ເຂັ້ມງວດເພື່ອຄວາມເປັນລະບຽບ ສ້າງຄວາມສະດວກໃນການສັນຈອນ

233 19 ມິ.ນ. 2017 ຂ່າວໜ້າ​ໜຶ່ງ
ເຂັ້ມງວດເພື່ອຄວາມເປັນລະບຽບ ສ້າງຄວາມສະດວກໃນການສັນຈອນ

ເພື່ອ​ຄວາມ​ເປັນ​ລະບຽບ​ຮຽບຮ້ອຍ ແລະ ອຳນວຍ​ຄວາມ​ສະດວກ​ໃນ​ການ​ສັນຈອນ​ໄປ​ມາ​ຂອງພາຫະນະ ແລະ ທາງ​ຄົນ​ຍ່າງ ​ພະແນກ​ໂຍທາ​ທິ​ການ ແລະ ຂົນສົ່ງ ນະຄອນຫຼວງ​ວຽງ​ຈັນ ໄດ້​ອອກແຈ້ງ​ການເຖິງ​ບັນດາ​ບໍລິສັດ ລັດວິ​ສາ​ຫະ​ກິດ​ ບຸກຄົນ ນິຕິບຸກຄົນ ທະຫານ ຕຳຫຼວດ ຊາວ​ຄ້າຂາຍ ສະມາຄົມ​ລົດ​ຕຸກໆ ຈຳ​ໂບ້ ແລະ ພໍ່​ແມ່​ປະຊາຊົນ ທົ່ວ​ນະຄອນຫຼວງວຽງ​ຈັນ ຫ້າມ​ບໍ່​ໃຫ້​ຂາຍເຄື່ອງ ຈອດ​ລົດ​ທຸກ​ປະເພດ ແລະ ວາງສິ່ງ​ກີດຂວາງ​ຢູ່​ບໍລິເວນ​ພື້ນ​ທີ່​ເສັ້ນທາງ​ເດີນ​ລົດ ແລະ ເຂດ​ສະຫງວນ​ທາງ ລວມ​ທັງ​ພື້ນ​ທີ່​ທາງຍ່າງ​ຕາມ​ຖະໜົນ​ສາຍ​ຫຼັກ​ໃນ​ຕົວເມືອງ​ວຽງ​ຈັນ.

ອີງ​ຕາມ​ແຈ້ງ​ການ​ເລກ​ທີ 2856/​ຍທຂ ນວ ລົງ​ວັນ​ທີ 13 ມິຖຸນາ 2017 ໄດ້​ແຈ້ງ​ໃຫ້​ຮູ້​ວ່າ: ນັບ​ແຕ່​ວັນ​ທີ 20 ມິຖຸນາ 2017 ເປັນຕົ້ນ​ໄປ​ໜ່ວຍ​ງານ​ຮັບຜິດຊອບ​ຄວາມ​ເປັນ​ລະບຽບ​ຮຽບ​ຮ້ອຍ​ພະແນກ ​ຍທຂ ນວ ຮ່ວມ​ກັບ​ເຈົ້າໜ້າທີ່​ຕຳຫຼວດ​ຈະລາຈອນ ໜ່ວຍງານ​ຈັດ​ສັນ​ເມືອງ​ທີ່​ກ່ຽວຂ້ອງ ພະແນກ​ອຸດສາຫະກຳ ແລະ ການຄ້າ ນວ ແລະ ຫ້ອງການ​ຄຸ້ມ​ຄອງບໍລິການ​ຕົວ​ເມືອງ​ວຽງ​ຈັນ ຈະໄດ້​ປະຕິບັດ​ງານ​ຢ່າງ​ເຂັ້ມ​ງວດ ແລະ ເດັດຂາດ ຢູ່​ຈຸດ 4 ແຍກ​ສະຖາ​ນີ​ລົດເມຫາຈຸດ​ທາງ​ເຂົ້າ​ຕະຫຼາດ​ຂົວ​ດິນ (ຖະໜົນ​ໜອງ​ບອນ ແລະ ເບື້ອງ​ກົງກັນຂ້າມ) ເພື່ອຈັດ​ສັນ​ບໍ່​ໃຫ້​ລົດ​ຈອດ ແລະ ຂາຍເຄື່ອງ​ແມ່ນ​ຫ້າມ​ບໍ່​ໃຫ້​ມີ​ການຈອດ​ລົດ ແລະ ຂາຍເຄື່ອງ​ທຸກ​ປະເພດ​ຢູ່​ຈຸດ​ດັ່ງກ່າວ.

