ເສີມສ້າງການຮ່ວມມືແພດຊ່ວຍເຫຼືອມະນຸດສະທຳ ແລະ ບັນເທົາທຸກໄພພິບັດ

272 14 ກ.ກ. 2017 ຂ່າວໜ້າ​ໜຶ່ງ
ເສີມສ້າງການຮ່ວມມືແພດຊ່ວຍເຫຼືອມະນຸດສະທຳ ແລະ ບັນເທົາທຸກໄພພິບັດ

ກອງທັບ​ປະຊາຊົນ​ລາວ ​ໄດ້ຮັບ​ກຽດ​ເປັນ​ເຈົ້າພາບ​ຈັດ​ກອງ​ປະຊຸມ​ຫົວໜ້າ​ແພດ​ທະຫານ​ອາ​ຊຽນ​ ຄັ້ງ​ທີ 7 ແລະ ກອງ​ປະຊຸມ​ແລກປ່ຽນ​ແພດ​ທະຫານ​ໜຸ່ມ​ອາ​ຊຽນ ຂຶ້ນວັນ​ທີ 13 ກໍລະກົດ 2017 ທີ່ໂຮງແຮມ​ດອນ​ຈັນ​ພາ​ເລດ ນະຄອນ​ຫຼວງ​ວຽງ​ຈັນ ເປັນ​ປະທານຂອງ​ທ່ານ​ພັນ​ເອກ ​ດຣ. ບົວ​ສິງ ອິນ​ທະ​ວົງ ຫົວໜ້າ​ກົມ​ເສນາ​ຮັກ ກົມ​ໃຫຍ່​ພະລາທິການກອງທັບ ປະຊາຊົນ​ລາວ ເປັນ​ກຽດ​ເຂົ້າຮ່ວມ​ຂອງ​ທ່ານ ​ພົ.ຕ ຄຳ​ສີ ວົງຄຳ​ຊາວ ຫົວໜ້າ​ຫ້ອງ​ວ່າການ​ກະຊວງ​ປ້ອງ​ກັນ​ປະເທດ ທັງ​ເປັນ​ຫົວໜ້າ​ເຈົ້າ​ໜ້າທີ່​ອາວຸໂສ​ປ້ອງ​ກັນປະເທດ​ອາ​ຊຽນ​ຂອງ ​ສປປ ລາວ ມີ​ຫົວໜ້າ​ຄະນະ​ກົມ​ເສນາ​ຮັກ ແລະ ຕົວ​ແທນ​ແພດ​ທະຫານໜຸ່ມ​ຂອງ​ກອງທັບ​ບັນດາ​ປະເທດສະມາຊິກ​ອາ​ຊຽນ​ເຂົ້າ​ຮ່ວມ.

ກອງ​ປະຊຸມ​ໃນ​ຄັ້ງ​ນີ້ ໄດ້​ຈັດຂຶ້ນ​ພາຍ​ໃຕ້​ຄຳ​ຂວັນ “ເສີມ​ສ້າງການ​ຮ່ວມ​ມື​ການ​ແພດ​ທະຫານອາ​ຊຽນ ເພື່ອ​ການ​ຊ່ວຍເຫຼືອ​ມະນຸດ​ສະ​ທຳ ແລະ ບັນເທົາ​ທຸກ​ໄພພິບັດ” ຈຸດປະສົງ​ຕົ້ນຕໍ​ເພື່ອ​ແລກປ່ຽນ​ທັດສະນະ​ກ່ຽວ​ກັບ​ການ​ຮ່ວມ​ມື​ຂອງ​ແພດ​ທະຫານ​ອາ​ຊຽນ ​ໃນວຽກ​ງານ​ການ​ຊ່ວຍເຫຼືອ​ມະນຸດສະ​ທຳ ແລະ ບັນເທົາ​ທຸກ​ໄພພິບັດແລກປ່ຽນ​ຂໍ້​ມູນ-ຂ່າວສານ​ບົດຮຽນ​ປະສົບ​ການ ແລະ ພຶດຕິ​ກຳຕົວ​ຈິງ​ກ່ຽວ​ກັບ​ການ​ສຶກ​ສາ​ຄົ້ນຄວ້າ​ດ້ານ​ການ​ແພດ ​ທີ່​ມີ​ຜົນ​ກະທົບ​ຕໍ່​ກັບ​ວິຖີ​ການ​ດຳລົງ​ຊີວິດ ແລະ ສຸຂະພາບ​ຂອງ​ປະຊາຊົນໃນ​ພາກ​ພື້ນ.

