ລັດຖະບານ ເລັ່ງຊ່ວຍເຫຼືອຜູ້ປະສົບໄພນ້ຳຖ້ວມ ພາກກາງ-ພາກໃຕ້

146 11 ສ.ຫ. 2017 ຂ່າວໜ້າ​ໜຶ່ງ

ໃນ​ລະຫວ່າງ​ວັນ​ທີ 9-12 ສິງຫາ​ນີ້ ທ່ານ ຄຳ​ແພງ ໄຊ​ສົມ​ແພງ ລັດຖະມົນຕີກະຊວງ​ແຮງ​ງານ ແລະ ສະຫວັດດີ​ການ-ສັງຄົມ ໄດ້​ລົງ​ເຄື່ອນ​ໄຫວ​ມອບ​ເງິນ​ຊ່ວຍເຫຼືອ​ເບື້ອງ​ຕົ້ນ ​ໃຫ້​ແກ່​ຜູ້​ປະສົບ​ໄພ​ນ້ຳ​ຖ້ວມ​ຢູ່​ບັນດາ​ແຂວງ​ພາກ​ກາງ ແລະ ພາກ​ໃຕ້ ຄື: ແຂວງ​ບໍ​ລິ​ຄຳ​ໄຊ ຈຳປາ​ສັກ ສາລະ​ວັນ ເຊ​ກອງ ແລະ ແຂວງອັດ​ຕະ​ປື ມູນ​ຄ່າ 430 ລ້ານ​ກີບ ໃນ​ຂະນະ​ທີ່​ທ່ານ​ນາງ ໃບ​ຄຳ ຂັດ​ທິ​ຍະ ຮອງ​ລັດຖະມົນຕີກະຊວງ​ແຮງ​ງານ ແລະ ສະຫວັດດີ​ການ-ສັງຄົມ ກໍ່​ໄດ້​ໄປ​ມອບ​ເງິນ​ຊ່ວຍເຫຼືອ​ໃຫ້​ແກ່​ແຂວງ​ວຽງ​ຈັນ ຈຳນວນ 120 ລ້ານກີບ.

