ຊີ້ນສົດລາວ ເນັ້ນຜະລິດຕະພັນທີ່ມີຄຸນະພາບ ແຕ່ລາຄາບໍ່ແພງ

142 17 ກ.ກ. 2017 ຂ່າວໜ້າ​ໜຶ່ງ
ຊີ້ນສົດລາວ ເນັ້ນຜະລິດຕະພັນທີ່ມີຄຸນະພາບ ແຕ່ລາຄາບໍ່ແພງ

ບໍລິສັດ ຊີ້ນ​ສົດ​ລາວ ຈຳກັດ ທີ່​ຕັ້ງ​ຢູ່​ຖະໜົນ​ສາມ​ແສນ​ໄທ ບ້ານ​ຊຽງ​ຍືນ ເມືອງ​ຈັນທະ​ບູ​ລີ ນະຄອນຫຼວງ​ວຽງ​ຈັນ ເປັນ​ບໍ​ລິສັດ​ດຳເນີນ​ທຸລະ​ກິດ​ສະໜອງຜະລິດ​ຕະ​ພັນ​ຊີ້ນ​ໝູ​ທີ່​ມີ​ຄຸນະພາບ ຈາກ​ຟາມ​ຂອງ​ຕົນ​ເອງ​ໃຫ້​ແກ່​ຜູ້​ບໍລິ​ໂພກ ພາຍ​ໃນ​ນະຄອນຫຼວງວຽງ​ຈັນ ແລະ ຕ່າງ​ແຂວງ ຜ່ານ​ການ​ດຳເນີນ​ທຸລະ​ກິດ​ມາ​ໄດ້ເກືອບ​ປີ​ເລີ່ມ​ເປັນ​ທີ່​ຮູ້ຈັກ​ຂອງ​ລູກຄ້າ ແລະ ສັງຄົມ.

ທ່ານ ເຊີຣ໌ຈ ເຊລບ໌ ຜູ້​ອຳນວຍ​ການ​ບໍລິສັດ ຊີ້ນ​ສົດ​ລາວ ຈຳກັດ ໄດ້​ໃຫ້​ສຳພາດ​ວ່າ: ບໍ​ລິສັດ ​ຊີ້ນ​ສົດ​ລາວ ລິ​ເລີ່ມ​ເຂົ້າຈາກ​ຄວາມ​ຕ້ອງການ ​ທີ່​ຈະ​ນຳ​ສະໜອງ​ຜະລິດ​ຕະ​ພັນ​ຈາກ​ຊີ້ນ​ທີ່​ໄດ້ຄຸນະພາບ​ລະດັບ​ໂລກ ແລະ ຜະລິດ​ຕະ​ພັນ​ຊີ້ນ​ຈາກ​ພາຍ​ໃນ​ປະເທດ ສູ່​ຜູ້​ບໍລິໂພກ ໂດຍ​ກຳ​ມະ​ວິທີການ​ຜະລິດ​ທີ່​ທັນ​ສະໄໝ​ຢູ່​ພາຍໃນ​ປະເທດ​ລາວ ພວກ​ເຮົາ​ມຸ່ງຫວັງ​ທີ່​ຈະ​ເປັນ​ຜູ້​ທຳ​ອິດ​ທີ່​ນຳ​ສົ່ງຊີ້ນ​ສົດ​ຈາກ​ຟາມ​ຂອງ​ພວກ​ເຮົາ ເຖິງ​ຜູ້​ບໍລິໂພກ​ໂດຍ​ກົງ ສັດລ້ຽງໃນ​ຟາມ​ລວມ​ທັງ​ອາຫານ​ທີ່​ໃຊ້ລ້ຽງສັດ​ແມ່ນ​ລ້ວນ​ແຕ່​ຜະລິດ ແລະ ປຸງ​ແຕ່ງ 100% ຢູ່​ພາຍ​ໃນເອງ ນອກ​ນີ້​ບໍລິສັດ​ຍັງ​ມີ​ໂຮງງານຂ້າ​ສັດ​ທີ່​ໄດ້​ມາດຕະຖານ​ສາກົນເປັນ​ຂອງ​ຕົນ​ເອງ ໂດຍ​ລວມ​ແລ້ວ ຊີ້ນ​ໝູ​ທີ່​ບໍລິສັດ​ຈຳໜ່າຍ​ທຸກ​ວັນນີ້ ແມ່ນ​ມາ​ຈາກ​ຟາມ​ຂອງ​ຕົນເອງ ແລະ ມາ​ຂ້າ​ຢູ່​ໂຮງງານ​ຂ້າສັດ​ຂອງ​ຕົນ​ເອງ ເຊິ່ງ​ໂຮງງານຂ້າ​ສັດ​ແມ່ນ​ມີ​ຄວາມ​ທັນ​ສະໄໝ ມີ​ຄວາມ​ສະອາດ ແລະ ມີ​ແພດປະຈຳ ເພື່ອ​ໃຫ້​ໄດ້​ຊີ້ນ​ທີ່​ປອດ​ໄພຈາກ​ເຊື້ອ​ພະຍາດ​ ສະໜອງ​ໃຫ້​ຜູ້ບໍລິໂພກ.

