ຫາລືການປະຕິບັດເປົ້າໝາຍພັດທະນາແບບຍືນຍົງ

162 11 ສ.ຫ. 2017 ຂ່າວໜ້າ​ໜຶ່ງ
ຫາລືການປະຕິບັດເປົ້າໝາຍພັດທະນາແບບຍືນຍົງ

ກອງ​ປະຊຸມ​ຄັ້ງ​ປະຖົມ​ມະລຶກຂອງ​ຄະນະ​ຊີ້​ນຳ​ລະດັບ​ຊາດ ເພື່ອການຈັດຕັ້ງ​ປະຕິບັດ​ເປົ້າ​ໝາຍການ​ພັດທະນາ​ຍືນ​ຍົງ (​ປພຍ) ຢູ່ ​ສປປ ລາວ ວັນ​ທີ 10 ສິງຫາ 2017 ຢູ່​ຫ້ອງ​ວ່າການ ສຳນັກງານ​ນາຍົກລັດຖະມົນຕີ ໂດຍການ​ເປັນ​ປະທານ​ຂອງ​ທ່ານ ທອງ​ລຸນ ສີ​ສຸ​ລິດ ນາຍົກ​ລັດ​ຖະມົນຕີ ທັງ​ເປັນ​ຫົວໜ້າ​ຄະນະ​ຊີ້​ນຳລະດັບ​ຊາດ ມີ​ບັນດາ​ລັດ​ຖະ​ມົນຕີ ຜູ້ຕາງໜ້າ​ຈາກ​ກະຊວງ ແລະ ຂະແໜງການ​ກ່ຽວຂ້ອງ​ເຂົ້າຮ່ວມ.

ກອງ​ປະຊຸມ​ແນໃສ່​ວາງ​ແຜນແນວທາງ ແລະ ໃຫ້​ທິດ​ຊີ້​ນຳລວມ ກ່ຽວ​ກັບ​ການຈັດຕັ້ງ​ປະຕິບັດ​ເປົ້າ​ໝາຍ​ການ​ພັດທະນາແບບ​ຍືນ​ຍົງ​ຢູ່ ​ສປປ ລາວ ແຕ່​ນີ້ ຮອດ​ປີ 2030 ໃຫ້​ສອດຄ່ອງ​ກັບສະພາບ​ເງື່ອນໄຂ​ດ້ານ​ການ​ພັດທະ​ນາ​ຕົວ​ຈິງ​ຢູ່​ປະເທດ ເຊິ່ງ​ທ່ານ ສະເຫຼີມ​ໄຊ ກົມ​ມະ​ສິດ ລັດ​ຖະມົນຕີ​ກະຊວງ​ການ​ຕ່າງປະເທດ ຮອງ​ປະທານ​ຜູ້​ປະຈຳການ ຄະນະຊີ້​ນຳ​ລະດັບ​ຊາດ ໄດ້​ສະເໜີ​ກ່ຽວກັບ​ສະພາບ​ລວມ ກົນ​ໄກ ແລະ ແຜນ​ດຳເນີນ​ງານ ສຳລັບ​ການຈັດ​ຕັ້ງ​ປະຕິບັດ ​ປພຍ ຮອດ​ປີ 2030 ພ້ອມ​ນັ້ນ ທ່ານ ກິ​ແກ້ວ ຈັນທະ​ບູ​ຣີ ຮອງ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ໄດ້​ສະເໜີ​ກ່ຽວ​ກັບ​ການເຊື່ອມ​ສານ ​ປພຍ ເຂົ້າ​ໃນ​ແຜນການ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ VIII ຂອບ​ການຕິດຕາມ ແລະ ປະ​ເມີນ​ຜົນ​ການກຳນົດ​ຄາດໝາຍ​ແຫ່ງ​ຊາດ ສຳລັບ ​ປພຍ ເປັນຕົ້ນ.

