ຫຼາຍພາກສ່ວນຮ່ວມກັນປ່ອຍສັດນ້ຳ-ສັດປ່າຄືນສູ່ທຳມະຊາດ

318 14 ກ.ກ. 2017 ຂ່າວໜ້າ​ໜຶ່ງ
ຫຼາຍພາກສ່ວນຮ່ວມກັນປ່ອຍສັດນ້ຳ-ສັດປ່າຄືນສູ່ທຳມະຊາດ

ເນື່ອງ​ໃນ​ໂອກາດ​ວັນ​ປ່ອຍ​ປາ ແລະ ອະນຸ​ຮັກ​ສັດ​ນ້ຳ-ສັດປ່າແຫ່ງ​ຊາດ ວັນ​ທີ 13 ກໍລະກົດຂອງ​ທຸກໆ ເຊິ່ງ​ໄດ້​ກາຍເປັນ​ຂະບວນ​ການ​ທົ່ວ​ປວງ​ຊົນ ແລະ ຫຼາຍ​ພາກສ່ວນ​ໃນ​ສັງຄົມ​ ໄດ້​ປະກອບ​ສ່ວນ​​ຢ່າງ​ຕັ້ງໜ້າ​ເຂົ້າ​ໃນ​ວັນດັ່ງກ່າວ ທັງ​ນີ້ກໍ່​ເພື່ອ​ແນໃສ່​ໃຫ້ບັນລຸ​ເປົ້າ​ໝາຍ​ສູ້​ຊົນ​ຕ່າງໆ ປະກອບ​ສ່ວນ​ໃນ​ບັນດາ​ແຜນ​ງານ​ບຸລິ​ມະ​ສິດ​ຂອງ​ກະຊວງ​ກະສິກຳ ແລະ ປ່າໄມ້ ກໍ່​ຄືຂອງ​ລັດ​ຖະບານ​ ໃນ​ການ​ຄ້ຳປະກັນ​ສະບຽງອາຫານ ການ​ລຶບລ້າງ​ຄວາມທຸກຍາກ ສົ່ງເສີມ​ການ​ລ້ຽງ ການ​ອະນຸ​ຮັກ ປົກ​ປັກ​ຮັກສາພັດທະນາໃຫ້​ມີ​ຄວາມ​ຍືນ​ຍົງ ແລະ ເປັນການ​ປູກ​ຈິດ​ສຳນຶກ​ໃຫ້​ລູກ​ຫຼານອີກ​ດ້ວຍ.

ວັນ​ທີ 13 ກໍລະກົດ 2017 ທີ່ບ້ານ​ໄຮ່ ເມືອງ​ໄຊ​ທານີ ນະຄອນຫຼວງ​ວຽງ​ຈັນ (ສົ້ນ​ຂົວ​ທ່າ​ງ່ອນ) ກະຊວງ​ກະສິກຳ ແລະ ປ່າໄມ້ ຮ່ວມ​ກັບ​ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ ແລະ ເມືອງ​ໄຊ​ທານີ ຈັດ​ພິທີ​ປ່ອຍປາ ແລະ ອະນຸ​ຮັກ​ສັດ​ນ້ຳ-ສັດປ່າ ໂດຍ​ມີ​ພະ​ເຖລານຸເຖລະ ເປັນກຽດ​ເຂົ້າ​ຮ່ວມ​ຂອງ​ທ່ານ ບຸນ​ຍັງ ວໍລະ​ຈິດ ປະທານ​ປະເທດ ພ້ອມດ້ວຍ​ພັນ​ລະ​ຍາ ທ່ານ ລຽນ ທິ​ແກ້ວ ລັດຖະມົນຕີ​ກະຊວງ​ກະສິກຳ ແລະ ປ່າໄມ້ ມີ​ຮອງ​ລັດຖະມົນຕີ ຮອງ​ເຈົ້າ​ຄອງ ເຈົ້າເມືອງ ແລະ ຂະແໜງການ​ກ່ຽວຂ້ອງ.

