ຄຄຊ ອະນຸມັດຮຸ້ນສາມັນພູສີກໍ່ສ້າງ ໃຫ້ສັງຄົມໄດ້ຈັບຈອງ

241 14 ກ.ກ. 2017 ຂ່າວໜ້າ​ໜຶ່ງ

ຄະນະ​ກຳມະການ​ຄຸ້ມ​ຄອງຫຼັກ​ຊັບ (​ຄຄຊ) ໄດ້​ອະນຸມັດ​ການສະເໜີ​ອອກ​ຈຳໜ່າຍ​ຮຸ້ນ​ສາມັນເພີ່ມ​ທຶນ (IPO) ຂອງ​ບໍລິສັດ ພູ​ສີກໍ່ສ້າງ ແລະ ພັດທະນາ ມະຫາຊົນ (PCD) ໃນ​ລາຄາ 1.200 ກີບ​ຕໍ່​ຮຸ້ນ ຈຳນວນ 90 ລ້ານ​ຮຸ້ນ ສ່ວນ​ອີກ 10 ລ້ານ​ຮຸ້ນ ແມ່ນ​ໃຫ້ກັບ​ຄະນະ​ບໍລິຫານ ແລະ ພະນັກງານ​ຂອງ​ບໍລິສັດ​ດັ່ງກ່າວ ຈະ​ມີການ​ເປີດ​ໃຫ້​ຈັບຈອງ​ຢ່າງ​ເປັນທາງ​ການ ນັບ​ແຕ່​ວັນ​ທີ 17-21 ກໍລະ​ກົດ​ນີ້.

ພິທີ​ຖະແຫຼງ​ຂ່າວ​ອະນຸມັດການ​ຈັດ​ຈຳໜ່າຍ​ຮຸ້ນ​ສາມັນເພີ່ມ​ທຶນ​ໃຫ້​ແກ່​ມວນ​ຊົນ ຄັ້ງ​ທຳອິດ (IPO) ຂອງ​ບໍລິສັດ ພູ​ສີ​ກໍ່ສ້າງ ແລະ ພັດທະນາມະຫາຊົນ (PCD) ແລະ ແຕ່ງຕັ້ງ​ຜູ້​ຄ້ຳ​ປະກັນ ແລະ ຕົວ​ແທນ​ການ​ຈັດ​ຈຳໜ່າຍ​ຈັດ​ຂຶ້ນ​ວັນ​ທີ 10 ກໍລະກົດ 2017 ທີ່​ໂຮງແຮມ​ດອນ​ຈັນ​ພາເລດ ໂດຍ​ການ​ເຂົ້າ​ຮ່ວມ​ຂອງທ່ານ ລ໊ອກ​ຢຸນ​ລີ ຮອງ​ຜູ້​ອຳນວຍການ​ຕະຫຼາດ​ຫຼັກ​ຊັບ​ລາວ ທ່ານ ສູນ​ທອນ ສິນ​ທະ​ປະເສີດ ຜູ້​ອຳນວຍ​ການ​ບໍລິສັດ ​ຫຼັກ​ຊັບ​ລ້ານຊ້າງ ​ມະຫາຊົນ ​ໃນ​ຖານະ​ຜູ້​ຄ້ຳ​ປະກັນ​ການ​ອອກ​ຈຳໜ່າຍ​ຮຸ້ນ ບໍ​ລິສັດ ​ຫຼັກ​ຊັບເອ​ພີ​ເອັມ​ລາວ ຈຳກັດ ທີ່​ປຶກສາ​ທາງ​ດ້ານ​ການ​ເງິນ ແລະ ພາກສ່ວນ​ທີ່​ກ່ຽວຂ້ອງ​ເຂົ້າຮ່ວມ.