ແຂວງ​ວຽງ​ຈັນ ມີ​ປະຊາຊົນ​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ຢູ່ 3 ເມືອງ ຄື: ເມືອງ​ຫີນ​ເຫີບ ໂພນ​ໂຮງ ແລະ ເມືອງ​ຊະນະ​ຄາມ ມີ 266 ຄອບຄົວ 1.320 ຄົນ ເຂົ້ານາ ແລະ ພືດ​ຜັກ​ເສຍ​ຫາຍ​ກວ່າ 100 ເຮັກຕາ ມູນ​ຄ່າ​ຄວາມ​ເສຍ​ຫາຍ​ທັງ​ໝົດ 1 ຕື້​ກວ່າ​ກີບ ກ່ອນ​ໜ້າ​ນີ້ ແຂວງ​ວຽງ​ຈັນ ຍັງ​ໄດ້​ປະສົບ​ໄພພິບັດ​ທຳ​ມະ​ຊາດ ພະຍຸ​ລະດູ​ຮ້ອນ​ທັງ​ໝົດ 7 ເມືອງ 22 ບ້ານ 478 ຄອບຄົວ ໂຮງຮຽນ​ເປ່​ເພ 9 ຫຼັງ ເຊິ່ງ​ໄດ້​ຮັບ​ການ​ຊ່ວຍເຫຼືອ​ຈາກ​ພາກ​ລັດ​ມາ​ແລ້ວ 2.780 ລ້ານ​ກີບ ແຂວງ​ບໍ​ລິ​ຄຳ​ໄຊ ໄດ້​ຮັບ​ເງິນ​ຊ່ວຍເຫຼືອ​ຈຳນວນ 120 ລ້ານ​ກີບ ເຊິ່ງ​ໄພພິບັດ​ດັ່ງກ່າວ ໄດ້​ເກີດ​ຂຶ້ນ​ເຖິງ 2 ຄັ້ງ ຢູ່​ເມືອງ​ຄຳ​ເກີດ ຄັ້ງ​ທີ​ໜຶ່ງ​ໃນລະຫວ່າງ 16-18 ກໍລະກົດ 2017 ປະຊາຊົນ​ໄດ້​ຮັບ​ຜົນ​ກະທົບ 45 ບ້ານ ເນື້ອທີ່​ເຂົ້ານາ​ປີ​ເສຍ​ຫາຍ 175 ເຮັກຕາ ສວນ​ມັນຕົ້ນ 230 ເຮັກຕາ ສາລີ 100 ກວ່າ​ເຮັກຕາ ສວນ​ຖົ່ວດິນ 900 ກວ່າ​ເຮັກຕາ ສວນ​ໝາກ​ນັດ ງົວ ຄວາຍ ແລະ ປາ​ລ້ຽງ​ເສຍ​ຫາຍ​ຫຼາຍ​ສົມຄວນ ສ່ວນ​ຄັ້ງ​ທີ​ສອງ​ໄດ້​ເກີດ​ຂຶ້ນ​ລະຫວ່າງ 3-6 ສິງຫາ ຢູ່ 4 ບ້ານ ບ້ານ​ໂພນ​ຕານ ແລະ ບ້ານ​ບຸ່ງ​ປ່າ​ຕາວ ບ້ານ​ນາ​ປ່າ​ຫວ້ານ ແລະ ປ່າ​ຄາ ຈຳນວນ 70 ຄອບຄົວ ປະຊາຊົນ​ແຕ່​ລະ​ບ້ານ​ໄດ້​ຮັບ​ຄວາມ​ເສຍ​ຫາຍ 70% ຂຶ້ນ​ໄປ ພ້ອມ​ນັ້ນ ເສັ້ນທາງເລກ 8A ກໍ່​ໄດ້​ຮັບ​ຄວາມ​ເສຍ​ຫາຍ​ດິນ​ເຈື່ອນ​ຖົມ​ທາງ​ເປ່​ເພ 12 ຈຸດ ເສົາ​ໄຟຟ້າ​ຫັກ 5 ຕົ້ນ.

ສະເພາະ​ແຂວງ​ຈຳປາ​ສັກ ໄດ້​ຮັບ​ການ​ຊ່ວຍເຫຼືອ​ເງິນສົດ 120 ລ້ານ​ກີບ ເຊິ່ງ​ມີ​ປະຊາຊົນ​ຫຼາຍບ້ານ​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ ເປັນຕົ້ນແມ່ນ​ເຂດ​ບ້ານ​ບຸ່ງ​ຄ້າ ບ້ານ​ຄີລີ ແລະ ບ້ານ​ດອນ​ແຊ ເມືອງ​ຊະນະ​ສົມບູນ ລວມ​ທັງ​ເທສະ​ບານ​ແຂວງ ເສັ້ນທາງ 18A ເຂດ​ບ້ານ​ທ່າ​ຮູ້ ເມືອງ​ປະທຸມ​ພອນ ເປ່​ເພ​ເສຍ​ຫາຍ ແລະ ຢູ່​ເມືອງ​ມູນ​ລະ​ປະ​ໂມກ ປະຊາຊົນ​ຫຼາຍ​ຄອບຄົວ​ໄດ້​ຮັບ​ຜົນ​ກະທົບ ເນື້ອທີ່​ການ​ຜະລິດ​ເສຍ​ຫາຍ​ຈຳນວນ​ໜຶ່ງ ພ້ອມ​ນີ້ ທ່ານ​ລັດຖະມົນຕີກະຊວງ​ແຮງ​ງານ ຍັງ​ໄດ້​ມອບ​ເງິນ​ຊ່ວຍເຫຼືອ​ໃຫ້​ແຂວງ​ສາລະ​ວັນ 70 ລ້ານ​ກີບ ແຂວງ​ເຊ​ກອງ 70 ລ້ານ​ກີບ ແລະ ແຂວງ​ອັດ​ຕະ​ປື 50 ລ້ານ​ກີບ.

ຂ່າວທີ່ກ່ຽວຂ້ອງ