ອາ​ເຊ​ນອນ ຊະ­ນະ​ເລີດ ເອ​ມິ​ເຣດ ຄັບ ສະ­ໄໝ​ທີ 5

149 01 ສ.ຫ. 2017 ວົງຈອນກີລາ
ອາ​ເຊ​ນອນ ຊະ­ນະ​ເລີດ ເອ​ມິ​ເຣດ ຄັບ ສະ­ໄໝ​ທີ 5

ການ​ແຂ່ງ­ຂັນ​ເຕະ­ບານ​ລາຍ­ການ​ພິ­ເສດ ເອ​ມິ​ເຣດ ຄັບ ທີ່​ສະໜາມ​ເອ​ມິ​ເຣດ ນະ­ຄອນ­ຫຼວງ​ລອນ​ດອນ ປະ­ເທດ​ອັງ­ກິດ ເມື່ອ​ວັນ​ທີ 30 ກໍ­ລະ­ກົດ​ທີ່​ຜ່ານ​ມາ ອາ​ເຊ​ນອນ ທີມ​ເຈົ້າ­ພາບ ເສຍ­ທ່າ​ຕໍ່ ເຊ​ບີ​ຢ່າ ຈາກ ແອັດ​ສະ​ປາຍ 1-2 ເຊິ່ງ​ເກມ​ນີ້ ເຊບີ​ຢ່າ ໄດ້​ປະ­ຕູ​ຈາກ ໂຢ​ອາກ​ນິ ຄໍ​ເຣ​ອາ ນາ­ທີ 49 ແລະ ສະ­ຕີ​ເວ່ນ ເອັນ​ຊອນ​ຊີ່ ນາ­ທີ 69 ສ່ວນ​ເຈົ້າ­ພາບ​ໄດ້​ຈາກ ອະ​ເລັກຊອງ ລາ​ກາ​ແຊດ ນາ­ທີ 62.

ຜົນ​ອີກ​ຄູ່ ໄລ​ຊິກ ຈາກ​ເຢຍ​ລະ​ມັນ ເອົາ​ຊະ­ນະ ເບນ​ຟີ​ກາ ຈາກ​ປອກ​ຕຸຍ​ການ 2-0 ໄດ້​ປະ­ຕູ​ຈາກ ມາ​ເຊວ ຮັນ​ເທນ​ເບີກ ນາ­ທີ 19 ແລະ ມາ​ວິນ ຄອມ​ເປີ ນາ­ທີ 53.

ຈາກ​ຜົນ​ດັ່ງ­ກ່າວ ເຮັດ​ໃຫ້​ອາ​ເຊ​ນອນ ທີ່​ຊະ­ນະ 1 ເສຍ 1 ຍິງ​ໄດ້ 6 ປະ­ຕູ ແລະ ເຊ​ບີ​ຢ່າ ທີ່​ຊະ­ນະ 2 ຍິງ​ໄດ້ 3 ປະ­ຕູ ຕ່າງມີ 9 ຄະ­ແນນ​ເທົ່າ​ກັນ ແຖມ​ທັງ​ຄູ່​ຍັງ​ມີ​ປະ­ຕູ​ໄດ້​ເສຍ​ບວກ 2 ລູກ​ເທົ່າ​ກັນ ແຕ່​ອາ​ເຊ​ນອນ ໄດ້​ຄອງ​ຊະ­ນະ​ເລີດ​ເພາະ​ປະ­ຕູ​ໄດ້​ຫຼາຍ​ກວ່າ ນັບ​ວ່າ​ເປັນ​ຊະ­ນະ​ເລີດ​ລາຍ­ການ​ນີ້​ສະ­ໄໝ​ທີ 5 ຂອງ​ທີມ​ອາ​ເຊ​ນອນ ​ອີກ​ດ້ວຍ.

ສ່ວນ​ອັນ​ດັບ 3 ເປັນ ໄລ​ຊິກ 5 ຄະ­ແນນ ຈາກ​ການ​ຊະ­ນະ 1 ເສຍ 1 ຍິງ​ໄດ້ 2 ປະ­ຕູ ອັນ​ດັບ 4 ເບນ​ຟິ​ກາ ເສຍ 2 ນັດຊ້ອນ ຍິງ​ໄດ້ 2 ປະ­ຕູ ມີ​ຢູ່​ພຽງ 2 ຄະ­ແນນ.

ຂ່າວທີ່ກ່ຽວຂ້ອງ