ທ່ານ ພວງ​ປາ​ຣິ​ສັກ ປຣະ​ວົງວຽງ​ຄຳ ຮອງ​ລັດຖະມົນຕີ​ກະຊວງກະສິກຳ ແລະ ປ່າໄມ້ ກ່າວ​ວ່າ: ປັດຈຸບັນ ປະເທດ​ເຮົາ​ມີ​ສັດ​ນ້ຳ-ສັດປ່າ 150 ກວ່າ​ຊະນິດ ແລະ ມີ 100 ກວ່າ​ຊະນິດທີ່​ມີ​ຄວາມ​ສ່ຽງໃກ້​ຈະ​ສູນພັນ ​ເນື່ອງ​ຈາ​ກວ່າ​ຊັບພະຍາກອນ​ທຳ​ມະ​ຊາດ​ຖືກ​ທຳລາຍ ການ​ລ່າ​ສັດ​ດ້ວຍ​ເຄື່ອງມືທີ່​ທັນ​ສະໄໝ ແລະ ອື່ນໆ ນັບ​ແຕ່ປີ 1994 ເປັນຕົ້ນ​ມາ ຂະ​ບວນການ​ປ່ອຍ​ປາ​ນັບ​ປີ​ນັບ​ເພີ່ມ​ຂຶ້ນ​ສະແດງ​ອອກ ໃນ​ປີ 2015 ທົ່ວ​ປະເທດ​ສາມາດ​ປ່ອຍ​ປາ​ໄດ້​ທັງ​ໝົດ 35 ລ້ານ​ໂຕ ປີ 2016 ປ່ອຍ​ໄດ້ 40 ລ້ານ​ໂຕ ແລະ ປີ 2017 ໃຫ້ບັນລຸ​ໄດ້​ຫຼາຍ​ກວ່າ 40 ລ້ານ​ໂຕ ສຳລັບ​ຢູ່​ນະຄອນຫຼວງ​ວຽງ​ຈັນ​ປີ​ນີ້ ​ຈະ​ໃຫ້​ບັນລຸ​ໄດ້ 1 ລ້ານ​ໂຕ ໃນ​ນີ້ ປ່ອຍ​ໃນ​ຈຸດ​ນີ້ ປະມານ 1 ແສນກວ່າ​ໂຕ ປະກອບ​ມີປາ​ນິນ ປາປາກ ປາ​ກິນ​ຫຍ້າ ກຸ້ງ ແລະ ອື່ນໆ ພ້ອມ​ນີ້ກໍ່​ໄດ້​ປ່ອຍ​ສັດປ່າຄືນ​ສູ່​ທຳ​ມະ​ຊາດ​ອີກ​ດ້ວຍ.

ວັນ​ດຽວ​ກັນ ທີ່​ທ່າເຮືອ​ຫຼັກ 4 ເມືອງ​ສີ​ສັດຕະ​ນາກ ນະຄອນຫຼວງ​ວຽງ​ຈັນ ທ່ານ ທອງ​ລຸນ ສີ​ສຸລິດ ນາຍົກລັດຖະມົນຕີ ພ້ອມດ້ວຍ​ທ່ານ​ຮອງ​ລັດຖະມົນຕີ ກະຊວງ​ກະສິກຳ-ປ່າໄມ້ ທ່ານ​ຮອງເຈົ້າ​ຄອງ ນວ ບັນດາ​ທ່ານ​ເຈົ້າເມືອງ ຮອງ​ເຈົ້າເມືອງ ຕາງໜ້າຈາກ​ພະແນກການ ເຖົ້າ​ແກ່​ແນວໂຮມ ອົງ​ການຈັດຕັ້ງ​ມະຫາຊົນ ແລະ ຫຼານ​ນ້ອຍ​ນັກຮຽນ ພ້ອມກັນ​ປ່ອຍ​ປາ​ລົງ​ສູ່​ທຳ​ມະ​ຊາດ​ຈຳນວນ​ແສນ​ກວ່າ​ໂຕ ແລະ ນົກ ອີກຈຳນວນ​ໜຶ່ງ.

ນອກຈາກ​ນີ້ ໃນ​ວັນ​ດຽວ​ກັນ​ນີ້ ກະຊວງ​ກະສິກຳ ແລະ ປ່າໄມ້ ຮ່ວມ​ກັບ​ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ ໄດ້ຈັດ​ພິທີ​ປ່ອຍສັດ​ນ້ຳ-ສັດປ່າ​ຂຶ້ນ​ເຊັ່ນ​ດຽວ​ກັນ ຢູ່​ທີ່​ອ່າງ​ນ້ຳ​ຊວງ ບ້ານ​ສີວິໄລ ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ເປັນ​ກຽດ​ເຂົ້າ​ຮ່ວມມີ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ທ່ານ ບຸນຂວາງ ຄຳ​ບຸນ​ເຮືອງ ຮອງ​ລັດ​ຖະມົນຕີ​ກະຊວງ​ກະສິກຳ ແລະ ປ່າໄມ້ ພ້ອມ​ດ້ວຍ​ຜູ້ຕາງໜ້າ​ຈາກ​ກະຊວງ ພະແນກການເມືອງ ແລະ ບ້ານ​ເຂົ້າ​ຮ່ວມ.

ສຳລັບ​ການ​ປ່ອຍ​ສັດ​ນ້ຳ-ສັດປ່າ​ຢູ່​ທີ່​ອ່າງ​ນ້ຳ​ຊວງ​ຄັ້ງ​ນີ້ ມີ​ປາທັງ​ໝົດ 176.000 ໂຕ ກົບ​ນ້ອຍ 10 ພັນ​ໂຕ ແລະ ນົກ 10 ໂຕ ນັບແຕ່​ປີ 2002 ເຖິງ​ປີ 2017 ທົ່ວເມືອງ​ນາ​ຊາຍ​ທອງ ສາມາດປ່ອຍ​ປາ​ໄດ້​ທັງ​ໝົດ 6.190.000 ກວ່າ​ໂຕ.

