ປີນີ້ ນວ ຈະປ່ອຍປາຄືນສູ່ທຳມະຊາດ ໃຫ້ບັນລຸ 1 ລ້ານໂຕ

239 13 ກ.ກ. 2017 ຂ່າວໜ້າ​ໜຶ່ງ
ປີນີ້ ນວ ຈະປ່ອຍປາຄືນສູ່ທຳມະຊາດ ໃຫ້ບັນລຸ 1 ລ້ານໂຕ

ເນື່ອງ​ໃນ​ໂອກາດ​ວັນ​ປ່ອຍ​ປາ ແລະ ອະນຸ​ຮັກ​ສັດ​ນ້ຳ-ສັດປ່າແຫ່ງ​ຊາດ ວັນ​ທີ 13 ກໍລະກົດຂອງ​ທຸກໆ​ປີ ເຊິ່ງ​ວັນ​ດັ່ງກ່າວ​ເປັນວັນ​ສຳຄັນ​ລະດັບ​ຊາດ ສະນັ້ນ ຢູ່ຕາມ​ສຳນັກງານ​ອົງການ​ປະຊາຊົນ​ໃນ​ຂອບ​ເຂດ​ທົ່ວ​ປະເທດ ໄດ້ພ້ອມ​ກັນ​ສ້າງ​ຂະ​ບວນ​ການ​ປ່ອຍສັດ​ນ້ຳ ສັດປ່າຄືນ​ສູ່​ທຳ​ມະ​ຊາດ ເພື່ອ​ຄວາມ​ອຸດົມສົມບູນ​ຂອງ​ລະບົບ​ນິເວດ ປະກອບສ່ວນ​ຍົກ​ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ນັບ​ມື້​ນັບ​ດີ​ຂຶ້ນ ຈຳກັດ​ການຫຼຸດ​ລົງ ແລະ ສູນພັນ​ຂອງ​ສັດ​ນ້ຳ ແລະ ສັດປ່າ.

ທ່ານ ລິນ​ຄຳ ດວງ​ສະຫວັນ ຫົວໜ້າ​ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ (ນວ) ໃຫ້​ສຳພາດ​ວ່າ: ພະ​ແນກກະສິກຳ ແລະ ປ່າໄມ້ ນວ ໄດ້​ຖືເອົາ​ວຽກ​ງານ​ອະນຸ​ຮັກ​ສັດ​ນ້ຳສັດປ່າ ແລະ ຊີວະ​ນາໆພັນ​ເປັນວຽກ​ງານ​ສຳຄັນ ພ້ອມ​ດຽວ​ກັນນີ້ ກໍ່​ໄດ້​ກະກຽມ​ການ​ປ່ອຍ​ສັດ​ນ້ຳສັດປ່າ​ຄືນ​ສູ່​ທຳ​ມະ​ຊາດ ເຊິ່ງ​ເລີ່ມແຕ່​ຕົ້ນ​ປີ​ເປັນຕົ້ນ​ມາ ສຳລັບ​ປີ 2017 ຢູ່​ນະຄອນຫຼວງ​ວຽງ​ຈັນ ຈະ​ປ່ອຍ​ໃຫ້​ໄດ້ 1 ລ້ານ​ໂຕ ປະກອບ​ມີ: ປາ​ນິນ ປາປາກ ປາ​ກິນຫຍ້າ ແລະ ສັດປ່າ​ຈຳນວນ​ໜຶ່ງ ເຊິ່ງ​ຈະ​ແບ່ງ​ອອກ​ເປັນ 3 ຈຸດໃຫຍ່ຄື: ເມືອງ​ໄຊ​ທານີ ນາ​ຊາຍທອງ ແລະ ເມືອງ​ສີ​ສັດຕະ​ນາກ ຄາດ​ວ່າ​ລູກ​ປາ​ທີ່​ຈະ​ເອົາ​ມາ​ປ່ອຍໃນ​ແຕ່​ລະ​ຈຸດ​ປະມານ 1 ແສນ​ໂຕ ແລະ ສັດປ່າ​ຈຸດ​ລະ 5 ກົງ ນອກຈາກ​ນີ້ ຢູ່​ບັນດາ​ເມືອງ​ກໍ່​ມີ​ພິທີປ່ອຍ​ເຊັ່ນ​ດຽວ​ກັນ.

ນັບ​ແຕ່​ປີ 1994 ມາ​ຮອດ​ປີ 2016 ສາມາດ​ປ່ອຍ​ປາ ແລະ ສັດ​ນ້ຳ​ອື່ນໆ​ບັນລຸ​ໄດ້ 21.882.500 ໂຕ ດັ່ງນັ້ນ ເພື່ອເຮັດ​ໃຫ້​ສັດ​ນ້ຳ​ສັດປ່າ​ເພີ່ມ​ຂຶ້ນໃນແຕ່​ລະ​ປີ ​ຈິ່ງ​ຮຽກຮ້ອງ​ມາ​ຍັງ​ທຸກພາກສ່ວນ ກໍ່​ຄື​ປະຊາຊົນພະນັກງານ ທະຫານ ຕຳຫຼວດ ພໍ່ຄ້າ​ຊາວ​ຂາຍ​ຕ່າງໆ ຈົ່ງ​ເຫັນ​ໄດ້​ຄວາມ​ສຳຄັນ​ຂອງ​ວັນ​ດັ່ງກ່າວ ເປັນ​ເຈົ້າການ​ໃນ​ການ​ປ່ອຍ ແລະ ຄຸ້ມ​ຄອງກວດກາ ອະນຸ​ຮັກ ປົກ​ປັກ​ຮັກສາ ພັດທະນາ ແລະ ນຳ​ໃຊ້​ສັດ​ນ້ຳ ສັດປ່າແບບ​ຍືນ​ຍົງ​ຕະຫຼອດ​ໄປ.

ຂ່າວທີ່ກ່ຽວຂ້ອງ