ປະເມີນຜົນໂຄງການກຳນົດຊະນິດພັນປາ ສ້າງວັງສະຫງວນ

122 19 ມິ.ນ. 2017 ຂ່າວໜ້າ​ໜຶ່ງ
ປະເມີນຜົນໂຄງການກຳນົດຊະນິດພັນປາ ສ້າງວັງສະຫງວນ

ໂຄງການ​ຄຸ້ມ​ຄອງ​ການ​ປະມົງແບບ​ມີ​ສ່ວນ​ຮ່ວມ ​ຢູ່​ເຂດ​ແມ່ນ້ຳຂອງ​ຕອນ​ກາງ (ແຂວງ​ບໍ​ລິ​ຄຳ​ໄຊ ແລະ ແຂວງ​ຄຳ​ມ່ວນ) ມີ​ເປົ້າໝາຍ​ປັບປຸງ​ການ​ຄຸ້ມ​ຄອງ​ຊັບ​ພະຍາ​ກອນ​ນ້ຳ​ຢູ່​ເຂດ​ນ້ຳ​ຕອນ​ກາງ ໂດຍ​ຜ່ານ​ການ​ສ້າງ​ວັງ​ສະຫງວນ ຄັດ​ເລືອກ​ຄະນະ​ຄຸ້ມ​ຄອງ​ວັງສະຫງວນ ແລະ ໜ່ວຍ​ງານ​ກວດກາການ​ປະມົງ​ຂັ້ນ​ບ້ານ ພ້ອມ​ທັງ​ສົ່ງເສີມ​ຊີວິດ​ການ​ເປັນ​ຢູ່​ ພັດທະນາທາງ​ເລືອກ​ໃນ​ການ​ສ້າງ​ລາຍ​ຮັບ ຫຼຸດຜ່ອນ​ການ​ທຳລາຍ​ຊັບ​ພະຍາກອນ​ທຳ​ມະ​ຊາດ​ຢູ່​ນ້ຳ ແລະ ປູກຈິດ​ສຳນຶກ​ຂອງ​ຊຸມ​ຊົນ ​ເພື່ອ​ໃຫ້​ມີຄວາມ​ເຂົ້າໃຈ​ຫຼາຍ​ຂຶ້ນ​ກ່ຽວ​ກັບຜົນ​ປະໂຫຍດ​ຂອງ​ວັງ​ສະຫງວນ ແລະ ການ​ຄຸ້ມ​ຄອງ​ການ​ປະມົງ ເຊິ່ງ​ເລີ່ມ​ຈັດ​ຕັ້ງ​ປະຕິບັດ​ໂຄງການແຕ່​ວັນ​ທີ 15 ທັນວາ ປີ 2016 ເປັນຕົ້ນ​ມາ.

ວັນ​ທີ 15 ມິຖຸນາ 2017 ກອງທຶນ​ອະນຸ​ຮັກ​ທຳ​ມະ​ຊາດ​ໂລກປະຈຳ​ລາວ (WWF) ຈັດ​ກອງ​ປະຊຸມ​ສະຫຼຸບ​ຜົນ​ການຈັດຕັ້ງ​ປະຕິບັດ​ໂຄງການ ປະຈຳ​ໄຕ​ມາດ 6 ເດືອນ (15/6/2016-15/6/2017) ທີ່​ພະ​ແນກ​ກະສິກຳ ແລະ ປ່າໄມ້ ແຂວງ​ຄຳ​ມ່ວນ ເປັນ​ປະທານ​ຂອງ​ທ່ານ ບຸນ​ທອງ ຊາພັກດີ ຮອງ​ຫົວໜ້າ​ກົມ​ລ້ຽງສັດ ແລະ ການ​ປະມົງ ກະຊວງ​ກະ​ສິກຳ ແລະ ປ່າໄມ້ ທັງ​ເປັນ​ປະທານຜູ້​ຊີ້​ນຳ​ໂຄງການ​ຄຸ້ມ​ຄອງ​ການ​ປະມົງ​ແບບ​ມີ​ສ່ວນ​ຮ່ວມ​ຢູ່​ເຂດ​ແມ່ນ້ຳຂອງ​ຕອນ​ກາງ ມີ​ບັນດາ​ຜູ້ຕາງໜ້າ​ຈາກ​ກົມ​ກ່ຽວຂ້ອງ ກະຊວງ​ກະສິກຳ ແລະ ປ່າໄມ້ ພະ​ແນກ​ກະສິກຳ ແລະ ປ່າໄມ້ ແຂວງ​ບໍ​ລິ​ຄຳ​ໄຊ ແລະ ແຂວງ​ຄຳມ່ວນ ຜູ້​ປະສານ​ງານ​ຈາກ​ອົງການ WWF ປະຈຳ​ລາວ ແລະ ປະເທດ​ໄທ​ເຂົ້າ​ຮ່ວມ.

