ຍົກ​ລະ­ດັບ​ກຳ­ມະ­ການ​ຕັດ­ສິນ ກຽມ​ມວຍ​ປູນ​ເສືອ ລາວ-ໄທ

211 14 ມິ.ນ. 2017 ວົງຈອນກີລາ
ຍົກ​ລະ­ດັບ​ກຳ­ມະ­ການ​ຕັດ­ສິນ ກຽມ​ມວຍ​ປູນ​ເສືອ ລາວ-ໄທ

ພິ­ທີ​ເປີດ​ເຝິກ­ອົບ­ຮົມກຳ­ມະ­ການ​ຕັດ­ສິນ​ກີ­ລາ​ມວຍ​ລາວ ຂັ້ນນະ­ຄອນ­ຫຼວງ​ວຽງ​ຈັນ ຈັດ​ຂຶ້ນວັນ​ທີ 10 ມິ­ຖຸ­ນາ 2017 ທີ່​ພະແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ ໂດຍ​ມີ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກສຶກ​ສາ​ທິ​ການ ແລະ ກີ­ລາ ນະຄອນ​ຫຼວງ ທ່ານ ຄຳ​ເສັງ ສູນ​ດາລາ ປະ­ທານ​ບໍ­ລິ­ສັດ ຄຳ​ເສັງ ຈຳ­ກັດ ທັງ​ເປັນ​ປະ­ທານ​ສະ­ຫະພັນ​ກີ­ລາ​ມວຍ​ລາວ ມີ​ຜູ້ຕາງໜ້າ​ຫ້ອງ­ການ​ສຶກ​ສາ​ທິ​ການ  ແລະ ກີ­ລາ 9 ຕົວ​ເມືອງ ກຳ​ມະການ​ຕັດ­ສິນ ຄູ​ເຝິກ ຄ້າຍ​ມວຍ ແລະ ສະ­ໂມ­ສອນ​ມວຍລາວ ອ້ອມ​ຂ້າງ ນວ ເຂົ້າ​ຮ່ວມ.

ທ່ານ ຄຳ​ເສັງ ສູນ​ດາ­ລາ ກ່າວ​ວ່າ: ການ​ຈັດ​ເຝິກ­ອົບ­ຮົມເພື່ອ​ຍົກ​ລະ­ດັບ​ຄວາມ​ຮູ້​ຄວາມ​ສາມາດຂອງ​ກຳ­ມະ­ການ​ຕັດ­ສິນມວຍລາວ​ນີ້ ກໍ່​ເພື່ອ​ເປັນ​ການ​ກະກຽມ​ຄວາມ​ພ້ອມໃນ​ການ​ແຂ່ງຂັນ​ສຸດ​ຍອດ​ມວຍ​ລາວ ແລະ ມວຍ​ໄທ​ ປູນ​ເສືອ ເພື່ອສະ­ເຫຼີມສະ­ຫຼອງ​ວັນ​ສ້າງ­ຕັ້ງ​ກີ­ລາ-ກາ​ຍະ​ກຳ​ແຫ່ງ​ຊາດ ຄົບ­ຮອບ 51 ປີ ເຊິ່ງ​ຈະ​ຈັດ​ຂຶ້ນ​ໃນ​ວັນ​ທີ 17 ມິ­ຖຸ­ນາ ທີ່​ສູນ​ການ​ຄ້າ​ລາວ-ໄອ​ເຕັກ ຕຶກ​ໃໝ່ຊັ້ນ 7 ດັ່ງ­ນັ້ນ ຈຶ່ງ​ຮຽກ­ຮ້ອງ​ມາ​ຍັງ​ກຳ­ມະ­ການຕັດ­ສິນ ທີ່​ໄດ້​ຖືກ​ແຕ່ງ­ຕັ້ງ​ໜ້າ­ທີ່ຮັບ­ຜິດ­ຊອບເປັນ​ຄະ­ນະ​ກຳ​ມະການ​ໄປ​ແລ້ວ​ນັ້ນ ໃຫ້​ເອົາ­ໃຈ­ໃສ່ຕື່ມ​ຊ່ວຍ​ກັນ ເນື່ອງ​ຈາກ​ເປັນວຽກ​ທີ່​ສຳ­ຄັນ​ຂອງ​ພວກ​ເຮົາ ທີ່ຈະ​ຕ້ອງ​ພ້ອມ​ກັນເຮັດ​ໃຫ້​ສຳ­ເລັດໜ້າ­ທີ່ ເຊິ່ງ​ເປັນ​ກຽດ​ສັກ​ສີ​ຂອງນະ­ຄອນ­ຫຼວງ​ວຽງ​ຈັນ.

ໂອ­ກາດ​ນີ້ ທ່ານ ຊົມ​ພູ ແກ້ວ​ປັນ­ຍາ ກ່າວ​ວ່າ: ການ​ເຝິກ­ອົບ­ຮົມ​ຄັ້ງ​ນີ້ ເຖິງ​ແມ່ນ​ວ່າ​ຈະເປັນ​ໄລ­ຍະ​ສັ້ນ ແຕ່​ກໍ່​ມີ​ຄວາມໝາຍ ເພື່ອ​ເຮັດ​ໃຫ້​ບັນ­ດາ​ໜ້າວຽກ​ຂອງ​ສະ­ຫະ­ພັນ ບັນ­ດາ​ຄ້າຍມວຍ​ທົ່ວ ນວ ກໍ່​ຄື​ສະ­ໂມ­ສອນມວຍ ໃຫ້​ມີ​ປະ​ສິດ­ທິ​ຜົນ​ຂຶ້ນ ສະນັ້ນ ຮຽກ­ຮ້ອງ​ມາ​ຍັງ​ຄະ­ນະ​ສະຫະ​ພັນກີ­ລາ​ມວຍ ນວ ເອົາ­ໃຈໃສ່​ໜ້າ­ທີ່​ວຽກ​ງານ​ຂອງ​ຕົນ​ດ້ວຍຄວາມ​ຮັບ­ຜິດ­ຊອບ​ສູງ ຍາດ​ແຍ່ງເອົາ​ການ​ຊ່ວຍ­ເຫຼືອ​ເພື່ອ​ຊຸກ­ຍູ້​ບັນ­ດາ​ຄ້າຍ​ມວຍ ສ້າງ​ໃຫ້​ນັກ­ກີ­ລາ​ມວຍ​ລາວ ນວ ມີ​ຄວາມ​ເຕີບ​ໃຫຍ່ ເຂັ້ມ­ແຂງ​ຮອງ​ຮັບ​ການ​ແຂ່ງ­ຂັນ​ຕ່າງໆ ໂດຍ​ສະ­ເພາະ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ​ ຄັ້ງ​ທີ 11 ທີ່​ແຂວງ​ຊຽງ​ຂວາງ ​ເປັນ​ເຈົ້າ­ພາບ​ທ້າຍ​ປີ 2018.

ຂ່າວທີ່ກ່ຽວຂ້ອງ