ອີ​ຣານ ຍິງ​ລູກ​ສອນ​ໄຟ​ໃສ່​ເຂດ​ພາກ​ຕາ­ເວັນ​ອອກ​ຊີ​ຣີ

236 20 ມິ.ນ. 2017 ຂ່າວຕ່າງປະເທດ
ອີ​ຣານ ຍິງ​ລູກ​ສອນ​ໄຟ​ໃສ່​ເຂດ​ພາກ​ຕາ­ເວັນ​ອອກ​ຊີ​ຣີ

ຂ່າວ­ສານ Reuters/AP ສຳ­ນັກ​ຂ່າວ­ສານ Tasnim ຕ່າງ​ກໍ​ລາຍ​ງານ​ວ່າ ວັນ​ທີ 18 ມິ­ຖຸ­ນາ​ນີ້ ກອງ​ກຳ­ລັງ​ທະ­ຫານ​ປ້ອງ​ກັນ​ການ​ປະ­ຕິ­ວັດ ອິ​ສລາມ ອີ​ຣານ (IRGC) ໄດ້​ຍິງ​ລູກ​ສອນ​ໄຟ​ຂະ­ໜາດ​ກາງ​ຈາກ​ໜ້າ­ດິນ​ສູ່​ໜ້າ­ດິນ ຈຳ­ນວນ​ຫຼາຍ​ໜ່ວຍ ຈາກ​ພາກ​ຕາ­ເວັນ­ຕົກ​ຂອງ​ອີ​ຣານ ເຂົ້າ​ໄປ​ໃສ່​ພາກ​ຕາ­ເວັນ​ອອກ​ຂອງ​ປະ­ເທດ​ຊີ​ຣີ.

ການ​ໂຈມ​ຕີ​ດັ່ງ­ກ່າວ ທີ່​ມຸ່ງ​ໄປ​ໃສ່​ຖານ​ທັບ​ຂອງ​ກຸ່ມ​ມື​ປືນ ທີ່​ຖື​ວ່າ​ໄດ້​ປະ­ຕິ­ບັດ​ການ​ໂຈມ​ຕີ​ຢູ່​ໃນ​ອີ​ຣານ ເມື່ອ​ອາ­ທິດ​ກ່ອນ ເປັນ​ເຫດ​ໃຫ້​ມີ​ຜູ້​ເສຍ​ຊີ­ວິດ 18 ຄົນ ແຈ້ງ​ການ​ທີ່​ມີ​ອອກ​ມາ​ຢູ່​ໃນ​ເວບ​ໄຊ​ທາງ​ການ​ຂອງ IRGC ຊີ້​ແຈງ​ວ່າ ການ​ໂຈມ​ຕີ​ນັ້ນ​ມຸ່ງ​ໄປ​ທີ່​ແຂວງ ດີ ແອ​ລ-ຊູ ຂອງ​ຊີ​ຣີ.

ການ​ໂຈມ​ຕີ​ຄື​ດັ່ງ­ກ່າວ ນັບ​ວ່າ​ເປັນ​ເລື່ອງ​ທີ່​ບໍ່​ຄ່ອຍ​ເກີດ​ຂຶ້ນ​ຢູ່​ໃນ​ສົງ­ຄາມ​ພາຍ​ໃນ​ແກ່­ຍາວ​ໃນ​ຊີ​ຣີ ຊຶ່ງ​ອີ​ຣານ ພວມ​ໃຫ້­ການ​ໜູນ​ຫຼັງ​ປະ­ທາ­ນາ­ທິ­ບໍ­ດີ​ຊີ​ຣີ ບາ​ຊາ ອາ​ລ-ອັສ​ຊັດ.

ຜູ້​ເສຍ​ຊີ­ວິດ 18 ຄົນ ແລະ ບາດ­ເຈັບ 50 ກວ່າ​ຄົນ ໃນ​ເຫດ­ການ​ໂຈມ​ຕີ​ກໍ່​ການ​ຮ້າຍ​ສອງ​ຄັ້ງ ທີ່​ອາ­ຄານ​ລັດ​ຖະ​ສະ­ພາ​ອີ​ຣານ ແລະ ສະ­ຖານ­ທີ່​ເກັບ​ສົບ​ຂອງ​ທ່ານ ຣູ​ຮອລ​ລາ ໂຄ​ເມ​ນີ ອະ­ດີດ​ຜູ້­ນຳ​ຂອງ​ການ​ປະ­ຕິ­ວັດ​ອີ​ຣານ ຊຶ່ງ​ເກີດ​ຂຶ້ນ​ເມື່ອ​ວັນ​ທີ 7 ມິ­ຖຸ­ນາ​ທີ່​ຜ່ານ​ມາ ໂດຍ​ກຸ່ມ​ລັດ​ອິ​ສລາມ (IS) ໄດ້​ອ້າງ​ຄວາມ​ຮັບ­ຜິດ­ຊອບ​ວ່າ ຢູ່​ເບື້ອງ​ຫຼັງ​ເຫດ­ການ​ໂຈມ​ຕີ​ທັງ​ສອງ​ລາຍ​ດັ່ງ­ກ່າວ.

ຂ່າວທີ່ກ່ຽວຂ້ອງ