ກອງ​ກຳ­ລັງ​ປະ­ຕິ­ບັດ​ງານ​ພິ­ເສດ​ ສ. ອາ​ເມ​ຣິ​ກາ ຊ່ວຍ­ເຫຼືອ​ກອງ​ກຳ­ລັງ​ຂອງ​ຟີ​ລິບ​ປິນ

62 13 ມິ.ນ. 2017 ຂ່າວຕ່າງປະເທດ
ກອງ​ກຳ­ລັງ​ປະ­ຕິ­ບັດ​ງານ​ພິ­ເສດ​ ສ. ອາ​ເມ​ຣິ​ກາ ຊ່ວຍ­ເຫຼືອ​ກອງ​ກຳ­ລັງ​ຂອງ​ຟີ​ລິບ​ປິນ

ສະ­ຖານ­ທູດ ສ.ອາ​ເມ​ຣິກາ​ ປະ­ຈຳ​ຟີ​ລິບ​ປິນ ຢັ້ງ­ຢືນ​ເມື່ອວັນ​ທີ 10 ມິ­ຖຸ­ນາ​ນີ້​ວ່າ ກອງ​ກຳ­ລັງປະ­ຕິ­ບັດ​ງານ​ພິ­ເສດຂອງ ສ.ອາເມ​ຣິ​ກາ ພວມ​ໃຫ້­ການ​ໜູນຊ່ວຍ​ກອງ­ທັບ​ຟີ​ລິບ​ປິນ ໃນ​ການໂຈມ​ຕີ​ຢູ່​ໃນ​ນະ­ຄອນມາ​ຣາ​ວີ (ພາກ​ໃຕ້​ຟີ​ລິບ​ປິນ) ເພື່ອປົດປ່ອຍ​ນະ­ຄອນ​ນີ້​ອອກ​ຈາກ​ກຳ­ມືຂອງ​ກອງ​ກຳ­ລັງ​ຊາວ​ມຸ​ສລິມ ຫົວ​ຮຸນ​ແຮງ ຊຶ່ງ​ພົວ­ພັນ​ເຖິງ​ອົງການລັດ​ອິ​ສລາມ (IS).

ເຖິງ​ຢ່າງ­ໃດ​ກໍ​ຕາມ ໂຄ­ສົກກອງ­ທັບ​ຟີ​ລິບ​ປິນ ເວົ້າ​ວ່າ ກອງກຳ­ລັງ​ປະ­ຕິ­ບັດ​ງານ​ພິ­ເສດ​ຂອງ ສ.ອາ​ເມ​ຣິ​ກາ ໃຫ້­ການ​ໜູນຊ່ວຍພຽງ​ໃນ​ດ້ານ​ເຕັກ­ນິກ​ເທົ່າ​ນັ້ນ ຫາກ​ບໍ່​ແມ່ນ​ການ​ສູ້​ຮົບ​ໂດຍ​ກົງ ເພື່ອ​ຕ້ານ​ກັບ​ມື​ປືນ​ທີ່​ຈົງ​ຮັກພັກ­ດີ​ກັບ IS ທີ່​ຄວບ​ຄຸມສ່ວນໜຶ່ງ​ໃນ​ນະຄອນມາ​ຣາ​ວີນັ້ນ.

ສ.ອາ​ເມ​ຣິ​ກາ ໄດ້​ຜັນ​ຂະຫຍາຍ​ການ​ປະ­ຕິ­ບັດ​ງານ​ຂອງກອງ​ກຳ­ລັງ​ປະ­ຕິ­ບັດ​ງານ​ພິ­ເສດຢູ່​ເກາະ​ມິນ​ດາ​ນາວຂອງ​ຟີ​ລິບປິນ ເມື່ອ​ປີ 2002 ເພື່ອ​ຝຶກ​ຊ້ອມ ແລະ ​ເປັນ​ທີ່​ປຶກ­ສາ​ໃຫ້​ແກ່​ບັນ­ດາ​ກົມ​ກອງ​ຂອງ​ຟີ​ລິບ​ປິນ ໃນ​ການ​ຕໍ່­ສູ້​ຕ້ານ​ກັບ​ນັກ­ຮົບຂອງ​ກຸ່ມ​ມຸ​ສລິມ​ຫົວ​ຮຸນ​ແຮງ ອາ​ບູ ເຊ​ຢາບ ໂຄງ­ການ​ນີ້​ໄດ້​ຢຸດ­ຕິ​ລົງ​ມາ​ຕັ້ງແຕ່​ປີ 2005 ແຕ່​ວ່າ​ຍັງ​ຈົ່ງ​ໄວ້​ກົມກອງ​ໜຶ່ງ​ເພື່ອໃຫ້​ຄວາມ​ຊ່ວຍເຫຼືອ​ຟີ​ລິບ​ປິນ ໃນ​ດ້ານ​ພາ­ລາທິ​ການ ແລະ​ເຕັກ­ນິກ.