ຫ້າມ​ເດັດຂາດ​ບໍ່​ໃຫ້​ປຸກ​ສ້າງຕໍ່​ເຕີມເທີບ​ເງີບ ຕູບ​ວາງ​ກອງ​ຫີນ-ຊາຍ ຕິດ​ຕັ້ງ​ປ້າຍ​ໂຄສະນາ ປ້າຍ​ແນະນຳ​ຈອດ​ລົດ​ໃຫຍ່​ໃນຊ່ອງ​ທາງ​ເດີນ​ລົດ (ບ່ອນ​ທີ່​ທາງການ​ບໍ່​ໄດ້​ກຳນົດ​ໃຫ້​ຈອດ) ຂຶ້ນຈອດ​ເທິງ​ທາງ​ຍ່າງ​ຂາຍເຄື່ອງ ຂາຍ​ຫວຍ ຂາຍ​ໝາກເບັງ ແລະ ວາງ​ສິ່ງ​ກີດຂວາງ​ຢູ່​ໃນ​ເຂດ​ສະຫງວນ​ຂອງ​ທາງ ແລະ ເທິງ​ທາງຍ່າງ​ຕາມ​ຖະໜົນ​ໃນ​ຕົວ​ເມືອງ ພ້ອມ​ທັງ​ຫ້າມ​ຖົມ​ດິນ​ກວມ​ເຂດສະຫງວນ​ແຄມ​ທາງ ​ກວມ​ເອົາຮ່ອງ​ລະບາຍ​ນ້ຳ​ທຳ​ມະ​ຊາດ​ບຶງ ໜອງ ແລະ ໜ່ວຍ​ງານ​ກວດກາຜັງເມືອງ ສົມທົບ​ກັບ​ຫ້ອງການໂຍທາ​ທິ​ການເມືອງ ອຳນາດການ​ປົກຄອງ​ທ້ອງຖິ່ນ​ບ້ານ ເມືອງ ເຈົ້າ​ໜ້າທີ່​ກ່ຽວຂ້ອງ​ລົງກວດຄືນ ​ການບຸກລຸກ​ເອົາ​ເຂດສະຫງວນ​ທາງ​ໃນ​ເຂດ​ນະຄອນຫຼວງ​ວຽງ​ຈັນ ເປັນຕົ້ນ ຖະໜົນສຸ​ພານຸ​ວົງ ຖະໜົນ​ເຊດ​ຖາ​ທິລາດ ຖະໜົນ​ສາມ​ແສນ​ໄທ ຖະໜົນ​ເຈົ້າຟ້າ​ງຸ່ມ ຖະໜົນ​ລ້ານຊ້າງ ຖະໜົນ​ອາ​ຊຽນ ຖະໜົນທ່າ​ເດື່ອ ຖະໜົນ​ກຳແພງ​ເມືອງ ຖະໜົນ​ລາວ-ໄທ ຖະໜົນໂກດສໂກ-ໂພນ​ໄຊ ຖະໜົນ​ໂພນ​ທັນ ຖະໜົນ​ດົງ​ປ່າ​ລານ-ສາຍ​ລົມ ຖະໜົນ​ຄູ​ວຽງ ຖະໜົນ​ເຈົ້າ​ອາ​ນຸ​ວົງ ຖະໜົນ​ແຄມ​ຂອງ ຖະໜົນໄກສອນ ພົມວິຫານ ແລະ ຖະໜົນອື່ນໆ ກໍລະນີ​ພົບ​ເຫັນ​ບຸກຄົນ ​ນິຕິ​ບຸກຄົນ​ລະເມີດ​ຕໍ່​ລະບຽບ​ການທີ່​ໄດ້​ກຳນົດ​ໄວ້ ແມ່ນ​ຈະ​ໄດ້​ສຶກສາ​ອົບຮົມ​ກ່າວ​ເຕືອນ​ປັບ​ໃໝ ແລະ ພ້ອມ​ທັງ​ຮື້​ຖອນ​ຈົນ​ອອກຈາກ​ເຂດ​ສະຫງວນ ກໍລະນີ​ຍັງຝ່າຝືນ​ບໍ່​ປະຕິບັດ​ຕາມ​ແຈ້ງ​ການສະບັບ​ນີ້ ແມ່ນ​ໄດ້​ດຳເນີນ​ໄປ​ຕາມຂະ​ບວນ​ຍຸຕິ​ທຳ ແລະ ລະບຽບກົດໝາຍ​ກົດ​ຂອງ ​ສປປ ລາວ.

ຂ່າວທີ່ກ່ຽວຂ້ອງ