ມອບ-ຮັບໜ້າທີ່ຜູ້ອຳນວຍການ ລຮລ

268 13 ກ.ກ. 2017 ຂ່າວໜ້າ​ໜຶ່ງ

ແນໃສ່​ເຮັດ​ໃຫ້​ລັດ​ວິ​ສາ​ຫະກິດ​ຖື​ຮຸ້ນ​ລາວ (​ລຮລ) ສືບຕໍ່​ເຕີບໃຫຍ່​ຂະຫຍາຍຕົວ ແລະ ເຂັ້ມແຂງ​ຮອບດ້ານຕອບ​ສະໜອງໄດ້​ຄວາມ​ຮຽກຮ້ອງ​ຕ້ອງການ​ໄລຍະ​ໃໝ່​ຂອງ​ພັກ-ລັດຖະບານ ວາງ​ອອກ ລັດ​ວິ​ສາ​ຫະ​ກິດ​ຖື​ຮຸ້ນລາວ ໄດ້​ມີ​ການ​ປັບປຸງ​ກົງຈັກການຈັດຕັ້ງ ເຊິ່ງ​ແຕ່ງຕັ້ງທ່ານ ມານະ​ສິນ ວົງ​ໄຊ ເປັນ​ຜູ້​ອຳນວຍ​ການ ​ລຮລ ຄົນ​ໃໝ່​ປ່ຽນແທນທ່ານ ສົມບູນ ມະໂນ​ລົມ ພາຍຫຼັງ​ທີ່​ຮັບ​ນະໂຍບາຍ​ບຳນານ​ຕາມ​ລະບຽບ​ການ.

ພິທີ​ມອບ-ຮັບ​ໜ້າທີ່​ຜູ້​ອຳນວຍການ ​ລຮລ ຜູ້​ເກົ່າ ແລະ ຜູ້​ໃໝ່ ຈັດ​ຂຶ້ນ​ວັນ​ທີ 11 ກໍລະກົດ 2017 ຢູ່​ທີ່​ຫ້ອງ​ປະຊຸມ​ໃຫຍ່ ​ລຮລ ເຂົ້າຮ່ວມ​ມີ​ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ​ພະລັງງານ ແລະ ບໍ່​ແຮ່ ທ່ານ​ນາງ ທິບ​ພະກອນ ຈັນທະ​ວົງສາ ຮອງ​ລັດ​ຖະມົນຕີ​ກະຊວງການ​ເງິນ ພ້ອມດ້ວຍ​ບັນດາ​ພະນັກງານ-ວິຊາການ ແລະ ຜູ້ຕາງໜ້າ​ຈາກ​ພາກສ່ວນ​ກ່ຽວຂ້ອງ ໂອກາດ​ນີ້ ທ່ານ ສົມບູນ ມະໂນ​ລົມ ໄດ້​ຜ່ານ​ບົດລາຍ​ງານ​ຫຍໍ້ ກ່ຽວ​ກັບ​ວຽກ​ງານພັກ ກໍ່​ຄືການ​ດຳເນີນ​ທຸລະ​ກິດຂອງ ​ລຮລ ຕະຫຼອດ​ໄລຍະ 11 ປີກວ່າ ພາຍຫຼັງ​ໄດ້​ຮັບ​ໜ້າທີ່​ເປັນຜູ້ອຳນວຍການ ​ລຮລ ແລະ ​ລຮລ ໄດ້​ຜ່ານ​ຜ່າ​ອຸປະສັກບັນຫາ​ນາໆປະການ ກ່ອນ​ທີ່​ຈະ​ເຕີບ​ໃຫຍ່​ເຂັ້ມແຂງ​ທັງ​ດ້ານ​ປະລິມານ-ຄຸ​ນະພາບ ປັດຈຸບັນ ​ລຮລ ມີ​ການຮ່ວມ​ດຳເນີນ​ທຸລະ​ກິດໃນ 4 ໂຄງການ​ໃຫຍ່ ແລະ ສຳຄັນ ເປັນຕົ້ນແມ່ນ​ເຂື່ອນ​ໄຟຟ້າ​ນ້ຳ​ເທີນ 2 ໂຮງງານ​ໄຟຟ້າ​ພະລັງງານຄວາມ​ຮ້ອນ​ຫົງ​ສາ ເຂື່ອນ​ໄຟຟ້າເຊ​ປຽນ ແລະ ເຂື່ອນ​ໄຟຟ້າ​ນ້ຳງຽບ ລວມ​ມູນ​ຄ່າ 400 ລ້ານກວ່າ​ໂດ​ລາ​ສະຫະລັດ ພ້ອມ​ນັ້ນ ​ລຮລ ຍັງ​ມີ​ຄວາມ​ເຂັ້ມແຂງ​ຮອບດ້ານ ວຽກ​ງານ​ການຈັດຕັ້ງ​ພັກ ອົງ​ການຈັດຕັ້ງ​ມະຫາຊົນ ອັນເຮັດ​ໃຫ້ ​ລຮລ ສາມາດ​ສ້າງໜ່ວຍ​ພັກ​ເຂັ້ມແຂງ​ຮູ້​ນຳພາ​ຮອບດ້ານ ເປັນ​ເວລາ 9 ປີ​ຊ້ອນ ຂະຫຍາຍ​ສະມາຊິກ​ພັກ ແລະ ພະນັກ​ງານຈາກ​ປີ 2005 ມີ​ພະນັກງານ​ພຽງ​ແຕ່ 13 ຄົນ ຮອດ​ປີ 2017 ເພີ່ມ​ຂຶ້ນ​ເປັນ 116 ຄົນ ໃນ​ນັ້ນ ມີ​ສະມາຊິກ​ພັກ 25 ສະຫາຍ/ຍິງ 4 ສະຫາຍ.

ຂ່າວທີ່ກ່ຽວຂ້ອງ