ຂ່າວ​ແຈ້ງ​ຕື່ມ: ໃນ​ວັນ​ດຽວ​ກັນ ຫ້ອງການ​ກະສິກຳ ແລະ ປ່າໄມ້ ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ ຮ່ວມ​ກັບ​ບໍລິສັດຕ່າງໆ ແລະ ອົງການ​ປົກຄອງບ້ານ​ສີ​ຖານ​ໃຕ້ ຈັດ​ພິທີ​ປ່ອຍ​ປາ ຈຳນວນ 30 ພັນ​ໂຕ ຄືນ​ສູ່​ທຳ​ມະຊາດ ໃນ​ວັນ​ປ່ອຍ​ປາ​ແຫ່ງ​ຊາດ 13 ກໍລະກົດ 2017 ທີ່​ໜອງ​ຄຳແສນ ເພື່ອ​ສ້າງ​ຄວາມ​ອຸດົມ​ສົມບູນ​ທາງ​ດ້ານ​ຊີວະ​ນາໆພັນ​ໃຫ້ກັບ​ລະບົບ​ນິເວດ ແລະ ເປັນ​ການປູກ​ຈິດ​ສຳນຶກ​ຊຸກຍູ້​ສົ່ງເສີມ​ໃຫ້​ມີການ​ອະນຸ​ຮັກ​ຮັກສາ​ສັດ​ນ້ຳ-ສັດປ່າ​ໄວ້​ໃຫ້​ຢ່າງ​ໝັ້ນຄົງ​ຕະຫຼອດ​ໄປ ມີ​ທ່ານ ແກ່ນ ວໍລະ​ສານ ຮອງເຈົ້າເມືອງ​ຫາດ​ຊາຍ​ຟອງ ພ້ອມດ້ວຍ​ການ​ນຳ​ເມືອງ ຄະນະ ​ສສ ນວ ນັກທຸລະກິດ ພະນັກງານ ແລະ ປະຊາຊົນ​ເຂົ້າ​ຮ່ວມ.

ຂ່າວ​ໃຫ້​ຮູ້​ອີ​ກວ່າ: ໃນ​ວັນ​ທີ 13 ກໍລະກົດ 2017 ຫ້ອງການ​ກະ​ສິກຳ ແລະ ປ່າໄມ້ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ໄດ້ຈັດ​ພິທີ​ສ້າງ​ຂະ​ບວນ​ການ​ປ່ອຍປາ​ລົງ​ສູ່​ແມ່ນ້ຳ​ຂອງ ຈຳນວນ 50 ພັນ​ໂຕ ທີ່​ບ້ານ​ອ່າງ​ໃຫຍ່ ໃຫ້​ກຽດເຂົ້າ​ຮ່ວມ​ຂອງ​ທ່ານ ບົວ​ໄລ ສີ​ພາຄຳ ຮອງ​ເຈົ້າເມືອງ​ສີ​ໂຄດ​ຕະບອງ ມີ​ບັນດາ​ຄະນະ​ນຳ​ເມືອງ ຫົວໜ້າ​ຫ້ອງການ ພ້ອມ​ດ້ວຍ​ພະນັກ​ງານ ນາຍບ້ານ ນັກ​ທຸ​​ລະ​ກິດ ຕະຫຼອດ​ຮອດ​ພໍ່​ແມ່​ປະຊາຊົນ ແລະ ແຂກ​ຖືກ​ເຊີນ.

ເພື່ອ​ຊຸກຍູ້​ການ​ລ້ຽງ ການຂະຫຍາຍ​ພັນ ແລະ ການ​ນຳ​ໃຊ້ປາ ແລະ ສັດ​ນ້ຳໃຫ້​ຄວາມ​ຍືນຍົງ ໂດຍ​ບໍ່​ໃຫ້​ມີ​ຜົນ​ກະທົບ​ຕໍ່​ທຳມະ​ຊາດ ຖິ່ນ​ທີ່ຢູ່​ອາໄສ ຈຳກັດ ການ​ຫຼຸດ​ລົງ ແລະ ການ​ສູນພັນຂອງ​ປາ ແລະ ສັດ​ນ້ຳ ພ້ອມ​ທັງປຸກລະດົມ​ທົ່ວ​ປວງ​ຊົນ​ໃຫ້​ເຫັນ​ໄດ້ຄວາມ​ສຳຄັນ ປາ​ທີ່​ນຳ​ມາ​ປ່ອຍລົງ​ສູ່​ແມ່ນ້ຳ​ຂອງ​ຄັ້ງ​ນີ້ ປະກອບມີ ປາໄນ ປາ​ນິນ ປາປາກ ປາ​ສະກາງ ປາ​ເກັດ​ແລບ ປາດຸກ ປາແກງ ແລະ ປາ​ຊະນິດ​ອື່ນໆ​ອີກຈຳນວນ​ໜຶ່ງ.

ຂ່າວທີ່ກ່ຽວຂ້ອງ