ລະ­ວັງ 18 ມຸງ­ກຸດ - ໂດຍ: ດັ້ນ​ກີບ​ເມກ

277 16 ທ.ວ. 2016 ນານາສາລະ

ສັງ­ຄົມ​ເມືອງຫຼວງ​ຂອງ​ຫຼາຍປະ­ເທດ​ຍ່ອມ​ມີຜູ້​ຄົນ​ດົ້ນ​ດັ້ນເຂົ້າ​ມາ​ອາ­ໄສຢູ່​ຢ່າງ​ຫຼວງ­ຫຼາຍ ເຊັ່ນ​ດຽວ​ກັບ​ນະ­ຄອນ­ຫຼວງ​ວຽງຈັນ ທີ່​ມີ​ທັງ​ຄົນ​ຕ່າງ​ແຂວງ ແລະ ຕ່າງ­ປະ­ເທດ​ເຂົ້າມາ​ອາ­ໄສ​ເພື່ອ​ຊອກ​ຫາ​ວຽກ​ເຮັດ​ງານ​ທຳ ແນ່­ນອນກະ­ແສ​ການ​ແຂ່ງ­ຂັນ​ຍ່ອມ​ສູງ​ຂຶ້ນ ເມື່ອ​ມີ​ຜູ້​ຄົນ​ຫຼວງຫຼາຍ​ຍ່ອມ​ມີພວກ 18 ມຸງ­ກຸດ​ປົນ​ຢູ່​ນຳ ແລະ ສວຍໂອ­ກາດ​ແຝງ​ໂຕ​ເຂົ້າ​ໄປຫຼາຍ​ວິ­ຊາອາ­ຊີບ​ ທັງ​ການແຕ່ງ​ໂຕເພື່ອ​ຫຼອກ​ລວງ​ກໍ່​ມີ​ຫຼາຍ​ແບບ​ ລວມ​ທັງພຶດ­ຕິ​ກຳທີ່​ສະ­ແດງ​ອອກ​ກໍ່​ມີ​ການ​ພັດ­ທະ­ນາ​ວິ­ທີຕົວະ​ຕົ້ມຫຼອກ​ລວງ ໂດຍ​ໃຊ້​ປະ­ສົບ​ການ​ຈາກ​ສັງຄົມ​ປະ­ເທດ​ໜຶ່ງ​ຍ້າຍ​ໄປ​ເຮັດ​ອີກ​ປະ­ເທດ​ອື່ນ.

ຜູ້​ຂຽນ​ຢາກ​ເວົ້າ​ໃຫ້​ມີ​ສະ­ຕິ​ນຳ​ກັນ ເພາະ​ໂຈນທຸກ​ມື້­ນີ້​ໃຊ້​ວິ­ທີ​ການ​ທຸກ​ຮູບ​ແບບ​ເພື່ອ​ຫາ​ກິນ​ແບບຜິດ​ກົດ­ໝາຍ ເຊັ່ນ: ການແຕ່ງ​ໂຕ​ໜ້າ​ເຊື່ອ​ຖື​ມາ​ໃນຮູບ​ແບບ​ນັກ­ທຸ­ລະ­ກິດ ສ້າງ​ຫຼັກ​ຖານ​ປອມ​ເພື່ອ​ໃຫ້ຜູ້​ຕົກ​ເປັນ​ເຫຍື່ອ​ໄວ້​ວາງ­ໃຈ ເຊິ່ງ​ຂ່າວ​ຄາວ​ທີ່ຮູ້​ກັນຄື​ການ​ຕົ້ມ​ຕົວະ​ຢືມ​ເງິນ ໂດຍ​ສ້າງ​ຫຼັກ​ຖານ​ວັນ​ເວລາ​ຈ່າຍ​ພ້ອມ​ທັງ​ຂີ້​ດອກ​ສົ່ງ​ກັນ​ຢ່າງ​ງົດ​ງາມ ແຕ່ພໍ​ເຖິງ​ເວ­ລາ​ນັດປາ­ກົດ​ວ່າ​ເຈົ້າ​ໜີ້​ຫາ​ບໍ່​ພົບ ຕິດ­ຕໍ່ບໍ່​ໄດ້ ບໍ່​ທໍ່​ນັ້ນ ຍັງ​ມີ​ຄົນ​ຕ່າງ­ປະ­ເທດ​ທີ່​ໄດ້​ຍິນ​ຫາງສຽງ​ສັງ­ຄົມ​ສ່ອງ​ແສງ​ມາ​ວ່າ ມີ​ມິດ­ສາ­ຊີບ​ປົນ​ເຂົ້າມາ​ກັບ​ທຸ­ລະ​ກິດ ເຊັ່ນ: ໃນ​ກໍ­ລະ­ນີ​ຊັກ​ຊວນ​ລົງ­ທຶນຮ່ວມ​ກັນ ໂດຍ​ເວົ້າ​ເຖິງ​ກຳ­ໄລ​ສູງໆ ເຮັດ​ໃຫ້​ເຫຍື່ອຫຼົງ​ເຊື່ອງ່າຍ ແລ້ວ​ອອກ­ທຶນ​ຮ່ວມ​ກັນ ສຸດ​ທ້າຍກໍ່​ຫອບ​ເງິນ​ໜີ​ກັບ​ປະ­ເທດ ເຮັດ​ໃຫ້​ຜູ້​ເຊື່ອ​ງ່າຍ​ຕົກເປັນ​ເຫຍື່ອ​ ໝົດ​ເງິນ​ໄປ​ແບບ​ບໍ່ສາ­ມາດ​ທວງ​ຄືນໄດ້.

