ແຕ່ງ­ຕັ້ງ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ເບ​ສ​ບອນ​ແຫ່ງ​ຊາດ

641 06 ກ.ກ. 2017 ວົງຈອນກີລາ
ແຕ່ງ­ຕັ້ງ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ເບ​ສ​ບອນ​ແຫ່ງ​ຊາດ

    ພິ­ທີ​ປະ­ກາດ​ແຕ່ງ­ຕັ້ງ​ຄະ­ນະ​ບໍ­ລິ­ຫານ​ງານ​ສະ­ຫະ­ພັນ​ເບ​ສ​ບອນ​ແຫ່ງ​ຊາດ ຈັດ​ຂຶ້ນ​ວັນ​ທີ 3 ກໍ­ລະ­ກົດ 2017 ທີ່​ໂຮງ­ແຮມ​ເມືອງ​ແທງ ນະ­ຄອນ­ຫຼວງ​ວຽງ​ຈັນ ມີ​ທ່ານ ບົວ​ລານ ສິ­ລິ​ປັນ­ຍາ ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ ທັງ​ເປັນ​ຮອງ​ປະ­ທານ​ຄະ­ນະ​ກຳ­ມະ­ການ​ໂອ​ແລມ​ປິກ​ແຫ່ງ​ຊາດ​ລາວ ທ່ານ ຄຳ​ຜາຍ ສີ​ສະ­ຫວັນ ຮອງ​ລັດ­ຖະ­ມົນ­ຕີ ກະ­ຊວງ ສສກ ປະ­ທານ​ສະ­ຫະ­ພັນ​ເບ​ສ​ບອນ​ແຫ່ງ​ຊາດ ທ່ານ​ທູດ ສ ເກົາ­ຫຼີ ຍີ່­ປຸ່ນ ແລະ ສະ­ຫະ­ລັດ​ອາ​ເມ​ຣິ​ກາ ປະ­ຈຳ​ລາວ ພ້ອມ​ດ້ວຍ​ຄະ­ນະ​ສະ­ຫະ­ພັນ​ເຂົ້າ​ຮ່ວມ.

    ທ່ານ ສຸ­ລະ​ສິດ ອຸ​ປຣາ​ວັນ ຮອງ​ປະ­ທານ​ສະ­ຫະ­ພັນ​ເບ​ສ​ບອນ​ແຫ່ງ​ຊາດ​ລາຍ​ງານ​ໃຫ້​ຮູ້​ວ່າ: ກີ­ລາ​ເບ​ສ​ບອນ​ເປັນ​ກີ­ລາ​ປະ­ເພດ​ໜຶ່ງ​ທີ່​ກຳ­ເນີດ​ຢູ່​ສະ­ຫະ­ລັດ​ອາ​ເມ​ຣິ​ກາ ແລະ ໄດ້​ຖືກ​ບັນ­ຈຸ​ເຂົ້າ​ແຂ່ງ­ຂັນ​ໃນ​ງານ​ມະ​ຫະ​ກຳ​ກີ­ລາ​ໂອ​ແລມ​ປິກ​ສາ­ກົນ​ແຕ່​ປີ 1992 ແລະ ປີ 2020 ປະ­ເທດ​ຍີ່­ປຸ່ນ​ຮັບ​ກຽດ​ເປັນ​ເຈົ້າ ພາບ ກີ­ລາ​ດັ່ງ­ກ່າວ​ກໍ່​ຖືກ​ບັນ­ຈຸ​ເຂົ້າ​ຮ່ວມ​ແຂ່ງ­ຂັນ​ເຊັ່ນ​ກັນ ສຳ­ລັບ​ລາວ​ເຮົາ​ກີ­ລາ​ເບ​ສ​ບອນ​ເປັນ​ກີ­ລາ​ໃໝ່ ທີ່​ຫາ­ກໍ່​ມີ​ການ­ຈັດ­ຕັ້ງ​ເຄື່ອນ​ໄຫວ ໂດຍ​ແມ່ນ​ທ່ານ ເຈ ຊັງ ອຸກ ຄູ​ເຝິກ​ອາ­ສາ​ສະ­ໝັກ​ຈາກ ສ ເກົາ­ຫຼີ ເປັນ​ຜູ້​ລິ​ເລີ່ມ ແລະ ສ້າງ­ຕັ້ງ​ສະ­ໂມ­ສອນ​ລາວ​ເຈ​ບຣາ​ເດີ ໃນ​ວັນ​ທີ 3 ພະ­ຈິກ 2013 ຕໍ່​ມາ​ກໍ່​ມີ​ຜູ້​ຊ່ຽວ­ຊານ ທີ່​ປືກ​ສາ ແລະ ພະ­ນັກ­ງານ​ບັນ­ດາ​ອົງ­ການ​ຕ່າງໆ ໂດຍ​ສະ­ເພາະ​ຈາກ​ຍີ່­ປຸ່ນ ແລະ ສ ເກົາ­ຫຼີ ໄດ້​ຊ່ວຍ​ກັນ​ສອນ​ນັກ­ກີ­ລາ​ລາວ ແລະ ໄດ້​ມີ​ການ​ເຝິກ­ຊ້ອມ​ກີ­ລາ​ດັ່ງ­ກ່າວ​ຈົນ​ມາ​ເຖິງ​ປັດ­ຈຸ­ບັນ ພ້ອມ​ທັງ​ມີ​ການ­ເຄື່ອນ­ໄຫວ​ຢ່າງ​ຕໍ່​ເນື່ອງ ແລະ ມີ​ການ​ສ້າງ­ຕັ້ງ​ສະ­ໂມ­ສອນ​ກີ­ລາ​ເບ​ສ​ບອນ​ຢູ່ 3 ໂຮງ­ຮຽນ​ສາ­ມັນ​ຄື: ມ​ຕົ້ນ ສີ​ສັດ­ຕະ​ນາກ ມສ ໄຊ​ເຊດ​ຖາ ແລະ ມສ ວຽງ​ຈັນ.