ທ່ານ ສີ​ທອງ ພົມ​ມະ​ຈິດ ປະທານ​ສະພາ​ບໍລິຫານ ບໍລິສັດ PCD ທີ່​ເປັນ​ໜຶ່ງ​ໃນ​ຜູ້ນຳ​ການ ​ໃຫ້ບໍລິການ​ວຽກ​ງານ​ວິສະວະກຳການ​ກໍ່ສ້າງ​ແບບ​ຄົບ​ວົງ​ຈອນ ກ່າວ​ວ່າ: ພາຍຫຼັງ​ທີ່ ຄຄຊ ອະນຸມັດ​ຮຸ້ນ​ສາມັນ ຈຳນວນ 100 ລ້ານ​ຮຸ້ນ ໂດຍ​ຈະ​ແບ່ງ​ຂາຍ​ໃຫ້ກັບ​ມວນ​ຊົນ​ທົ່ວ​ໄປ ຈຳນວນ 90 ລ້ານ​ຮຸ້ນ​ລາຄາ​ສະເໜີ​ຈຳໜ່າຍ 1.200 ກີບ​ຕໍ່​ຮຸ້ນ ສ່ວນ​ອີກ 10 ລ້ານ​ຮຸ້ນ ຫຼື 10% ຂອງ​ຮຸ້ນ​ທີ່​ຈະຈຳໜ່າຍ​ຄັ້ງ​ນີ້ ​ແມ່ນ​ຈະ​ແບ່ງ​ໃຫ້ກັບ​ບຸກຄົນ​ພາຍ​ໃນ​ຂອງ​ບໍລິສັດ PCD ຄາດ​ວ່າ​ຈະ​ມີ​ການ​ເຂົ້າ​ຈົດທະບຽນ ແລະ ຊື້-ຂາຍໃນ​ຕະຫຼາດ​ຫຼັກ​ຊັບ​ໃນ​ທ້າຍ​ເດືອນ​ກໍ​ລະກົດ​ນີ້.

ປະທານ​ສະພາ​ບໍລິຫານ ບໍ​ລິສັດ PCD ເຊື່ອ​ໝັ້ນ​ວ່າ: ຮຸ້ນ​ຂອງ PCD ຈະ​ເປັນ​ທີ່​ສົນໃຈ​ຂອງ​ສັງຄົມ ແລະ ພ້ອມ​ຈະ​ກ້າວ​ໄປ​ກັບ​ຜູ້ຖື​ຮຸ້ນ​ຢ່າງ​ໝັ້ນຄົງ ແລະ ປອດ​ໃສຈຳນວນ​ເງິນ​ທີ່​ຄາດ​ວ່າ ຈະ​ໄດ້ຈາກ​ການ​ລະດົມ​ຄັ້ງ​ທຳ​ອິດ​ນີ້​ປະມານ 119 ຕື້​ກີບ ຈະ​ນຳໄປ​ສັ່ງ​ຊື້ເຄື່ອງ​ຈັກ​ທີ່​ທັນ​ສະໄໝ ແລະ ອຸປະກອນ​ສຳລັບ​ງານ​ກໍ່ສ້າງງານ​ຄົ້ນຄວ້າ​ວິໄຈ ແລະ ພັດທະນາ​ຊຳລະຄືນ​ເງິນ​ກູ້​ທະນາຄານ​ທີ່​ມີ​ຄວາມສ່ຽງ​ດ້ານ​ດອກ​ເບ້ຍ​ທີ່​ຂ້ອນ​ຂ້າງສູງ ສ່ວນ​ທີ່​ເຫຼືອ​ຫຼັງ​ຈາກ​ຫຼັກ​ຄ່າໃຊ້​ຈ່າຍ​ທັງ​ໝົດ​ແລ້ວ ປະມານ 50% ຂອງ​ມູນ​ຄ່າ​ຕົ້ນ​ທຶນ​ແມ່ນໄວ້​ເປັນ​ທຶນ​ໃນ​ການ​ກໍ່ສ້າງ ແລະ ບໍລິຫານ​ທົ່ວ​ໄປ.

ຂ່າວທີ່ກ່ຽວຂ້ອງ