ຈີນ ເປີດຕົວເຮືອບິນ J-20 ແລະ J-16 ທີ່ທັນສະໄໝ

67 01 ສ.ຫ. 2017 ຂ່າວຕ່າງປະເທດ
ຈີນ ເປີດຕົວເຮືອບິນ J-20 ແລະ J-16 ທີ່ທັນສະໄໝ

ສື່ສານແຫ່ງລັດຈີນ ລາຍງານວ່າ ປະເທດນີ້ໄດ້ເປີດຕົວເຮືອບິນສູ້ຮົບພາຍໃນປະເທດຢ່າງເປັນທາງການ 2 ລຸ້ນທີ່ທັນສະໄໝທີ່ສຸດ ຄື J-20 ແລະ J-16 ຊຶ່ງມີຂຶ້ນໃນພິທີສວນສະໜາມຂະໜາດໃຫຍ່ ເພື່ອຄໍານັບຊົມເຊີຍວັນສ້າງຕັ້ງກອງທັບປົດປ່ອຍປະຊາຊົນ (PLA) ຄົບຮອບ 90 ປີ ເມື່ອວັນທີ 30 ກໍລະກົດທີ່ຜ່ານມາ ຢູ່ທີ່ຖານທີ່ໝັ້ນການເຝິກຊ້ອມແຫ່ງໜຶ່ງໃນເຂດມົງໂກນ.
ຂ່າວສານຊິນຮວາ ໃຫ້ຮູ້ວ່າ J-20 ເປັນເຮືອບິນສູ້ຮົບທີ່ບິນໄວກວ່າສຽງ ດ້ວຍໄລຍະບິນປານກາງ ແລະ ຂະໜາດໄກເປັນລຸ້ນທີ 4 ທີ່ຈີນຄົ້ນຄວ້າ ແລະ ຜະລິດເອງ ສ່ວນ J-16 ເປັນເຮືອບິນສູ້ຮົບທີ່ໃຊ້ໄດ້ຫຼາຍປະໂຫຍດ ມີ 2 ເຄື່ອງຈັກ ແລະ 2 ທີ່ນັ່ງ ສາມາດໂຈມຕີຈາກອາກາດສູ່ອາກາດ ແລະ ຈາກອາກາດສູ່ກຳປັ່ນ ທີ່ຢູ່ໄກກວ່າທັດສະນະວິໄສ.
ໃນພິທີສວນສະໜາມດັ່ງກ່າວ ຈີນຍັງໄດ້ເປີດຕົວຢ່າງເປັນທາງການກັບເຮືອບິນຂົນສົ່ງຂະໜາດໜັກ Y-20 ຊຶ່ງບິນໄດ້ຂະໜາດໄກ ໂດຍມີນ້ຳໜັກສູງສຸດໃນເວລາບິນຂຶ້ນ ຢູ່ທີ່ 200 ໂຕນ ໄດ້ຮັບການອອກແບບເພື່ອຂົນສົ່ງສິນຄ້າ ແລະ ຜູ້ໂດຍສານ ພ້ອມກັນນັ້ນ ກໍສາມາດເຄື່ອນໄຫວໄດ້ຢູ່ໃນສະພາບອາກາດທີ່ສັບສົນ ເຮືອບິນຂົນສົ່ງປະເພດນີ້ໄດ້ນຳເຂົ້າສູ່ການນຳໃຊ້ຢ່າງເປັນທາງການຢູ່ໃນກອງທັບຈີນ ມາຕັ້ງແຕ່ເດືອນກໍລະກົດ ປີ 2016.

ຂ່າວທີ່ກ່ຽວຂ້ອງ