ​ພື້ນ”.

​ຫຼັງ​ຈາກ​ນັ້ນ ເພື່ອ​ເປັນ​ການ​ສະ­ໜັບ­ສະ­ໜູນ​ຕໍ່​ບັນ­ດາ​ປະ­ເທດ​ດັ່ງ­ກ່າວ ເຢ​ແມນ ລວມ​ເຖິງ​ລັດ­ຖະ­ບານ​ທີ່​ໄດ້​ຮັບ​ການ​ສະ­ໜັບ­ສະ­ໜູນຈາກ​ສາ­ກົນ​ຢູ່​ໃນ​ພາກ​ຕາ­ເວັນ​ອອກຂອງ​ລີ​ບີ ແລະ ມາ​ລ​ດິບ ຕ່າງ​ກໍ​ໄດ້​ທະ­ຍອຍ​ກັນ​ຕັດ​ສາຍ​ພົວ­ພັນ​ທາງ​ການທູດ​ກັບ​ກາ​ຕາ ຕໍ່​ມາ​ໃນ​ວັນ​ທີ 6 ມິ­ຖຸ­ນາ ໂມ​ຣີ​ຕາ​ນີ ຊຶ່ງ​ເປັນ​ສະ​ມາຊິກ​ຂອງ​ສັນນິ­ບາດ​ອາ​ຣັບ (AL) ກໍໄດ້​ປະ­ກາດ​ຕັດ​ການພົວ­ພັນ​ທາງການ​ທູດ​ກັບ​ກາ​ຕາ.

ວິ​ກິດ​ການ​ດັ່ງ­ກ່າວ​ສືບ­ຕໍ່​ເພີ່ມຂຶ້ນ​ໃນ​ວັນ​ທີ 9 ມິ­ຖຸ­ນາ ຫຼັງ​ຈາກ​ທີ່​ ອາຣາ​ບີ ຊາ​ອຸ​ດິດ UAE ເອ​ຢິບ ແລະ ບາເຣນ ຈັດ​ໃຫ້  59 ບຸກ­ຄົນ ແລະ 12 ອົງການ­ຈັດ­ຕັ້ງ​ທີ່​ພົວ­ພັນ​ກັບ​ກາ​ຕາ ເຂົ້າ​ຢູ່​ໃນ​ບັນ­ຊີ​ກໍ່​ການ​ຮ້າຍ 3 ປະ­ເທດ ໃນ​ເຂດ​ອ່າວ ໄດ້​ໃຫ້​ເວ­ລາ 2 ອາ­ທິດແກ່​ປະ­ຊາ­ຊົນ ແລະ ນັກ​ທ່ອງ​ທ່ຽວຂອງ​ກາ​ຕາ ​ໃນ​ການ​ຕ້ອງ​ອອກ​ໄປ ໃນ​ຂະ­ນະ​ດຽວ​ກັນ UAE ໄດ້​ຫ້າມ​ປະຊາ​ຊົນກາ​ຕາ ​ຕໍ່​ຖ້ຽວ​ບິນ ຫຼື​ ຜ່ານ UAE.

ຫຼ້າ​ສຸດ ແຫຼ່ງ​ຂ່າວ Sputnik ອ້າງຕາມ​ຂ່າວ­ສານ Tasnim ຂອງ​ອີ​ຣານ ລາຍ​ງານ​ອ້າງ​ຕາມ​ຖະ­ແຫຼງ­ການຂອງ​ອົງ­ການພົວ­ພັນ​ກັບ​ມະ­ຫາຊົນ ​ທີ່​ຂຶ້ນ​ກັບ​ກອງ​ກຳ­ລັງ​ທະ­ຫານເຮືອ​ອີ​ຣານ ໃຫ້​ຮູ້​ວ່າ ກອງ​ເຮືອ​ສູ້​ຮົບຂະ­ໜາດ​ນ້ອຍ​ຂອງ​ອີ​ຣານ ໄດ້ເລີ່ມມຸ່ງ​ໜ້າ​ໄປ​ຍັງ​ອ່າວ​ໂອ​ມານ ໃນ​ວັນທີ 11 ມິ­ຖຸ­ນາ​ນີ້ ແລະ ຫຼັງ​ຈາກ​ນັ້ນ ຈະ​ມຸ່ງ​ໄປ​ທາງ​ທິດ­ເໜືອ​ມະ­ຫາ​ສະ­ໝຸດ​ອິນ​ເດຍ ແລະ ອ່າວ​ອາ​ເດນ.

ການ­ເຄື່ອນ­ໄຫວ​ນີ້​ມີ​ຂຶ້ນ​ທ່າມ­ກາງ​ເກີດ​ວິ​ກິດ​ການ​ທາງ​ການ​ທູດ​ຢູ່​ເທິງ​ແຫຼມ​ອາ​ຣັບ.

ຂ່າວທີ່ກ່ຽວຂ້ອງ