ການຈັດຕັ້ງ​ປະຕິບັດ​ໂຄງການດັ່ງກ່າວ ໄລຍະ 6 ເດືອນ​ຜ່ານ​ມາ ໄດ້​ສຳເລັດ​ການ​ເກັບ​ກຳ​ຂໍ້​ມູນ​ພື້ນຖານ​ທາງ​ດ້ານ​ເສດຖະກິດ-ສັງຄົມ ແລະ ກິດຈະກຳ​ສຳ​ຫຼວດ​ຂໍ້ມູນ ຄວາມ​ຮູ້​ພື້ນຖານ ທັດສະນະຄະຕິ ແລະ ການ​ປະຕິບັດ ກ່ຽວຂ້ອງ​ກັບ​ການ​ດຳລົງ​ຊີວິດ​ຂອງຊຸມ​ຊົນກ່ຽວ​ກັບ​ການ​ປະມົງຢູ່ 19 ບ້ານ​ເປົ້າ​ໝາຍ 6 ເມືອງຂອງ 2 ແຂວງຄື: ແຂວງ​ບໍ​ລິ​ຄຳ​ໄຊ ມີ 9 ບ້ານ​ເປົ້າ​ໝາຍ ມີ 1.847 ຄອບຄົວ ແລະ ແຂວງ​ຄຳ​ມ່ວນ ມີ 10 ບ້ານ​ເປົ້າ​ໝາຍ ລວມ​ມີ 2.058 ຄອບຄົວ ໄດ້​ດຳເນີນການ​ສຳ​ຫຼວດ​ເກັບ​ກຳ​ຄວາມ​ອຸດົມ​ສົມບູນ​ຂອງ​ຊີວະ​ນາໆພັນ ຂໍ້ມູນ​ທາງ​ດ້ານ​ຄຸນະພາບ​ນ້ຳ ໂດຍເລືອກ​ເອົາ 4 ຈຸດຄື: ບ້ານ​ແກ້ງສະ​ດອກ ແລະ ບ້ານ​ບຸງ​ກວາງ ແຂວງ​ບໍ​ລິ​ຄຳ​ໄຊ ບ້ານ​ຫີນ​ບູນເໜືອ-ໃຕ້ ແລະ ບ້ານ​ນາ​ເມືອງ ແຂວງ​ຄຳ​ມ່ວນ ພ້ອມ​ທັງ​ຈັດ​ເຝິກອົບຮົມ​ໃຫ້​ຊາວ​ປະມົງ​ຂອງ​ບ້ານເປັນ​ຜູ້​ບັນທຶກ ແລະ ຕິດຕາມການ​ຫາ​ປາ ເຊິ່ງ​ກຳນົດ​ເວລາການ​ຕິດຕາມ​ຫາ​ປາ​ລະດູຝົນ ລະຫວ່າງເດືອນ​ມິຖຸນາຫາເດືອນສິງຫາ ແລະ ລະດູແລ້ງ ລະຫວ່າງເດືອນ​ທັນວາຫາເດືອນກຸມພາ​ຂອງ​ທຸກໆ​ປີ ພ້ອມ​ນັ້ນ ໄດ້ສຳພາດ​ຂໍ້​ມູນ​ດ້ານ​ຊະນິດ​ພັນ​ປາທີ່​ໃກ້​ຈະ​ສູນພັນ ເພື່ອ​ເປັນ​ຕົວ​ຊີ້ວັດ​ໃນ​ການ​ສ້າງ​ວັງ​ສະຫງວນ ແລະ ຜ່ານ​ການ​ສຳພາດ ເຫັນ​ດີກຳນົດ​ເອົາ 8 ຊະນິດ​ພັນ​ປາທີ່ເປັນ​ຕົວ​ຊີ້​ວັດ ເປັນຕົ້ນ ປາບຶກ ປາຝາ​ໄລ (ປະເພດ​ຫວງ​ຫ້າມ ບັນຊີ I) ປາ​ເຄິງ ປາ​ເອິນ​ຂາວ ປານາງແດງ (ປະເພດ​ຄຸ້ມ​ຄອງບັນ​ຊີ​ II) ປາແຂ້​ຄວາຍ ປາ​ວາໜ້າ​ນໍ (ປະເພດ​ທົ່ວ​ໄປ​ບັນຊີ III) ສຳລັບ​ກິດຈະ​ກຳ​ສ້າງຕັ້ງ​ວັງ​ສະຫງວນ ແຂວງ​ບໍ​ລິ​ຄຳ​ໄຊ ມີ 9 ບ້ານ​ເປົ້າໝາຍ 8 ວັງ ໄດ້​ສຳເລັດ​ການ​ກຳນົດ​ສະຖານທີ່​ສ້າງ​ວັງ​ສະຫງວນ ຈັດ​ຕັ້ງ​ລະບຽບ​ການ​ຄຸ້ມ​ຄອງ ຄັດເລືອກ​ໜ່ວຍ​ງານ​ຮັບຜິດຊອບຂັ້ນ​ບ້ານ 4 ບ້ານ​ໃນ ຈຳນວນ 9 ບ້ານ ຢູ່​ໃນ 3 ເມືອງ ສ່ວນ​ແຂວງຄຳ​ມ່ວນ ມີ 10 ບ້ານເປົ້າ​ໝາຍ 9 ວັງ​ສະຫງວນ ໄດ້​ສຳເລັດ​ກຳນົດ​ສະຖານທີ່​ສ້າງ​ວັງ​ສະຫງວນ ຈັດ​ຕັ້ງ​ລະບຽບ​ການ​ຄຸ້ມ​ຄອງ ຄັດເລືອກ​ໜ່ວຍ​ງານ​ຮັບຜິດຊອບ​ຂັ້ນບ້ານ 3 ບ້ານ ໃນ​ຈຳນວນ 10 ບ້ານ​ຂອງ 3 ເມືອງ.