ປັດຈຸບັນ ບໍລິສັດ​ໄດ້​ມີ​ຜະລິດຕະ​ພັນ​ທີ່​ມາ​ຈາກ​ຊີ້ນ​ໝູ ຫຼາຍກວ່າ 100 ຜະລິດ​ຕະ​ພັນ ແລະ ຊິ້ນ​ສ່ວນ​ຊີ້ນ​ໝູ​ໄດ້​ມາ​ໃສ່​ຖົງ ແລ້ວ​ເກັບ​ມ້ຽນ​ໄວ້​ຕູ້ເຢັນ​ທີ່​ມີຄວາມ​ເຢັນ 1 ອົງສາ ເພື່ອ​ຮັກສາຄວາມ​ແຊບ​ຂອງ​ຊີ້ນ ສ່ວນ​ລາຄາແມ່ນ​ບໍ່​ແພງ​ເທົ່າ​ກັບ​ລາຄາ​ຊີ້ນ​ໝູຕາມ​ຕະຫຼາດ​ທົ່ວ​ໄປ ແຕ່​ສິ່ງ​ທີ່ສຳຄັນ​ໄດ້​ປຽບ​ກໍ່​ແມ່ນ​ຄວາມ​ສະອາດ.

ທ່ານ​ຜູ້ອຳນວຍການ​ບໍລິສັດ ຍັງ​ກ່າວ​ຕື່ມ​ວ່າ: ເພື່ອ​ໃຫ້​ເປັນ​ທີ່ຮູ້ຈັກ​ຂອງ​ຜູ້​ບໍລິໂພກ​ຜະລິດ​ຕະ​ພັນຊີ້ນ​ໝູ​ຂອງ​ບໍລິສັດ​ນັບ​ມື້​ຫຼາຍ​ຂຶ້ນນັ້ນ ໃນຕໍ່ໜ້າ​ບໍລິສັດ​ມີ​ແຜນ​ຂະຫຍາຍ​ຈຸດ​ຂາຍ​ຢູ່​ຕາມ​ຕະຫຼາດແຫ່ງ​ຕ່າງໆ ​ພາຍ​ໃນ​ນະຄອນຫຼວງວຽງ​ຈັນ ພ້ອມ​ທັງ​ເນັ້ນ​ຜະລິດ​ຕະພັນ​ຕ້ອງ​ມີ​ຄຸນະພາບ ສາມາດແຂ່ງຂັນ​ກັບ​ຜູ້​ຜະລິດ​ໃນ​ພາກ​ພື້ນ ແລະ ເປັນ​ທີ່​ຍອມຮັບ​ຂອງ​ຜູ້​ບໍ​ລິໂພກ.

ຂ່າວທີ່ກ່ຽວຂ້ອງ