ໃນ​ຂະ­ນະ​ດຽວ​ກັນ ແຫຼ່ງ​ຂ່າວການ​ທະ­ຫານ​ຂອງ​ຟີ​ລິບ​ປິນ ແຈ້ງ​ໃຫ້​ຮູ້­ເມື່ອ​ວັນ​ທີ 10 ມິ­ຖຸ­ນານີ້​ວ່າ ມີ​ທະ­ຫານ​ຟີ​ລິບ​ປິນ​ເສຍຊີ­ວິດຕື່ມ​ອີກ 13 ຄົນ ຈາກ​ການ​ສູ້​ຮົບ​ກັບ​ກຸ່ມ​ມື​ປືນ​ຢູ່​ໃນ​ນະ­ຄອນມາ​ຣາ​ວີ ດັ່ງ­ນັ້ນ ນັບ​ແຕ່​ວັນ​ທີ 23 ພຶດ­ສະ­ພາ​ເປັນ­ຕົ້ນ​ມາ ເມື່ອກຸ່ມ​ມື​ປືນ​ບຸກ​ເຂົ້າ​ໄປ​ນະ­ຄອນມາ​ຣາ​ວີໄດ້​ ມີ​ພົນ­ທະ­ຫານ​ຂອງຟີ​ລິບ​ປິນເສຍ​ຊີ­ວິດ​ລວມ​ແລ້ວ 58 ຄົນ ໃນ​ຂະ­ນະ​ດຽວກັນ ລັດ​ຖະບານ​ຟີ​ລິບ​ປິນ ໃຫ້​ຮູ້​ວ່າ ຝ່າຍ​ມືປືນ​ຖືກ​ສັງ­ຫານ 138 ຄົນ ນອກຈາກ​ນັ້ນ­ແລ້ວ ຍັງ​ມີ​ສາ­ມັນ​ຊົນ​ໃນທ້ອງ­ຖິ່ນ​ເສຍຊີ­ວິດ 20 ຄົນ ຈາກການ​ຍິງ​ຕໍ່­ສູ້​ກັນ.

ຫຼ້າ​ສຸດຂ່າວ­ສານ Kyodo ລາຍງານ​ວ່າ ປະ­ທາ­ນາ­ທິ­ບໍ­ດີ​ຟີ​ລິບ​ປິນ ໂຣດ​ຣີໂກ ດູ​ເຕີ​ເຕ ຖະ­ແຫຼງເມື່ອ​ວັນ​ທີ 11 ມິ­ຖຸ­ນາ​ນີ້​ວ່າ  ທ່ານ​ບໍ່ໄດ້​ຮູ້​ເລື່ອງ​ທີ່​ລັດ­ຖະ­ບານ ສ.ອາເມ​ຣິ​ກາ​ ພວມ​ໃຫ້­ການ​ຊ່ວຍ­ເຫຼືອກອງ​ກຳລັງ​ຝ່າຍ​ລັດ­ຖະ­ບານ​ຟີລິບ​ປິນ ໃນ​ການຕໍ່­ຕ້ານ​ກັບ​ພວກ​ມື​ປືນ​ຢູ່​ໃນ​ນະ­ຄອນມາ​ຣາ​ວີ.

ຂ່າວທີ່ກ່ຽວຂ້ອງ