ສະກັດຈັບຜູ້ຄ້າຢາເສບຕິດໄດ້ 3 ຄົນ

258 13 ກ.ກ. 2017 ຂ່າວໜ້າ​ໜຶ່ງ

ໃນ​ຕົ້ນ​ເດືອນ​ມິຖຸນາຜ່ານ​ມາ ເຈົ້າ​ໜ້າທີ່​ພະ​ແນກ​ຕຳຫຼວດ​ສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງ​ຄຳ​ມ່ວນ ໄດ້​ເຂົ້າ​ຈັບກຸມ​ພວກ​ຄ້າຂາຍ​ຢາ​ເສບ​ຕິດ​ຢູ່ເສັ້ນທາງ​ເລກ​ທີ 12 ເຂດ​ບ້ານ​ນາຄຳ ເມືອງ​ມະຫາ​ໄຊ ສາມາດ​ກັກຕົວ​ຜູ້​ຖືກ​ຫາ​ໄດ້ 2 ຄົນ ພ້ອມ​ຢາບ້າ 1 ມັດ ເທົ່າ​ກັບ 2.018 ເມັດ ຈາກ​ນັ້ນ ຈຶ່ງ​ໄດ້​ຕິດຕາມ​ກັກ​ຕົວຜູ້​ຖືກ​ຊັດ​ທອດ​ອີກ 1 ຄົນ ພ້ອມ​ຢາບ້າ 200 ເມັດ.

ເຈົ້າ​ໜ້າທີ່​ພະ​ແນກ​ຕຳຫຼວດສະກັດ​ກັ້ນ ແລະ ຕ້ານ​ຢາ​ເສບ​ຕິດ ​ປກສ ແຂວງ​ຄຳ​ມ່ວນ ໃຫ້​ຮູ້​ວ່າ: ຜູ້​ຖືກ​ຫາໃນ​ຄະດີ​ດັ່ງກ່າວ​ຊື່​ທ້າວ ສົມໂພດ ອາຍຸ 20 ປີ ຢູ່​ບ້ານ​ນາກອກ​ແກ້ວ ເມືອງ​ມະຫາ​ໄຊ ແລະ ທ້າວ ໂຊກ ອາຍຸ 22 ປີ ຢູ່​ບ້ານ ຄຳ​ແກ້ວ ເມືອງ​ຫີນ​ບູນ ແຂວງ​ຄຳມ່ວນ ຈາກ​ນັ້ນ ເຈົ້າ​ໜ້າທີ່​ໄດ້​ຕິດຕາມ​ຈັບ​ຕົວ​ຜູ້​ຖືກ​ຊັດ​ທອດ​ອີກ​ຊື່ທ້າວ ວັນນາ ອາຍຸ 27 ປີ ຢູ່​ບ້ານຫ້ວຍ​ເພັດ ເມືອງ​ປາກ​ກະດິງ ແຂວງ​ບໍ​ລິ​ຄຳ​ໄຊ ຢູ່​ເສັ້ນທາງ 13 ໃຕ້​ເຂດ​ບ້ານ​ວຽງ​ທອງ ເມືອງ​ຫີນບູນ ແຂວງ​ຄຳ​ມ່ວນ ກວດ​ພົບ​ຢາບ້າ 1 ຖົງ ເທົ່າ​ກັບ 200 ເມັດ ຜ່ານ​ການ​ສືບສວນ-ສອບ​ສວນຢາ​ບ້າ​ຈຳນວນ​ດັ່ງກ່າວແມ່ນທ້າວ ວັນນາ ໄດ້​ໄປ​ຊື້​ນຳ​ພວກຮ່ວມ​ຂະ​ບວນ​ການ​ນຳ​ກັນ ແລ້ວເອົາ​ມາ​ຂາຍ​ໃຫ້​ທ້າວ ສົມໂພດ ແລະ ທ້າວ ໂຊກ.

ກ່ອນ​ໜ້າ​ນີ້ ໃນ​ວັນ​ທີ 29 ພຶດສະພາ 2017 ເຈົ້າ​ໜ້າທີ່​ພະ​ແນກຕຳຫຼວດ​ສະກັດ​ກັ້ນ ແລະ ຕ້ານຢາ​ເສບ​ຕິດ ​ປກສ ແຂວງ​ຄຳ​ມ່ວນ ສາມາດ​ກັກ​ຕົວ​ຜູ້​ຄ້າຂາຍ​ຢາ​ເສບຕິດ​ໄດ້ 3 ຄົນ​ຊື່​ທ້າວ ຄຳ​ໝັ້ນ ອາຍຸ 36 ປີ ຢູ່​ບ້ານ​ຫາດ​ໃຫຍ່ ທ້າວ ຈຸກ ອາຍຸ 28 ປີ​ຢູ່​ບ້ານ​ສີ​ສົມ​ຊື່ນ ແລະ ທ້າວ ກາ​ນາ​ດາ ອາຍຸ 29 ປີ​ຢູ່​ບ້ານ​ໂພນ​ຄຳ ເມືອງ​ຫີນ​ບູນ ແຂວງ​ຄຳ​ມ່ວນ ພ້ອມ​ຢາ​ບ້າ ຈຳນວນ 3.974 ເມັດ ໃນ​ຂະນະ​ທີ່ພວກ​ກ່ຽວ​ກຳລັງ​ຊື້​ຂາຍ​ຢາ​ບ້າ​ຢູ່ເສັ້ນທາງ​ເຂົ້າ​ບ້ານ​ເວີນ ເມືອງ​ທ່າແຂກ ແຂວງ​ຄຳ​ມ່ວນ.

ຂ່າວທີ່ກ່ຽວຂ້ອງ