    ຫຼັງ​ຈາກ​ນັ້ນ​ກໍ່​ມີ​ການ​ຄັດ​ເລືອກ​ນັກ­ກີ­ລາ​ຄັ້ງ​ທຳ​ອິດ ຈຳ­ນວນ 70 ຄົນ ເພື່ອ​ເຂົ້າ​ຮ່ວມ​ແຂ່ງ­ຂັນ​ລາຍ­ການ​ນາໆຊາດ​ທີ່ ສ ເກົາ­ຫຼີ ແລະ ຈັດ​ແຂ່ງ­ຂັນ​ພາຍ​ໃນ 6 ຄັ້ງ ພ້ອມ​ທັງ​ມີ​ການ​ປະ­ສານ​ພົວ­ພັນ​ກັບ​ສາ­ກົນ ໄດ້​ຮັບ​ການ​ສະ­ໜັບ­ສະ­ໜູນ​ຢ່າງ​ຫຼວງ­ຫຼາຍ ພາຍ­ຫຼັງ​ໄດ້​ຮັບ​ການ​ແຕ່ງ­ຕັ້ງ​ສະ­ຫະ­ພັນ​ກີ­ລາ​ເບ​ສ​ບອນ​ແຫ່ງ​ຊາດ​ຢ່າງ​ເປັນ​ທາງ​ການ ນັບ​ຈາກ​ນີ້​ເປັນ­ຕົ້ນ​ໄປ​ຄະ­ນະ​ບໍ­ລິ­ຫານ​ງານ​ຈະ​ພ້ອມ​ກັນ​ສຸມ​ໃສ່​ວາງ​ແຜນ​ຢ່າງ­ຮອບ­ດ້ານ ເພື່ອ​ພັດ­ທະ­ນາ ແລະ ນຳ­ພາ​ທີມ​ນັກ­ກີ­ລາ​ລາວ​ໃຫ້​ມີ​ທ່າ​ກ້າວ​ທີ່​ພົ້ນ​ເດັ່ນ​ໃນ​ລະ­ດັບ​ພາກ​ພື້ນ ແລະ ສາ­ກົນ.

    ສຳ­ລັບ​ຄະ­ນະ​ບໍ­ລິ­ຫານ​ສະ­ຫະ­ພັນ​ເບ​ສ​ບອນ​ແຫ່ງ​ຊາດ​ປະ­ກອບ​ມີ​ທ່ານ ຄຳ​ຜາຍ ສີ​ສະ­ຫວັນ ເປັນ​ປະ­ທານ ທ່ານ ລີ ແມນ​ຊູ ຮອງ​ປະ­ທານ ທ່ານ ສຸ­ລະ​ສິດ ອຸ​ປຣາ​ວັນ ຮອງ​ປະ­ທານ ແລະ ເລ­ຂາ­ທິ­ການ ທ່ານ ບຸນ​ເຮັງ ສຸດ­ທິ​ຈັກ ຮອງ​ປະ­ທານ ແລະ ນາຍ​ຄັງ ນອກ​ນີ້​ຍັງ​ມີ​ຮອງ​ເລ­ຂາ 1 ທ່ານ ແລະ ຄະ­ນະ​ກຳ​ການ​ອີກ 3 ທ່ານ.

ຂ່າວທີ່ກ່ຽວຂ້ອງ