ປທສ ຈັດແຂ່ງຂັນໄອຊີທີລາວ 2017

235 14 ກ.ກ. 2017 ຂ່າວໜ້າ​ໜຶ່ງ
ປທສ ຈັດແຂ່ງຂັນໄອຊີທີລາວ 2017

ກະຊວງໄປສະນີ ໂທລະ​ຄົມມະ​ນາ​ຄົມ ແລະ ການ​ສື່ສານ (​ປທສ) ຈັດ​ງານ​ແຂ່ງຂັນໄອ​ຊີ​ທີລາວ 2017 ຫຼື Lao ICT Award 2017 ຂຶ້ນ ໃນ​ວັນ​ທີ 12 ກໍລະກົດ 2017 ທີ່​ສູນ​ກີລາ​ໃນ​ຮົ່ມ ລາວ-ຍີ່ປຸ່ນ ໂດຍ​ມີ​ທ່ານ ບຸນ​ສະເຫຼີມ​ໄຊ ເຄນ​ນາ​ວົງ ຮອງ​ລັດຖະມົນຕີ​ກະຊວງ ​ປທສ ມີ​ບັນດາ​ກະຊວງ ອົງການ​ທຽບ​ເທົ່າ ບໍລິສັດ​ທາງ​ດ້ານໄອ​ຊີ​ທີ ທະນາຄານ​ ຫົວໜ່ວຍ​ທຸລະ​ກິດ ແລະ ສະ​ຖາ​ບັນ​ການ​ສຶກສາ​ຕ່າງໆ ແລະ ແຂກ​ຖືກ​ເຊີນ ເຂົ້າ​ຮ່ວມ.

ທ່ານ ບຸນ​ສະເຫຼີມ​ໄຊ ເຄນ​ນາວົງ ກ່າວ​ວ່າ: ການ​ຈັດ​ງານ​ແຂ່ງຂັນໄອ​ຊີ​ທີ​ລາວ 2017 ຄັ້ງ​ນີ້ ກໍ່ເປັນ​ແຜນ​ງານ​ໜຶ່ງ​ທີ່​ນອນ​ໃນແຜນ​ພັດທະນາ ຂະແໜງການ ​ປທສ ທີ່​ຄະນະ​ພັກ​ກະຊວງ ​ປທສ ກໍ່​ໄດ້​ໃຫ້​ບຸລິມະສິດ​ໃນ​ການ​ຈັດຕັ້ງ​ປະຕິບັດ ເນື່ອງ​ຈາກ​ເຫັນ​ໄດ້ຄວາມ​ສຳຄັນ​ຂອງ​ການ​ແຂ່ງຂັນດັ່ງກ່າວ ເຊິ່ງ​ມັນ​ບໍ່​ພຽງ​ແຕ່​ສົ່ງເສີມ​ການ​ແຂ່ງຂັນໃນ​ການ​ພັດທະ​ນາໄອ​ຊີ​ທີ ແຕ່​ມັນ​ຍັງ​ເປັນການ​ໃຫ້​ໂອກາດ​ແກ່​ນັກ​ພັດ​ທະນາໄອ​ຊີ​ທີຮຸ່ນ​ໃໝ່ ຫຼື ບໍລິສັດ​ໄອຊີ​ທີ​ລາຍ​ໃຫຍ່​ທີ່​ເອີ້ນ​ວ່າ: Start Up ໄດ້​ສ້າງ​ຊື່​ສຽງ ແລະ ຄວາມໜ້າ​ເຊື່ອ​ຖື​ໃຫ້​ແກ່​ສັງຄົມ​ລາວ ແລະ ກ້າວ​ໄປ​ສູ່​ລະດັບ​ສາກົນ.

ສຳລັບ​ການ​ແຂ່ງຂັນ​ຄັ້ງ​ນີ້ ມີຜູ້​ເຂົ້າ​ຮ່ວມທັງ​ໝົດ 10 ທີມ ແບ່ງອອກ​ເປັນ 6 ໝວດ​ຄື: ໝວດ​ກ່ຽວກັບ​ພາກ​ລັດ ໝວດ​ພາກ​ເອກະ​ຊົນ ໝວດ​ເພື່ອ​ສັງຄົມ ໝວດ​ເນື້ອ​ໃນດິ​ຈີ​ຕອນ ໝວດ​ບໍລິສັດ​ສ້າງຕັ້ງໃໝ່​ດ້ານ​ໄອ​ຊີ​ທີ ແລະ ໝວດ​ຄົ້ນຄວ້າ-ພັດທະນາ​ດ້ານ​ໄອ​ຊີ​ທີ ຜ່ານ​ການ​ແຂ່ງຂັນຊະນະ​ເລີດ ໄດ້ແກ່ທີມ Lao Autism Talbs (ສະມາຄົມ​ເພື່ອ​ຄົນ​ໂອ​ທິສ​ຕິກລາວ) ຮັບ​ໂລ້+ເງິນສົດ 8 ລ້ານກີບ+ຄອມ​ພິວ​ເຕີ​ໂນດ​ບຸກ 1 ເຄື່ອງ ຮອງ​ຊະນະ​ເລີດ​ທີມ Toh Lao Coworking Space and Service ຮັບ​ໂລ້+ເງິນສົດ 5 ລ້ານ​ກີບ+ໂທລະສັບ​ມື​ຖື 1 ເຄື່ອງ ແລະ ອັນ​ດັບ 3 ທີມ Bizgital Company ຮັບ​ໂລ້+ເງິນສົດ 4 ລ້ານ​ກີບ+ແທັບ​ເລັດ 1 ເຄື່ອງ ນອກຈາກ​ນີ້ຍັງ​ມີ​ລາງວັນ​ພິເສດໄດ້ແກ່​ທີມ Font Midmai ໄດ້​ຮັບເງິນສົດ 2 ລ້ານ​ກີບ ແລະ ລາງວັນ​ຊົມເຊີຍ​ທີມ​ລະ 1 ລ້ານ​ກີບ ມີ 3 ທີມ ໄດ້ແກ່​ທີມ Lao Navi ທີມ Lao PDR Trade Portal ແລະ ທີມ VaiVai.

ຂ່າວທີ່ກ່ຽວຂ້ອງ