ຈາກການສືບທອດໄດ້ເຂົ້າກຸ່ມ ແລະ ຮັບກາໝາຍສິນຄ້າໂອດ໋ອບ

191 16 ມິ.ນ. 2017 ຂ່າວໜ້າ​ໜຶ່ງ
ຈາກການສືບທອດໄດ້ເຂົ້າກຸ່ມ ແລະ ຮັບກາໝາຍສິນຄ້າໂອດ໋ອບ

ຊີ້ນແຫ້ງສະຫວັນ ຊີ້ນແຫ້ງອົບສະໝຸນໄພສະຫວັນ ໝ້ຳແຫ້ງສະຫວັນ ແລະ ໝ້ຳຮ້ານປ້າໝອນ ບ້ານນາເລົ່າ ເມືອງໄກສອນ ພົມວິຫານ ແຂວງສະຫວັນນະເຂດ ເປັນປະເພດອາຫານມີຄວາມປອດໄພຕໍ່ຜູ້ບໍລິໂພກ ທີ່ພະແນກອຸດສະຫະກໍາ ແລະ ການຄ້າແຂວງ ໄດ້ໃຫ້ການສົ່ງເສີມສ້າງຕັ້ງເປັນກຸ່ມສິນຄ້າໜຶ່ງເມືອງໜຶ່ງຜະລິດຕະພັນ (ໂອດ໋ອບ) ເຊິ່ງໄດ້ຮັບກາໝາຍສິນຄ້າໂອດ໋ອບ ໃນເດືອນທັນວາ 2016 ແລະ ໄດ້ຮັບການຢັ້ງຢືນອາຫານປອດໄພຈາກພະແນກສາທາລະນະສຸກ ແຂວງສະຫວັນນະເຂດ ເດືອນພຶດສະພາ ປີ 2017.

ນາງ ກິ່ງດາວ ສໍພູທະວົງ ລູກສາວປ້າໝອນ ເຈົ້າຂອງຮ້ານປ້າໝອນຂາຍໝໍ້າໃຫ້ສໍາພາດວ່າ: ແມ່ຕົນໄດ້ເລີ່ມເຮັດໝໍ້າຂາຍມາແຕ່ປີ 1979 ເປັນຕົ້ນມາ ປັດຈຸບັນ ໄດ້ຢຸດເຊົາແລ້ວໃຫ້ລູກເປັນຜູ້ສືບທອດໄດ້ເລີ່ມມາແຕ່ປີ 2009 ເປັນຕົ້ນມາ ເຊິ່ງໃນເບື້ອງຕົ້ນໃຊ້ທຶນໝູນວຽນຊື້ວັດຖຸດິບສໍາລັບເຮັດໝໍ້າຊີ້ນແຫ້ງ ແລະ ອື່ນໆ ມື້ 2 ລ້ານກວ່າກີບ ເຫັນວ່າໄດ້ຜົນຕອບຮັບຈາກລູກຄ້າທີ່ຊື້ໄປບໍລິໂພກ ແລະ ເປັນຂອງຕ້ອນຂອງຝາກ ຈາກນັ້ນ ພະແນກອຸດສະຫະກໍາ ແລະ ການຄ້າ ແຂວງສະຫວັນນະເຂດ ໄດ້ລະດົມສ້າງຕັ້ງໃຫ້ເປັນກຸ່ມໜຶ່ງເມືອງໜຶ່ງຜະລິດຕະພັນຂອງແຂວງ ເພື່ອເປັນການຊຸກຍູ້ສົ່ງເສີມອາຫານທີ່ເປັນເອກະລັກຂອງແຂວງສະຫວັນນະເຂດ ໃຫ້ເປັນທີ່ຮູ້ຈັກຢ່າງກວ້າງຂວາງ ແລະ ຕົນໄດ້ເຂົ້າກຸ່ມໃນປີ 2010 ເປັນຕົ້ນມາ ປະກອບມີ 4 ຄອບຄົວ ໃນນີ້ ຄອບຄົວຕົນໄດ້ໃຊ້ທຶນໝູນວຽນຊື້ວັດຖຸດິບສໍາລັບປຸງແຕ່ງເຮັດໝໍ້າຊີ້ນແຫ້ງສະຫວັນ ຊີ້ນອົບສະໝຸນໄພສະຫວັນ ໄສ້ກອກຫວານ ໄສ້ກອກເຄັມ ແຈ່ວບອງ ແລະ ໝູຝອຍ ຈໍານວນມື້ລະ 3-4 ລ້ານກີບ ເພື່ອຕອບສະໜອງໃຫ້ພຽງພໍກັບຄວາມຕ້ອງການຂອງຜູ້ບໍລິໂພກ ເຊິ່ງເປັນອາຫານທີ່ເຮັດດ້ວຍມືສະອາດ ຖືກຫຼັກອະນາໄມ ມີຄວາມປອດໄພ ປາສະຈາກເຈືອປົນສານເຄມີ ແລະ ສານກັນບູດ ໂດຍໄດ້ຮັບການຢັ້ງຢືນຈາກພະແນກສາທາລະນະສຸກ ກໍ່ຄືກະຊວງສາທາລະນະສຸກ ພ້ອມທັງໄດ້ຮັບຄວາມນິຍົມຂອງຜູ້ບໍລິໂພກ ທ່ານໃດທີ່ຕ້ອງການສາມາດຊື້ໄດ້ ທີ່ຮ້ານປ້າໝອນຂາຍໝໍ້າ ແລະ ຕາມງານວາງສະແດງອື່ນໆທີ່ພາກລັດຈັດຂຶ້ນ ມີລາຄາຂາຍແຕ່ 10 ພັນກີບ-ສູງສຸດ 350.000 ກີບ.

ສໍາລັບງານວາງສະແດງ-ຈໍາໜ່າຍສິນຄ້າໜຶ່ງເມືອງໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບ ນະຄອນຫຼວງວຽງຈັນ ຄັ້ງທີ IV ໄດ້ເປັນຕົວແທນຂອງແຂວງສະຫວັນນະເຂດ ເຂົ້າມາຮ່ວມວາງສະແດງຈໍາໜ່າຍ ເຊິ່ງໄດ້ນໍາເອົາຊີ້ນແຫ້ງສະຫວັນ 20 ກິໂລ ໝໍ້າ 30 ກິໂລ ໄສ້ກອກຫວານ+ໄສ້ກອກເຄັມ 100 ກິໂລ ແລະ ອາຫານປະເພດອື່ນໆທີ່ເປັນເອກະລັກຂອງແຂວງສະຫວັນນະເຂດ ລວມມູນຄ່າ 20 ລ້ານກີບ ຜ່ານການຈໍາໜ່າຍເຫັນວ່າໄດ້ຜົນຕອບຮັບຈາກສັງຄົມເປັນຈໍານວນຫຼວງຫຼາຍ.

ຂ່າວທີ່ກ່ຽວຂ້ອງ