ອັງ­ກິດ U-20 ຊະ­ນະ ​ເວ​ເນ​ຊູ​ເອ​ລ່າ 1-0 ໄດ້​ແຊັມ​ໂລກ​ຢ່າງ​ຍິ່ງ​ໃຫຍ່

177 14 ມິ.ນ. 2017 ວົງຈອນກີລາ
ອັງ­ກິດ U-20 ຊະ­ນະ ​ເວ​ເນ​ຊູ​ເອ​ລ່າ 1-0 ໄດ້​ແຊັມ​ໂລກ​ຢ່າງ​ຍິ່ງ​ໃຫຍ່

ນັກ​ເຕະ​ທີມ​ຊາດ​ອັງ­ກິດ​ຊຸດ​ອາ­ຍຸ​ຕ່ຳ​ກວ່າ 20 ປີ (U-20) ສ້າງຜົນ­ງານ​ໄດ້​ໂດດ​ເດັ່ນ​ເກີນ​ຄາດ ສາ­ມາດ​ຄອງ​ຂັນ​ຊະ­ນະເລີດ​ໂລກ​ໄດ້​ຢ່າງ​ຍິ່ງ​ໃຫຍ່ ຫຼັງ​ບຸກ​ເອົາ​ຊະ­ນະ ເວ​ເນ​ຊູ​ເອ​ລ່າ ຫວຸດ​ຫວິດ 1-0 ຈາກ​ຜົນ­ງານ​ຂອງ ໂດ​ມິ​ນິກຄັນ ເວິດ-ເລ​ວິນ ກອງ​ໜ້າ​ດາວ​ຮຸ່ງຈາກ ເອ​ຟ​ເວີ​ຕັນ ຂະ­ນະ​ທີ່ ເຟຣດດີ ວູດ​ແມນ ຜູ້​ຮັກ­ສາ​ປະ­ຕູ ນິວ ຄາ​ສ​ເຊິ່ນ ຖື​ເປັນ​ອີກ​ໜຶ່ງ​ວິ­ລະ​ບູລຸດ ເມື່ອ​ປ້ອງ​ກັນ​ຈຸດ​ໂທດ​ຊ່ວຍ​ທີມ​ໃນ​ເຄິ່ງ​ຫຼັງ ນັດ​ຊີງ​ຊະ­ນະ​ເລີດ​ທີ່ ຊູ​ວອນ ເວິ​ລດ໌ຄັບ ສະ​ເຕ​ດຽມ ປະ­ເທດ ສ ເກົາ­ຫຼີ ເມື່ອວັນ​ອາ­ທິດ​ທີ່​ຜ່ານ​ມາ.

ຜູ້​ຈັດ­ການ​ທີມ ພອນ ຊິມ​ສັນ ເຮັດ​ໃຫ້​ກອງ​ເຊຍ​ບານ​ອັງ­ກິດ ​ໄດ້ພູມ­ໃຈ​ເມື່ອ​ໄດ້​ເປັນ​ແຊັມ​ໂລກ​ຄັ້ງ​ທຳ​ອິດ​ນັບ​ຕັ້ງ­ແຕ່​ປີ 1966 ທີ່​ທີມ​ຊຸດ​ໃຫຍ່​ຊະ­ນະເຢຍ​ລະ​ມັນ​ຕາ­ເວັນ­ຕົກ ຫຼັງ​ໄລ­ຍະ​ຕໍ່​ເວ­ລາ 4-2 ໂດຍ​ພວກ​ເຂົາ​ໄດ້​ປະ­ຕູ​ໄຊ​ໃນ​ນາທີທີ່ 34 ຈາກ ຄັນ​ເວິດ-ເລ​ວິນ ທີ່​ບຽດ​ຊີງ​ບານ​ກັບ​ກອງ​ຫຼັງ ເວເນ​ຊູ​ເອ​ລ່າ ກ່ອນ​ທີ່​ຈະ​ລາກ​ເຂົ້າໄປ​ຍິງ​ເນັ້ນໆ ເຖິງ​ແມ່ນ​ຈະ​ຖືກການປ້ອງ​ກັນຂອງ ວຸຍ​ເກີ ຟາ ຣິ​ເນ​ສ ແຕ່​ວ່າ​ດາວ​ຮຸ່ງ​ຈາກ​ເອ​ຟ ເວີ​ຕັນ ກໍ​ແລ່ນ​ເຂົ້າ​ໄປ​ຍິງ​ຊ້ຳ​ບໍ່ເຫຼືອ.

ເຄິ່ງ​ຫຼັງມີ​ໂອ­ກາດ​ສຳ­ຄັນ​ໃນ​ນາ­ທີ​ທີ່ 73 ເມື່ອ ເວ​ເນ​ຊູ​ເອ​ລ່າ ໄດ້​ຈຸດ​ໂທດ​ຈາກ​ຈັງ­ຫວະ​ທີ່ ອະ​ດັນ​ເບ​ໂຕ ເປນ​ຍາ​ຣານ​ດາ ຖືກ ເຈກ ຄລາກ-ຊອນ​ເຕີ ກອງ​ຫຼັງ​ອັງ­ກິດ ເຮັດ​ຜິດ​ກະ­ຕິ​ກາ ກ່ອນ​ທີ່​ຜູ້­ກ່ຽວຈະ​ລຸກ­ຂຶ້ນ​ມາ​ສັງ­ຫານ​ເອງ ແຕ່ວ່າ ວູດ​ແມນ ມືກາວ​ອັງ­ກິດ ໃຊ້ຂາ​ປ້ອງ​ກັນ​ໄວ້​ໄດ້​ສຸດ​ຍອດ.

ສຳ­ລັບ​ຜົນ­ງານ​ຂອງ​ທີມ​ຊາດອັງກິດ​ຊຸດ U-20 ໃນ​ລາຍ­ການ​ນີ້ ຖື​ວ່າ​ໂດດ​ເດັ່ນ​ຫຼາຍ ເມື່ອ​ຊະ­ນະເຖິງ 6 ຈາກ 7 ເກມ ເທິງເສັ້ນທາງ​ສູ່​ແຊັມ​ໂລກ​ທີ່​ສະ­ໜາມ ຊູວອນ ເວິ​ລດ໌ຄັບ ສະ​ເຕ​ດຽມ ທີ່ ສ ເກົາ­ຫຼີ ໂດຍ​ຄວ້າ​ອັນ​ດັບ 1 ກຸ່ມ A ທີ່​ມີ ອາກ​ຊັງ​ຕິນ ກິ​ນີ ແລະ ສ ເກົາ­ຫຼີ ກ່ອນ​ຊະ­ນະ ຄອສ​ຕາ​ຣິ​ກາ ເມັກ​ຊິກ ແລະ ອິ​ຕາ​ລີ ໃນ​ຮອບ​ຕັດ​ເຊືອກ ກະ­ທັ່ງມາ​ຊະ­ນະ ເວ​ເນ​ຊູ​ເອ​ລ່າ ໃນ​ນັດຊີງ​ຊະ­ນະ​ເລີດ​ໄດ້​ສຳ­ເລັດ.

ຂ່າວທີ່ກ່ຽວຂ້ອງ