ເລັ່ງປະຕິບັດຄາດໝາຍສູ້ຊົນ ເພື່ອນຳໃຊ້ ຊສ ທີ່ມີຄຸນະພາບ

260 15 ມິ.ນ. 2017 ຂ່າວໜ້າ​ໜຶ່ງ

ພະ​ແນກ​ຊັບພະຍາກອນ​ທຳມະ​ຊາດ ແລະ ສິ່ງແວດລ້ອມ ນະຄອນ​ຫຼວງ​ວຽງ​ຈັນ (​ພຊສ ນວ) ສາມາດ​ຂຶ້ນ​ທະບຽນ​ອອກ​ໃບ​ຕາດິນໄດ້​ທັງ​ໝົດ 209.492 ຕອນ ໄດ້​ແບ່ງ​ແຍກ ແລະ ລວມ​ຕອນດິນ ຈຳນວນ 94.917 ຕອນ ແລະ ໄດ້​ຂຶ້ນ​ສະຖິຕິ​ສຳມະໂນ​ທີ່ດິນ ຈຳນວນ 262.751 ຕອນ ພ້ອມ​ນັ້ນ ​ພຊສ ນວ ຍັງ​ສາມາດເຮັດ​ສຳເລັດ​ຕາມ​ແຜນ​ແມ່​ບົດ ວຽກ​ງານ​ສຳ​ຫຼວດ​ທີ່​ດິນ 8 ປະເພດ​ຂອງ​ກະຊວງ​ຊັບພະຍາກອນທຳ​ມະ​ຊາດ ແລະ ສິ່ງແວດລ້ອມວາງ​ອອກ ທັງ 9 ຕົວ​ເມືອງ ໄດ້ທັງ​ໝົດ 396.060 ເຮັກຕາ.