ໂອກາດ​ນີ້ ທ່ານ​ນາຍົກ​ລັດ​ຖະມົນຕີ ທອງ​ລຸນ ສີ​ສຸ​ລິດ ໄດ້​ເນັ້ນເຖິງ​ການຈັດຕັ້ງ​ປະຕິບັດ ​ປພຍ ແລະ ຂະ​ບວນ​ການ​ເຊື່ອມ​ສານ ເຂົ້າ​ໃນ​ແຜນ​ພັດທະນາ​ເສດ​ຖະກິດ-ສັງຄົມ​ແຫ່ງ​ຊາດ ແລະ ແຜນ​ພັດທະນາ​ຂອງ​ບັນດາ​ຂະແໜງ​ການ​ຕ່າງໆ ໂດຍ​ສະເພາະ ໃຫ້​ສືບຕໍ່​ກົນ​ໄກ​ປະສານ​ງານກ່ຽວ​ກັບ​ການຈັດຕັ້ງ​ປະຕິບັດ ​ປພຍ ການ​ປະຕິບັດພາລະ​ບົດບາດ​ຂອງ​ຄະນະ​ຊີ້​ນຳ​ລະດັບ​ຊາດ ໂດຍ​ມອບ​ໃຫ້​ກະຊວງ​ການ​ຕ່າງປະເທດ ແລະ ກະຊວງ​ແຜນການ ແລະ ການ​ລົງທຶນເປັນ​ເຈົ້າ​ການ ປະສານ​ສົມທົບ​ກັບ​ບັນດາ​ກະຊວງ ແລະ ອົງ​ການຈັດຕັ້ງ​ກ່ຽວຂ້ອງ​ທັງ​ສູນ​ກາງ-ທ້ອງຖິ່ນ ເພີ່ມທະວີ​ຄວາມ​ເປັນ​ເຈົ້າ​ການ​ເຜີຍແຜ່ ແນະນຳ ຄົ້ນຄວ້າ ສ້າງ​ແຜນ ແລະ ໂຄງການ​ໃນ​ການຈັດຕັ້ງ​ປະຕິ​ບັດ​ວຽກ​ງານ​ ໃນ​ລະດັບ​ກະຊວງ ຂະແໜງການ ແລະ ທ້ອງຖິ່ນ ​ໃຫ້ສອດຄ່ອງ ແລະ ກົມກຽວ​ກັບ ​ປພຍ ສືບຕໍ່​ຊຸກຍູ້​ວຽກ​ງານ​ປູກຈິດ​ສຳນຶກ​ໃຫ້​ກວ້າງຂວາງ​ໃນຂອບ​ເຂດ​ທົ່ວ​ປະເທດ ເຮັດ​ໃຫ້​ປະຊາ​ຊົນ​ບັນດາເຜົ່າ ມີ​ຄວາມ​ເຂົ້າໃຈ ແລະ ພ້ອມ​ກັນ​ປະກອບສ່ວນຈັດ​ຕັ້ງ​ປະຕິບັດ ​ປພຍ ນັບ​ມື້​ຫຼາຍຂຶ້ນ ພ້ອມ​ນັ້ນ ຕ້ອງ​ເປັນ​ເຈົ້າ​ການຮ່ວມ​ມືກັບ​ບັນດາ​ປະເທດ​ຄູ່​ຮ່ວມພັດທະນາ ແລະ ອົງ​ການຈັດຕັ້ງສາກົນ ຄຽງ​ຄູ່​ກັບ​ການ​ຂົນຂວາຍທຶນຮອນ​ທັງ​ພາຍ​ໃນ-ຕ່າງ​ປະເທດ ເອົາໃຈໃສ່​ຕິດຕາມ​ກວດກາ ການ​ນຳ​ໃຊ້​ງົບປະມານ​ໃຫ້​ມີຄວາມ​ສອດຄ່ອງ ແລະ ປອດ​ໃສ.

ພ້ອມ​ນັ້ນ​ທ່ານ ທອງ​ລຸນ ສີ​ສຸ​ລິດ ຍັງ​ຮຽກຮ້ອງ​ໃຫ້​ເອົາໃຈໃສ່​ຄົ້ນຄວ້າ​ ບັນດາ​ເປົ້າ​ໝາຍ​ຄາດໝາຍ ແລະ ຕົວ​ຊີ້​ວັດ​ຕ່າງໆ​ໃຫ້​ເລິກເຊິ່ງ ເພື່ອ​ສ້າງ​ນະໂຍບາຍ ແລະ ລະບຽບ​ການ​ທີ່​ສົ່ງເສີມ ແລະ ເອື້ອອຳນວຍ ເອົາໃຈໃສ່​ຕິດຕາມ​ປະເມີນ​ຜົນ ໂດຍ​ຖື​ເອົາ​ວຽກ​ງານເກັບ​ກຳ​ຂໍ້​ມູນ​ສະຖິຕິ​ເປັນ​ວຽກ​ທີ່ສຳຄັນ ພ້ອມ​ກັນ​ສືບຕໍ່​ຈັດ​ຕັ້ງ​ປະຕິ​ບັດ​ບັນດາ​ຄາດໝາຍ​ຂອງ​ເປົ້າໝາຍ​ແຫ່ງ​ຊາດ ທີ 18 ດ້ວຍຄວາມ​ເປັນ​ເຈົ້າ​ການ ແລະ ຮັບຜິດ​ຊອບ​ສູງ ເຊິ່ງ​ມອບ​ໃຫ້​ກະຊວງແຮງ​ງານ ແລະ ສະຫວັດດີ​ການ-ສັງຄົມ ແລະ ກະຊວງ​ການ​ຕ່າງປະເທດ ເປັນ​ເຈົ້າ​ການ​ປັບປຸງ​ກົນໄກ​ຕ່າງໆ ແລະ ແບບແຜນ​ວິທີ​ເຮັດ​ວຽກ ພ້ອມ​ທັງ​ສ້າງ​ແຜນໂຄສະນາ​ລະດົມ​ທຶນ​ຕາມ​ຄວາມເໝາະ​ສົມ.

ຂ່າວທີ່ກ່ຽວຂ້ອງ