ນາຍົກ ເນັ້ນຕ້ອງປະຕິຮູບຂະແໜງການເງິນຢ່າງເຂັ້ມແຂງ

222 08 ສ.ຫ. 2017 ຂ່າວໜ້າ​ໜຶ່ງ
ນາຍົກ ເນັ້ນຕ້ອງປະຕິຮູບຂະແໜງການເງິນຢ່າງເຂັ້ມແຂງ

ວັນທີ 7 ສິງຫາ 2017 ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດໂອ້ລົມຊີ້ນຳວຽກງານກະຊວງການງິນ ໂດຍມີທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ພ້ອມດ້ວຍຫົວໜ້າກົມກ່ຽວຂ້ອງໃຫ້ກຽດຕ້ອນຮັບ ພ້ອມທັງລາຍງານໂດຍສັງເຂບ ກ່ຽວກັບການຈັດຕັ້ງປະຕິບັດວຽກງານການຈັດເກັບລາຍຮັບເຂົ້າງົບປະມານ ນັບແຕ່ວັນທີ 1 ມັງກອນ-31 ກໍລະກົດ 2017 ສາມາດປະຕິບັດໄດ້ທັງໝົດ 12.472 ຕື້ກີບ ເທົ່າກັບ 52,09% ຂອງແຜນການປີ ໃນນັ້ນ ລາຍຮັບຈາກການຊ່ວຍເຫຼືອລ້າ 1.380 ຕື້ກີບ ເທົ່າກັບ 55,7% ລາຍຮັບພາຍໃນ 11.920 ຕື້ກີບ ເທົ່າກັບ 51,7% ສູນການປະຕິບັດລາຍຮັບໄດ້ 51,4% ທ້ອງຖິ່ນປະຕິບັດໄດ້ 52,7% ຖ້າແຍກຕາມປະເພດລາຍຮັບຂະແໜງສ່ວຍສາອາກອນປະຕິບັດໄດ້ 47,54% ຂະແໜງພາສີປະຕິບັດໄດ້ 56,46% ລາຍຮັບຈາກການຄຸ້ມຄອງພັດທະນາວິສາຫະກິດ ແລະ ການປະກັນໄພປະຕິບັດໄດ້ 71,3% ກົມຄຸ້ມຄອງຊັບສິນຂອງລັດປະຕິບັດໄດ້ 44% ຂອງແຜນການປີ ແລະ ລາຍຮັບອື່ນໆຈຳນວນໜຶ່ງ.

ສ່ວນດ້ານລາຍຈ່າຍ 7 ເດືອນ 2017 ສາມາດປະຕິບັດໄດ້ທັງໝົດ 16.294,58 ຕື້ກີບ ເທົ່າກັບ 50,28% ໃນນີ້ ສູນກາງປະຕິບັດໄດ້ 11.380 ຕື້ກີບ ເທົ່າກັບ 48,83% ທ້ອງຖິ່ນປະຕິບັດໄດ້ 4.914 ຕື້ກວ່າກີບ ເທົ່າກັບ 54% ຂອງແຜນການປີ ສັງລວມແລ້ວ ການຈັດຕັ້ງປະຕິບັດລາຍຈ່າຍເປັນບຸລິມະສິດທີ່ຈຳເປັນ ສາມາດຈັດຕັ້ງປະຕິບັດຕາມຄາດໝາຍຢ່າງເປັນປົກກະຕິ ເປັນຕົ້ນ ການເບີກຈ່າຍເງິນເດືອນ ເງິນອຸດໜູນ ທັງສູນກາງ ແລະ ທ້ອງຖິ່ນໄດ້ສຳເລັດ ໂດຍພື້ນຖານຮອດເດືອນກໍລະກົດ 2017 ສ່ວນໜີ້ສິນຕ່າງປະເທດ ສາມາດຈ່າຍຕາມກຳນົດຄົບຖ້ວນຕາມສັນຍາ ເງິນບໍລິຫານ ຊື້ໃໝ່ ຈ່າຍລົງທຶນພາຍໃນສຳລັບແຫຼ່ງດຸ່ນດ່ຽງ 7 ເດືອນ ສາມາດປະຕິບັດໄດ້ 3.822 ຕື້ກີບ.