ແນໃສ່​ຜັນ​ຂະຫຍາຍ​ວິໄສ​ທັດ ຍຸດ​ທະ​ສາດ​ການ​ພັດທະນາ​ວຽກງານ​ຮອບດ້ານ​ຂອງ ​ພຊສ ນວ ໄລຍະ 5 ປີ (2016-2020) ໃຫ້ປາກົດ​ຜົນ​ເປັນ​ຈິງ ໂດຍ​ສະເພາະແມ່ນ​ຄາດໝາຍ​ສູ້​ຊົນ​ໃນ​ກອງປະຊຸມ​ໃຫຍ່ ຄັ້ງ​ທີ VI ອົງຄະ​ນະພັກ ນະຄອນຫຼວງ​ວຽງ​ຈັນ ວາງອອກ ​ພຊສ ນວ ມີ​ຄາດໝາຍສູ້​ຊົນ​ຈັດ​ຕັ້ງ​ປະຕິບັດ 9 ວຽກ​ສຳຄັນຄື: 1. ແກ້​ໄຂ​ບັນດາ​ຈຸດ​ອ່ອນ ແລະ ຂໍ້ຄົງຄ້າງ​ໃນ​ຮ່າງ​ຢັດ​ຕິ ​ບັນດາ​ນິຕິ​ກຳ​ໃຫ້​ມີ​ຄວາມ​ສອດຄ່ອງຍິ່ງ​ຂຶ້ນ 2. ປະຕິບັດ​ໂຄງການ​ຈັດສັນ​ປະເພດ​ທີ່​ດິນ 8 ປະເພດ ຕາມສະພາ​ຕົກລົງໃຫ້​ລົງ​ຮອດ​ທ້ອງຖິ່ນ​ຂັ້ນ​ເມືອງ ຂັ້ນ​ບ້ານ ໃຫ້​ສຳເລັດ​ໂດຍ​ພື້ນຖານ 3. ແກ້​ໄຂ​ຂໍ້ຂັດ​ແຍ່ງ​ທີ່​ດິນ​ທີ່​ເກີດ​ຂຶ້ນ​ໃນ​ປັດ​ຈຸບັນ ເປັນຕົ້ນແມ່ນ​ຂໍ້​ຂັດ​ແຍ່ງການ​ອອກ​ໃບ​ຕາດິນ​ຜິດພາດ ການ​ຊົດ​ເຊີຍ​ທີ່​ດິນ​ບໍ່​ຄົບ​ຖ້ວນ​ໃຫ້ສຳເລັດ ໂດຍ​ໃຫ້​ຂຶ້ນ​ທະບຽນ​ແກ້ໄຂ​ເປັນ​ແຕ່​ໄລຍະ (6 ເດືອນ) 4. ຈັດ​ສັນ​ວາງ​ແຜນ​ນຳ​ໃຊ້ ແລະ ຄຸ້ມ​ຄອງ​ຮັກສາ​ເຂດ​ສະຫງວນ ປ່າ​ສະຫງວນ​ພູ​ພະນັງ ພູເຂົາຄວາຍ ສາຍ​ນ້ຳ​ງື່ມ ນ້ຳຂອງ ໜອງ ແລະ ບຶງ​ໃຫຍ່ ລະດັບ 10 ເຮັກຕາ​ຂຶ້ນ​ໄປ 5. ດິນ​ແຄມ​ຂອງ ແຄມ​ງື່ມ ຮັກສາ​ຕາມ​ມາດຕາ 3 ຂອງ​ຂໍ້​ຕົກລົງ​ນາຍົກ ສະບັບ​ເລກທີ 52/​ນຍ ວ່າ​ດ້ວຍ​ການ​ຮັກສາແຄມ​ງື່ມ ແຄມ​ຂອງ 30 ແມັດ ບໍ່​ໃຫ້​ມີ​ການ​ບຸກລຸກ ຫຼື ປຸກ​ສ້າງໃດໆ 6. ເຂດ​ບຶງ​ທາດຫຼວງ ຄອງນ້ຳ​ວຽງ​ຈັນ ໃຫ້​ປະຕິບັດ​ຕາມ​ມະຕິ​ຂອງ​ສະພາ​ແຫ່ງ​ຊາດ ວ່າ​ດ້ວຍຄອງ​ບຶງ​ທາດຫຼວງ ທີ່​ມີ​ເປົ້າ​ໝາຍຮັກສາ ແລະ ນຳ​ໃຊ້​ສະຖານທີ່ດັ່ງກ່າວ​ໃຫ້​ມີ​ຄວາມ​ຍືນ​ຍົງ ແລະ ສົມ​ເຫດ​ສົມ​ຜົນ 7. ເອົາໃຈໃສ່​ຈັດຕັ້ງ​ປະຕິບັດ​ໂຄງການ​ວຽງ​ຈັນ​ສະອາດ ແລະ ສີຂຽວ 8. ເປັນ​ເຈົ້າການ​ປະຕິບັດ​ວຽກ​ງານ​ຂຶ້ນ​ທະບຽນ​ທີ່​ດິນ ແລະ ນຳ​ໃຊ້​ອຸປະກອນຄຸ້ມ​ຄອງ​ທີ່​ດິນແບບ​ທັນ​ສະໄໝເທື່ອ​ລະ​ກ້າວ ແລະ 9. ພະ​ແນກຊັບພະຍາກອນ​ທຳ​ມະ​ຊາດ ແລະ ສິ່ງແວດລ້ອມ ນະຄອນຫຼວງ​ວຽງຈັນ ຕ້ອງ​ເປັນ​ເຈົ້າ​ການ​ຢ່າງ​ຕັ້ງໜ້າ ​ເຂົ້າ​ໃນ​ການ​ປະສານ​ສົມທົບກັບ​ພະແນກການ​ຕ່າງໆ​ຂອງ​ນະຄອນ​ຫຼວງ​ວຽງ​ຈັນ ເພື່ອ​ສູ້​ຊົນ​ໃຫ້ກາຍເປັນ​ພະແນກການ 5 ດີ ຕາມ​ທິດ​ນະຄອນຫຼວງ​ວຽງ​ຈັນວາງ​ອອກ​ ຢ່າງ​ເປັນ​ຂະ​ບວນ​ຟົດຟື້ນ.

ຂ່າວທີ່ກ່ຽວຂ້ອງ