ຜ່ານ​ການຈັດຕັ້ງ​ປະຕິບັດ​ໂຄງການ​ຕົວ​ຈິງ ​ໄດ້​ມີ​ການ​ປ່ຽນແປງເຂດ​ສ້າງ​ວັງ​ສະຫງວນ ເນື່ອງຈາກ​ພື້ນ​ທີ່​ບ້ານ​ທີ່​ເລືອກ​ບໍ່​ເໝາະສົມ​ໃນ​ການ​ສ້າງ​ເຂດ​ສະຫງວນປາ ແລະ ສັດ​ນ້ຳ​ອື່ນໆ ການ​ປ່ຽນບ້ານ​ທີ່​ເໝາະ​ສົມ​ແທນຄື: ແຂວງບໍ​ລິ​ຄຳ​ໄຊ ບ້ານ​ປາກ​ຊັນ ປ່ຽນແທນບ້ານ​ນ້ຳ​ຫງຽບ ບ້ານ​ຊອດ ປ່ຽນ​ແທນ​ບ້ານ​ປາກ​ກະດິງ​ເໜືອ ແລະ ບ້ານ​ທ່າ​ກະຖິນ ປ່ຽນ​ແທນບ້ານປາກ​ກະດິງ​ໃຕ້ ແຂວງ​ຄຳມ່ວນ ບ້ານ​ຫ້ວຍ​ລີ້ ປ່ຽນ​ແທນບ້ານມ່ວງ​ສຸມ ບ້ານ​ຈອມ​ແຈ້ງ ປ່ຽນແທນ​ບ້ານ​ປາກ​ເປັ່ງ ແລະ ບ້ານຫີນ​ລາດ ປ່ຽນ​ແທນ​ບ້ານແມ້ງ.

ສຳລັບ​ທິດ​ທາງ 6 ເດືອນຕໍ່ໜ້າ ​ໂຄງການ​ຈະ​ສືບຕໍ່​ຈັດ​ຕັ້ງ​ປະຕິບັດ​ບັນດາ​ກິດຈະກຳ​ທີ່​ຍັງ​ບໍ່​ທັນສຳເລັດ ພ້ອມ​ທັງ​ກຳນົດ​ສະຖານທີ່​ສ້າງ​ວັງ​ສະຫງວນ ຮ່າງ​ລະບຽບຄັດ​ເລືອກ​ຄະນະ​ກຳມະການ​ຈັດຕັ້ງ​ໜ່ວຍ​ງານ​ຮັບຜິດຊອບ ທົບທວນ-ຜ່ານ​ກົດ​ລະບຽບ​ຂັ້ນ​ບ້ານ ກຸ່ມ ແລະ ເມືອງ ເພື່ອ​ຮອງ​ຮັບເອົາ​ກົດ​ລະບຽບ​ຂອງ​ບ້ານ​ເປົ້າໝາຍ ຄື: ແຂວງ​ບໍ​ລິ​ຄຳ​ໄຊ ມີບ້ານ​ທ່າ​ໂພນ​ສັນ ທ່າ​ພະ​ບາດ ຜ່າ​ໂປ່ງ ກ້ວຍ​ອຸດົມ ແລະ ບ້ານປາກ​ຊັນ ແຂວງ​ຄຳ​ມ່ວນ ມີບ້ານດອນ​ຂຽວ​ໃຕ້ ບຶງ​ສານ​ທ່າ ກຸດ​ຈັບ ຫ້ວຍ​ນາງ​ລີ້ ປຸ່ງ​ເໜືອ ແລະ ບ້ານ​ຫີນ​ລາດ ແລະ ອື່ນໆ.

ຂ່າວທີ່ກ່ຽວຂ້ອງ