5 ເດືອນຜ່ານມາ ໂຮງໝໍເດັກ ມີຄົນໃຊ້ບໍລິການເຖິງ 50 ພັນກວ່າຄົນ

201 19 ມິ.ນ. 2017 ຂ່າວໜ້າ​ໜຶ່ງ
5 ເດືອນຜ່ານມາ ໂຮງໝໍເດັກ ມີຄົນໃຊ້ບໍລິການເຖິງ 50 ພັນກວ່າຄົນ

ເພື່ອ​ສະເຫຼີມສະຫຼອງ​ວັນ​ແພດລາວ 18 ມິຖຸນາ ໂຮງໝໍ​ເດັກ​ໄດ້ຈັດ​ສະເຫຼີມສະຫຼອງ​ວັນ​ດັ່ງກ່າວຂຶ້ນວັນ​ທີ 16 ມິຖຸນາ 2017 ເປັນປະທານ​ຂອງ​ທ່ານ​ນາງ ສົມ​ມະນີຄອນ ຜາງ​ມະນີ​ໄຊ ຜູ້​ອຳນວຍການ​ໂຮງໝໍ​ເດັກ ມີ​ພະນັກງານແພດ​ເຂົ້າ​ຮ່ວມ.

ການ​ສະເຫຼີມສະຫຼອງ​ວັນ​ດັ່ງກ່າວ ​ໄດ້​ຈັດ​ຫຼາຍ​ກິດຈະກຳຄື: ເຜີຍແຜ່​ໃຫ້​ຄວາມ​ຮູ້​ກ່ຽວ​ກັບ​ປະຫວັດ​ຄວາມ​ເປັນ​ມາ​ຂອງ​ວັນແພດ​ລາວ ພ້ອມ​ທັງ​ໄດ້​ມີ​ແພດຕົວ​ແບບ​ມາ​ເລົ່າຄືນ​ປະສົບ​ການ ໃນ​ການ​ປະກອບສ່ວນ​ດ້ານ​ການແພດ ​ເພື່ອ​ໃຫ້​ແພດ​ລຸ້ນ​ຫຼັງ​ໄດ້​ຮຽນຮູ້​ເອົາ​ເປັນ​ແບບຢ່າງ​ນຳ​ບົດຮຽນ ໄປ​ຈັດ​ຕັ້ງ​ປະຕິບັດ​ເຂົ້າ​ໃນ​ວຽກງານ​ການ​ແພດ ກິດຈະກຳ​ບໍ​ລິຈາກ​ເລືອດ ກວດ​ສຸຂະພາບ​ປາກ ແລະ ແຂ້ວ ກວດ​ສຸຂະພາບ​ຫູ ກວດກາ​ດ້ານ​ໂພຊະ​ນາ​ການ​ໃນເດັກ ແລະ ແຈກ​ຢາຍ​ຢາ​ວິ​ຕາມມິນ​ແກ່​ເດັກ ການ​ໃຫ້​ສຸ​ຂະ​ສຶກ​ສາ ການ​ຮັກສາ​ສຸຂະພາບ​ແກ່​ພໍ່​ແມ່ ຄົນ​ເຈັບ​ໃນ​ການ​ຮັກສາ​ສຸຂະພາບຂອງ​ລູກ​ໂດຍ​ບໍ່​ເສຍ​ຄ່າ ນອກຈາກ​ນີ້ ຍັງ​ມີ​ກິດຈະກຳ​ຂາຍ​ອາຫານ​ເພື່ອ​ສຸຂະພາບ​ຂອງ 3 ອົງການຈັດຕັ້ງ​ໂຮງໝໍ​ເດັກ.

ສຳລັບ​ໂຮງໝໍ​ເດັກ ໄດ້​ມີ​ພະນັກ​ງານ​ທັງ​ໝົດ 160 ຄົນ ໃນ​ນັ້ນ ມີ​ໝໍ 44 ທ່ານ ພະຍາບານ 51 ທ່ານ ສາຍ​ສະໜັບສະໜູນ 11 ທ່ານ ຜູ້ອຳນວຍການ 4 ທ່ານ ເຊິ່ງ​ພະນັກງານ​ທັງ​ໝົດ ໂດຍ​ສະເພາະ​ໝໍ ແລະ ພະຍາບານ​ໄດ້ຕັ້ງໜ້າ​ໃຫ້​ບໍລິການ​ປິ່ນປົວ​ເດັກ ນັບ​ແຕ່​ເດືອນ​ມັງກອນ-ພຶດ​ສະພາ 2017 ມີ​ຄົນ​ເຈັບ​ມາ​ໃຊ້​ບໍ​ລິການ​ປິ່ນປົວ​ພະຍາດ ທັງ​ໝົດ 50.330 ຄົນ.

ຂ່າວທີ່ກ່ຽວຂ້ອງ