ເມື່ອ​ເວົ້າ​ເຖິງ​ພວກ 18 ມຸງ­ກຸດ ບໍ່​ພຽງ​ແຕ່​ຈະ​ກໍ່ເຫດ​ກັບ​ຊາວ­ບ້ານ​ເທົ່າ​ນັ້ນ ແມ້​ກະ​ທັ້ງ​ກັບ​ພະ­ສົງອົງ­ຄະ​ເຈົ້າ​ຍັງ​ບໍ່​ເວັ້ນ ເພາະພວກ 18 ມຸງ­ກຸດ​ກຳຈິດ­ຕະ­ສາດ​ໄດ້​ວ່າ: ພະ­ສົງ​ອາດ​ເຂົ້າ​ຫາ​ງ່າຍ ຈຶ່ງປາ­ກົດ​ມີ​ເຫດ­ການ​ວ່າ​ພະ­ສົງ​ຖືກ​ຫຼອກ​ໃຫ້​ເສຍ​ເງິນດ້ວຍ​ວິ­ທີ​ການ​ຢືມ​ແບບ​ງ່າຍໆ​ເຊື່ອ​ໃຈ​ກັນ ດັ່ງ­ນັ້ນ ມັນ​ຈຶ່ງ​ເປັນ​ປາ­ກົດ­ການ​ໜຶ່ງ​ຂອງ​ສັງ­ຄົມ​ທີ່​ທຸກ​ຄົນ ຄວນ​ມີ​ສະ­ຕິ​ນຳ​ກັນ ເພາະ​ນະ­ຄອນ­ຫຼວງ​ຂອງ​ປະເທດ​ໃຜໆ​ກໍ່​ຢາກ​ມາ​ອາ­ໄສ​ຢູ່ ເມື່ອ​ຄົນ​ຫຼາຍ ພວກ 18 ມຸງ­ກຸດ​ຈຶ່ງ​ສວຍ­ໂອ­ກາດ​ນັ້ນ​ລົງ­ມື​ກໍ່ເຫດ.

ເຫັນ​ວ່າ​ທາງ​ສື່​ວິ­ທະ­ຍຸ ຫຼື ບາງ​ສື່​ສິ່ງ​ພິມ​ກໍ່​ເຄີຍອອກ​ປະ­ກາດ​ເຕືອນ ແຕ່​ຍັງ​ບໍ່​ທົ່ວ​ເຖິງ​ເທົ່າ​ທີ່​ຄວນ ແລະ ບາງ​ຄົນ​ກໍ່​ຕົກ​ເປັນ​ເຫຍື່ອ ເພາະ​ເຊື່ອ​ຄົນ​ງ່າຍ ຫຼື ຫຼົງ​ກັບ​ວິ­ທີ​ການ​ຫຼອກ​ລວງ ຍ້ອນ​ແນມ​ເຫັນ​ຜົນໄດ້​ກຳ­ໄລ​ໃນ​ແງ່​ທຸ­ລະ​ກິດ ​ຈຶ່ງ​ຍອມ​ຄວັກ​ຖົງ​ເງິນອອກ​ມາ​ຮ່ວມ​ທຶນ​ຄ້າ ສຸດ​ທ້າຍ​ກໍ່​ເສຍ​ຊັບ​ໄປ​ແບບລອຍ​ລົມ ເພາະ​ຫາ​ຕົວ​ບໍ່​ພົບ ຈຶ່ງ​ຢາກ​ຂໍ​ຝາກ​ໃຫ້ສື່​ຕ່າງໆ​ເນັ້ນ​ຕື່ມບັນ­ຫາ​ນີ້ ເພື່ອ​ໃຫ້​ທຸກ​ຄົນ​ເກີດ​ສະຕິ​ປັນ­ຍາ​ຮູ້​ທັນ​ຫຼ່ຽມ​ໂຈນ !.

... ຢາກ​ໃຫ້​ທຸກ​ຄົນ​ມີ​ສະ­ຕິ​ແທ້​ເນີ?

ຂ່າວທີ່ກ່ຽວຂ້ອງ