ສ່ວນແຜນການຄາດຄະເນ ການຈັດຕັ້ງປະຕິບັດແຜນງົບປະມານແຫ່ງລັດໝົດປີ 2017 ຈະສູ້ຊົນຈັດເກັບລາຍຮັບໃຫ້ໄດ້ 23.489 ຕື້ກີບ ເທົ່າກັບ 98,1% ຂອງແຜນການປີ ໃນນີ້ ລາຍຮັບຈາກການຊ່ວຍເຫຼືອລ້າ 2.566 ຕື້ກີບ ເທົ່າກັບ 103,56% ລາຍຮັບພາຍໃນມາຈາກການເກັບພາສີອາກອນ ຄຸ້ມຄອງພັດທະນາວິສາຫະກິດ ແລະ ການປະກັນໄພຄຸ້ມຄອງຊັບສິນ ແລະ ອື່ນໆ 20.923 ຕື້ກີບ ເທົ່າກັບ 97,5% ຂອງແຜນການປີ.

ໂອກາດນີ້ ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍຜົນງານການຈັດຕັ້ງປະຕິບັດ ວຽກງານຂອງກະຊວງການເງິນໃນໄລຍະຜ່ານມາ ໂດຍສະເພາະ ການຈັດຕັ້ງປະຕິບັດວຽກງານການຈັດເກັບລາຍຮັບເຂົ້າງົບປະມານໃນ 7 ເດືອນຜ່ານມາ ແລະ ໃນຕໍ່ໜ້າຂະແໜງການເງິນຕ້ອງເອົາໃຈໃສ່ຢ່າງຈິງຈັງ ໃນການຈັດຕັ້ງປະຕິບັດແຜນງົບປະມານແຫ່ງລັດ ປີ 2017 ໂດຍຂຸ້ນຂ້ຽວຈັດຕັ້ງປະຕິບັດເພື່ອໃຫ້ຮອດປີ 2020 ເຮັດໃຫ້ແຜນພັດທະນາເສດຖະກິດ-ສັງຄົມ 5 ປີ ສາມາດຈັດຕັ້ງປະຕິບັດໃຫ້ໄດ້ຢ່າງມີຜົນສຳເລັດ ຕາມມະຕິກອງປະຊຸມໃຫຍ່ ຄັ້ງທີ X ຂອງພັກວາງໄວ້ ແລະ ປະເທດຊາດຫຼຸດພົ້ນອອກຈາກປະເທດດ້ອຍພັດທະນາ ພ້ອມກັນນີ້ ໃຫ້ຊອກຄົ້ນຫາທ່າແຮງໃນແຕ່ລະຂະແໜງການ ແລະ ໃຫ້ທຸກພາກສ່ວນທີ່ກ່ຽວຂ້ອງ ເອົາໃຈໃສ່ຕິດຕາມເສດຖະກິດມະຫາພາກຢ່າງເປັນປົກກະຕິ ມີມາດຕະການຮັດກຸມໃນການຈັດຕັ້ງປະຕິບັດວຽກງານຂະແໜງການເງິນ.

ທ່ານນາຍົກລັດຖະມົນຕີ ຍັງເນັ້ນຕື່ມອີກວ່າ: ແຕ່ນີ້ຮອດທ້າຍປີ 2017 ກະຊວງການເງິນ ຕ້ອງໄດ້ປະຕິຮູບຂະແໜງການເງິນ ເພາະບັນຫາຂະແໜງການຄືປັດໄຈຕັດສິນວຽກງານຕ່າງໆ ແລະ ໃຫ້ເອົາໃຈໃສ່ຈັດຕັ້ງປະຕິບັດ ການຈັດເກັບລາຍຮັບເຂົ້າງົບປະມານຢ່າງມີແບບແຜນ ພ້ອມທັງສ້າງກົນໄກຕ່າງໆໃນການບໍລິຫານການເງິນຢ່າງເຂັ້ມແຂງ ທັງນີ້ ເພື່ອບໍ່ໃຫ້ງົບປະມານຮົ່ວໄຫຼ ເຮັດໃຫ້ແຜນງົບປະມານສາມາດຈັດຕັ້ງປະຕິບັດໄດ້ຕາມຄາດໝາຍ.

ຂ່າວທີ່ກ່ຽວຂ້ອງ