ທ່ານ ​ພົ.ຕ ຄຳ​ສິງ ວົງ​ຄຳ​ຊາວ ໄດ້​ຍົກ​ໃຫ້​ເຫັນ​ເຖິງ​ສະພາບ​ການປ່ຽນແປງ​ດິນ​ຟ້າ​ອາກາດ ແລະ ເຫດການ​ໄພພິບັດ​ທາງ​ທຳ​ມະຊາດ​ທີ່​ເກີດ​ຂຶ້ນ​ໃນ​ພາກ​ພື້ນ ເຊິ່ງແຕ່​ລະ​ຄັ້ງ​ທີ່​ເກີດ​ຂຶ້ນ​ໄດ້​ສ້າງ​ຜົນກະທົບ​ຢ່າງ​ຫຼວງຫຼາຍ ​ບໍ່​ສະເພາະຕໍ່​ກັບ​ຊີວິດ ແລະ ຊັບ​ສິນ​ຂອງ​ປະຊາ​ຊົນ​ເທົ່າ​ນັ້ນ ແຕ່​ມັນ​ຍັງ​ເປັນການ​ກົດ​ໜ່ວງ​ທ່ວງ​ດຶງ ​ຈັງຫວະການ​ພັດທະນາ​ພື້ນຖານ​ໂຄງ​ລ່າງເສດຖະກິດ-ສັງຄົມ​ຂອງ​ຊາດ ແລະ ຂອງ​ພາກ​ພື້ນ​ນຳ​ອີກ ດ້ວຍເຫດ​ນັ້ນ ຈິ່ງ​ໄດ້​ຮຽກຮ້ອງ​ໃຫ້​ເຫຼົ່າຮົບ​ເສນາ​ຮັກ ເຊິ່ງ​ເປັນ​ເຫຼົ່າ​ຮົບໜຶ່ງ​ທີ່​ມີ​ບົດບາດ ແລະ ໜ້າທີ່​ສຳຄັນ​ໃນ​ການ​ຊ່ວຍເຫຼືອ​ມະນຸດ​ສະທຳ ແລະ ບັນເທົາ​ທຸກ​ໄພພິບັດ ແລະ ການ​ມີ​ສ່ວນ​ຮ່ວມ​ໂດຍກົງ​ໃນ​ການ​ຊ່ວຍເຫຼືອ​ດ້ານ​ຕ່າງໆ ໃຫ້​ແກ່​ຜູ້​ທີ່​ໄດ້​ຮັບ​ຜົນ​ກະທົບ​ຈາກໄພພິບັດ​ທັງ​ໃນ​ໄລຍະ​ເກີດ​ເຫດການ ແລະ ໄລຍະ​ຟື້ນ​ຟູ​ສະພາບ ຈົ່ງ​ເພີ່ມ​ທະວີ​ການ​ຮ່ວມ​ມື​ທາງດ້ານ​ການ​ແພດ​ທະຫານ​ຂອງ​ອາຊຽນ​ ໃຫ້​ນັບ​ມື້​ນັບ​ແໜ້ນ​ແຟ້ນ​ຂຶ້ນເລື້ອຍໆ ທັງ​ນີ້ ກໍ່​ເພື່ອ​ພ້ອມ​ກັນຮັບ​ມື​ກັບ​ເຫດ​ໄພພິບັດ​ທີ່​ອາດ​ຈະເກີດ​ຂຶ້ນ​ໃນ​ອະນາຄົດ​ໄດ້ ​ຢ່າງ​ມີ​ປະສິດທິ​ພາບ​ປະ​ສິດທິ​ຜົນ ແລະ ທັນເວລາ.

ສຳລັບ​ກອງ​ປະຊຸມ​ດັ່ງກ່າວ ຈະ​ໄດ້​ຈັດ​ຂຶ້ນ​ໃນ​ປີ​ຕໍ່​ໄປ​ໂດຍ​ປະເທດ​ສິງກະໂປ​ໄດ້​ຮັບ​ກຽດ​ເປັນເຈົ້າພາບ​ສືບຕໍ່​ຈາກ ​ສປປ ລາວ.

ຂ່າວທີ່ກ່ຽວຂ້ອງ