ຊີ​ຣີ ຮຽກ­ຮ້ອງ​ໃຫ້ ສປຊ ຍຸບ​ກຸ່ມ​ພັນ­ທະ​ມິດສາ­ກົນ ທີ່​ນຳ​ໂດຍ ສ.ອາ​ເມ​ຣິ​ກາ

215 02 ສ.ຫ. 2017 ຂ່າວຕ່າງປະເທດ
ຊີ​ຣີ ຮຽກ­ຮ້ອງ​ໃຫ້ ສປຊ ຍຸບ​ກຸ່ມ​ພັນ­ທະ​ມິດສາ­ກົນ ທີ່​ນຳ​ໂດຍ ສ.ອາ​ເມ​ຣິ​ກາ

ກະ­ຊວງ​ການ​ຕ່າງ­ປະ­ເທດ​ຊີ​ຣີ ໄດ້​ສົ່ງ​ຈົດ­ໝາຍ​ເຖິງ​ເລ­ຂາ­ທິ­ການ​ໃຫຍ່ ແລະ ປະ­ທານ​ສະ­ພາ​ຄວາມ​ໝັ້ນ­ຄົງ​ອົງ­ການ​ສະ­ຫະປະ­ຊາ​ຊາດ (ສປຊ) ໃນ​ວັນທີ 30 ກໍ­ລະ­ກົດ​ນີ້ ໂດຍ​ຕຳ​ນິ​ວ່າ ການ​ໂຈມ​ຕີ​ທາງ​ອາ­ກາດ​ໃສ່​ຊີ​ຣີ​ ຂອງ​ກຸ່ມ​ພັນ­ທະ​ມິດ­ສາ​ກົນ ທີ່​ນຳ​ໂດຍ ສ.ອາ​ເມ​ຣິ​ກາ ສົ່ງ​ຜົນ​ເຮັດ​ໃຫ້​ປະ­ຊາ­ຊົນ​ທີ່​ບໍ່​ມີ​ໂທດ​ກຳ​ຫຍັງ ເສຍ​ຊີ­ວິດ ແລະ ບາດ­ເຈັບ​ຈຳ­ນວນ​ຫຼາຍ ພ້ອມ​ກັນນັ້ນ​ກໍ​ຮຽກ­ຮ້ອງ​ໃຫ້​ຍຸບ​ພັນ­ທະ​ມິດ​ດັ່ງ­ກ່າວ.

ຈົດ­ໝາຍ​ຂອງ​ກະ­ຊວງ​ການ​ຕ່າງປະ­ເທດ​ຊີ​ຣີ ລະ­ບຸ​ວ່າ ນັບ​ແຕ່​ສ້າງ­ຕັ້ງ​ຂຶ້ນມາ ກຸ່ມ​ພັນ­ທະ​ມິດ­ສາ​ກົນ​ໄດ້​ໂຈມ​ຕີ​ທາງອາ­ກາດ​ຕໍ່​ຊີ​ຣີ​ເລື້ອຍໆ ຊຶ່ງ​ພຽງ​ເດືອນດຽວ ຄື​ເດືອນ​ກໍ­ລະ­ກົດ​ທີ່​ຜ່ານ​ມາ ໄດ້ໂຈມ​ຕີ​ຢູ່​ພາກ​ຕາ­ເວັນ​ອອກ ແລະ ພາກຕາ­ເວັນອອກ​ສຽງ​ເໜືອ​ຊີ​ຣີ ເຖິງ 7 ເທື່ອ ສົ່ງ​ຜົນ​ເຮັດ​ໃຫ້​ປະ­ຊາ­ຊົນ ໂດຍ​ສະ­ເພາະແມ່ນ​ແມ່­ຍິງ ແລະ ເດັກ­ນ້ອຍ​ທີ່​ບໍ່​ມີ​ໂທດຫຍັງ ເສຍ​ຊີ­ວິດ ແລະ ບາດ­ເຈັບ​ຢ່າງຫຼວງ­ຫຼາຍ.

ສ.ອາ​ເມ​ຣິ​ກາ ແລະ ​ປະ­ເທດອື່ນໆໄດ້​ສ້າງ­ຕັ້ງ​ກຸ່ມ​ພັນ­ທະ​ມິດ­ສາ​ກົນ ເມື່ອ​ເດືອນ​ກັນ­ຍາ ​ປີ 2014 ເພື່ອ​ໂຈມ​ຕີທາງ​ອາ­ກາດ​ໃສ່​ເປົ້າ​ໝາຍ​ຂອງ​ກຸ່ມລັດ​ອິ​ສລາມ (IS) ຢູ່​ໃນ​ຊີ​ຣີ ແລະ ອີ​ຣັກ ແຕ່​ລັດ­ຖະ­ບານ​ຊີ​ຣີ ເຫັນ​ວ່າ ­ການ​ກະ­ທຳດັ່ງ­ກ່າວ​ບໍ່​ໄດ້​ຮັບການ​ມອບ​ສິດ​ຈາກ​ສະພາ​ຄວາມ​ໝັ້ນ­ຄົງ​ສະ­ຫະ​ປະ­ຊາ​ຊາດ ແລະ ຕຳ​ນິ​ວ່າ ການ​ໂຈມ​ຕີ​ທາງ​ອາ­ກາດສົ່ງ​ຜົນ​ເຮັດ​ໃຫ້​ປະ­ຊາ­ຊົນ​ເສຍ​ຊີ­ວິດ ແລະ ບາດ­ເຈັບ​ຢ່າງ​ຫຼວງ­ຫຼາຍ.

ໃນ​ອີກ​ດ້ານ​ໜຶ່ງ ແຫຼ່ງ​ຂ່າວ Sputnik ແລະ ສຳ­ນັກ​ຂ່າວ­ສານ ANHA ຊອງ​ຊາວ​ເຄີດ ລາຍ​ງານ​ເມື່ອ​ວັນ​ທີ 30 ກໍ­ລະ­ກົດ​ທີ່ຜ່ານ​ມາ​ວ່າ ກອງ​ກຳ­ລັງ​ຂອງກອງ­ທັບ​ຕວກ​ກີ ໄດ້​ບຸກ​ຄືບ​ເຂົ້າ​ໄປ​ໃນເຂດ​ໂຄ​ບາ​ນີ (ພາກ​ເໜືອ​ຊີ​ຣີ) ແລະ​ ຜັນຂະ­ຫຍາຍກອງ​ກຳ­ລັງ​ຢູ່​ທີ່​ນັ້ນ ໃນ​ຂະ­ນະດຽວ​ກັນ ກອງ​ກຳ­ລັງ​ປ້ອງ​ກັນ​ຕົວ​ຂອງຊາວ​ເຄີດ​ຢູ່​ໃນ​ຊີ​ຣີ ແຈ້ງ​ເຕືອນ​ວ່າ ຈະ​ມີມາດ​ຕະ­ການຕອບ​ໂຕ້ ຖ້າ​ຫາ​ກວ່າ​ກອງກຳ­ລັງ​ຂອງ​ຕວກ​ກີ​ ບໍ່​ຖອນ​ອອກ​ໄປ​ຈາກດິນ­ແດນ​ຂອງ​ຊາວ​ເຄີດ ​ຢູ່​ໃນ​ເຂດ​ໂຄ​ບາ​ນີ.

ຂ່າວທີ່ກ່ຽວຂ້ອງ