ການເກີດອັກຄີໄພຢູ່ ນວ ມີທ່າອ່ຽງເພີ່ມຂຶ້ນ

172 17 ກ.ກ. 2017 ຂ່າວໜ້າ​ໜຶ່ງ

ໄລຍະ 6 ເດືອນ​ຜ່ານ​ມາ ທົ່ວນະຄອນຫຼວງ​ວຽງ​ຈັນ ມີ​ອັກຄີ​ໄພເກີດ​ຂຶ້ນ​ຫຼາຍ​ກວ່າ 50 ຄັ້ງ ເມື່ອທຽບໃສ່​ໄລຍະ​ດຽວ​ກັນ​ຂອງ​ປີຜ່ານ​ມາ ແມ່ນ​ເພີ່ມ​ຂຶ້ນ​ຫຼາຍ​ກວ່າ 10 ຄັ້ງ ສ້າງ​ຜົນ​ເສຍ​ຫາຍ​ມີ​ເຮືອນ 17 ຫຼັງ ເຮືອນ​ຖຶກ​ໄຟ​ລວບ 4 ຫຼັງ ຫ້ອງ​ແຖວ​ໃຫ້​ເຊົ່າ 1 ຫຼັງ​ມີ 6 ຫ້ອງ ຮ້ານ​ອາຫານ 1 ຫຼັງ ຕະຫຼາດ 1 ແຫ່ງ ມີ 158 ຫ້ອງ​ຂາຍ ໂຮງສີ 1 ຫຼັງ ແລະ ອື່ນໆ ມີ​ຄົນໄດ້​ຮັບ​ບາດເຈັບ 6 ຄົນ ແລະ ເສຍ​ຊີວິດ 1 ຄົນ ມູນ​ຄ່າ​ເສຍ​ຫາຍ ປະມານ 377 ຕື້​ກີບ ສາເຫດສ່ວນ​ໃຫຍ່​ແມ່ນ​ເກີດ​ຈາກ​ໄຟຟ້າລັດ​ວົງ​ຈອນ ຂາດ​ສະຕິ​ໃນ​ການຊົມໃຊ້​ຟືນ​ໄຟ ເປັນຕົ້ນ ການ​ໃຕ້ທູບ​ທຽນ​ບູຊາ ແຕ່ງ​ຢູ່​ຄົວກິນ ແລະ ອື່ນໆ.

ອີງ​ຕາມ​ຂໍ້​ມູນ​ພະ​ແນກ​ຕຳຫຼວດ​ປ້ອງ​ກັນ​ສະກັດ​ກັ້ນ ແລະ ຕ້ານ​ອັກຄີ​ໄພ ນະຄອນຫຼວງ​ວຽງຈັນ ໃຫ້​ຮູ້​ວ່າ: ປັດຈຸບັນ ການ​ເກີດອັກຄີ​ໄພຢູ່​ນະຄອນຫຼວງ​ວຽງ​ຈັນ ມີ​ທ່າ​ອ່ຽງ​ເພີ່ມ​ຂຶ້ນ ໂດຍ​ສະເພາະແມ່ນ​ຢູ່​ເຂດ​ຊຸມ​ຊົນ​ແອ​ອັດ ຂະນະດຽວ​ກັນ​ການ​ປ້ອງ​ກັນ ແລະ ສະກັດ​ກັ້ນ​ບັນຫາ​ອັກຄີ​ໄພ​ຂອງ​ສັງຄົມ ຍັງ​ເຮັດ​ບໍ່​ທັນ​ໄດ້​ດີ ຍ້ອນ​ການລົງ​ໂຄສະນາ​ຕ້ານ​ອັກຄີ​ໄພ​ຍັງ​ບໍ່ທົ່ວ​ເຖິງ ໂດຍ​ສະເພາະຢູ່​ຕະຫຼາດ ໂຮງ​ຈັກ-ໂຮງງານ ແລະ ບ່ອນຊຸມ​ຊົນ ແລະ ການ​ແກ້​ໄຂ​ອັກຄີໄພ​ທີ່​ເກີດ​ຂຶ້ນ​ໃນ​ບາງ​ຈຸດ​ຍັງ​ຊັກຊ້າ​ບໍ່​ທ່ວງ​ທັນ​ກັບ​ເຫດການ ແນວໃດ​ກໍ່​ດີ ໃນຕໍ່ໜ້າ​ນີ້​ເຈົ້າ​ໜ້າທີ່​ຕຳຫຼວດ​ປ້ອງ​ກັນ​ສະກັດ​ກັ້ນ ແລະ ຕ້ານ​ອັກຄີ​ໄພ​ຈະ​ສຸມ​ໃສ່​ການ​ໂຄສະ​ນາ​ໃຫ້​ສັງຄົມ​ໄດ້​ຮັບ​ຮູ້ ແລະ ນຳ​ໃຊ້​ວິທີ​ມອດ​ໄຟ​ຢ່າງ​ຖືກຕ້ອງ ພ້ອມ​ທັງ​ລົງ​ກວດກາ ແລະ ຊຸກຍູ້​ໃຫ້​ບັນດາ​ສຳນັກງານ​ຫ້ອງການ ແລະ ສະຖານທີ່​ມີ​ຄວາມ​ສ່ຽງ​ເກີດອັກຄີ​ໄພ​ໄດ້​ງ່າຍ ເປັນຕົ້ນ ຊຸມ​ຊົນແອ​ອັດ ຕະຫຼາດ ແລະ ປ້ຳນ້ຳມັນ ​ຕ້ອງ​ໃຫ້​ມີ​ບັ້ງ​ມອດ​ໄຟ ຫຼື ລະບົບດັບ​ເພິງ​ທີ່​ດີ ເພື່ອ​ສາມາດ​ດັບ​ມອດໄຟ​ໄດ້​ທັນ​ເວລາ.

ຂ່າວທີ່ກ່ຽວຂ້ອງ