ສ.ອາ​ເມ​ຣິ​ກາ ງົດ​ຄົ້ນ​ຫາ ແລະ ກູ້​ໄພ ກຳ­ປັ່ນ USS Fitzgerald

234 20 ມິ.ນ. 2017 ຂ່າວຕ່າງປະເທດ
ສ.ອາ​ເມ​ຣິ​ກາ ງົດ​ຄົ້ນ​ຫາ ແລະ ກູ້​ໄພ ກຳ­ປັ່ນ USS Fitzgerald

ວິ­ທະ­ຍຸ​ສຽງ​ອາ​ເມ​ຣິ​ກາ ລາຍ​ງານ​ວ່າ ສ.ອາ​ເມ​ຣິ​ກາ ໄດ້​ງົດ​ການ​ຄົ້ນ​ຫາ​ພະ­ນັກ­ງານ 7 ຄົນ​ທີ່​ຫາຍ​ສາບ​ສູນ​ໄປ ຫຼັງ​ຈາກ​ທີ່​ພົບ​ຮ່າງ​ຜູ້​ເສຍ​ຊີ­ວິດ​ຢູ່​ໃນ​ຫ້ອງ​ນອນ​ຂອງ​ກຳ­ປັ່ນ​ຂັບ​ໄລ່ USS Fitzgerald ຊຶ່ງ​ກຳ­ປັ່ນ​ລຳ​ນີ້​ ໄດ້​ຕຳ​ກັບ​ກຳ­ປັ່ນ​ສິນ­ຄ້າ​ຂະ­ໜາດ​ໃຫຍ່​ລຳ​ໜຶ່ງ ​ຢູ່​ນອກ​ຝັ່ງ​ທະ­ເລ​ຂອງ​ຍີ່­ປຸ່ນ ເມື່ອ​ຕອນ​ເຊົ້າ​ວັນ​ທີ 17 ມິ­ຖຸ­ນາ.

ຮອງ​ພົນ​ເຮືອ ໂຈ​ເຊບ ອາວ​ໂຄ​ອິນ ຜູ້​ບັນ­ຊາ​ການ​ກອງ​ເຮືອ​ທີ 7 ຂອງ​ກອງ­ທັບ​ເຮືອ ສ.ອາ​ເມ​ຣິ​ກາ ກ່າວ​ຕໍ່​ຜູ້​ສື່​ຂ່າວ​ຢູ່​ທີ່​ຖານ​ທັບ​ເຮືອ ໂຢ​ໂກ​ຊູ​ກາ (ໃນ​ຍີ່­ປຸ່ນ) ຊຶ່ງ​ເປັນ​ບ່ອນ​ອາ­ໄສ​ຂອງ​ກອງ​ເຮືອ​ທີ 7 ວ່າ ການ​ຄົ້ນ​ຫາ ແລະ ກູ້​ໄພ​ໄດ້​ສິ້ນ​ສຸດ​ລົງ​ແລ້ວ ທ່ານ ອາວ ໂຄ​ອິນ ໃຫ້​ຮູ້​ວ່າ ນ້ຳ​ທະ­ເລ​ໄດ້​ໄຫຼ​ທະ­ລຸ​ເຂົ້າ​ໄປ​ໃນ​ຫ້ອງ​ນອນ ແລະ ຂອບ​ເບື້ອງ​ຂວາ​ຂອງ​ກຳ­ປັ່ນ​ຖືກ​ຕຳ​ບຸ້ມ​ເຂົ້າ ພະ­ນັກ­ງານ​ໃນ​ກຳ­ປັ່ນ​ສ່ວນ​ຫຼາຍ​ພວມ​ນອນ​ຫຼັບ ໃນ​ເວ­ລາ​ທີ່​ກຳ­ປັ່ນ​ຂັບ​ໄລ່​ລຳ​ນັ້ນ​ຕຳ​ກັບ​ກຳ­ປັ່ນ​ບັນ­ທຸກ​ສິນ­ຄ້າ​ລຳ​ໜຶ່ງ​ທີ່​ຕິດ​ທຸງ­ຊາດ​ຟີ​ລິບ​ປິນ.

ກ່ອນ​ໜ້າ​ນັ້ນ ກອງ­ທັບ​ເຮືອ ສ.ອາ​ເມ​ຣິ​ກາ ຢືນ­ຢັນ​ວ່າ ໄດ້​ພົບ​ເຫັນ​ຮ່າງ​ຂອງ​ທະ­ຫານ​ທັງ 7 ຄົນ​ທີ່​ຫາຍ​ສາບ​ສູນ ຫຼັງ​ຈາກ​ທີ່​ເກີດ​ອຸ­ບັດ­ເຫດ​ຕຳ​ກັນ​ລະ­ຫວ່າງ​ກຳ­ປັ່ນ​ຂັບ​ໄລ່ USS Fitzgerald ກັບ​ກຳ­ປັ່ນ​ຂົນ­ສົ່ງ ACX Crystal ທີ່​ຕິດ​ທຸງ­ຊາດ​ຟີ​ລິບ​ປິນ ນັ້ນ­ແລ້ວ.

ຂ່າວທີ່ກ່ຽວຂ້ອງ