ພະ­ລັງ​ຂອງ​ສື່​ສັງ­ຄົມ​ອອນ​ລາຍ - ໂດຍ : ດັ້ນ​ກີບ​ເມກ

292 21 ທ.ວ. 2016 ນານາສາລະ

ຄວາມ​ຈິງຢາກ​ເວົ້າ​ເຖິງອຳ­ນາດ​ຂອງສື່​ສັງ­ຄົມ​ອອນລາຍ ​ທີ່​ບໍ່​ສາ­ມາດ​ຄາດ​ການ​ໄດ້​ວ່າມັນ​ມີ​ພະ­ລັງປ່ຽນ­ແປງ​ຊີ­ວິດ ແລະ ສັງ­ຄົມ​ຢ່າງ​ຫຼວງ­ຫຼາຍ ແລະ ວ່ອງ­ໄວ ພວກ​ເຮົາ​ລອງ​ສັງ­ເກດ​ເບິ່ງ​ວ່າ ­ຄວາມ​ຄິດ ແລະ ຄວາມ​ຮູ້­ສຶກ​ທີ່​ປາ­ກົດ​ໃນ​ສື່​ສັງ­ຄົມອອນ​ລາຍ ແມ່ນ​ມີ​ອິດ​ທິ​ພົນ ແລະ ສ້າງ​ຜົນ​ກະ­ທົບ​ຕໍ່​ຊີ­ວິດຂອງ​ຄົນ​ໃດ​ໜຶ່ງ ​ທັງ​ທາງ​ບວກ ແລະ ລົບ ຖ້າ­ວ່າ​ຜູ້ໃດ​ຖືກ​ສະ­ໜັບ­ສະ­ໜູນ​ທາງ​ບວກ ຜູ້​ນັ້ນ​ກໍ່​ຈະ​ກາຍເປັນ​ຂວັນ​ໃຈ​ຂອງ​ສັງ­ຄົມ ແຕ່​ຖ້າ​ຖືກ​ກ່າວ​ຂວັນ​ທາງລົບ​ ມັນ​ຈະ​ເຮັດ​ໃຫ້​ຊີ­ວິດ​ຜູ້​ນັ້ນຖືກ​ວິ­ຈານ ຫຼື ປະນາມ ​ເກີດ​ຄວາມ­ທຸກ​ໃຈ​ທັນ­ທີ ສະ­ນັ້ນ ພາກ­ສ່ວນມະ­ຫາ​ພາກ​ບໍ່​ຄວນ​ຖື​ເບົາການ​ຄຸ້ມ​ຄອງ​ສື່​ສັງ­ຄົມອອນລາຍ.

ພວກ​ເຮົາ​ຢ່າ​ລືມ​ວ່າ ສື່​ສັງ­ຄົມ​ອອນ​ລາຍ ເຮັດໃຫ້​ບາງ​ຄົນ​ນຳ​ໃຊ້​ມີ​ອຳ­ນາດ​ພະ­ລັງ​ຫຼາຍ​ຂຶ້ນ ແລະ ຜູ້­ກ່ຽວ​ກໍ່​ມັກ​ໃຊ້​ສື່​ດັ່ງ­ກ່າວເພື່ອ​ສ້າງ​ພາບ​ພົດ ສ້າງ​ພະ­ລັງ​ໃຫ້​ມີ​ອິດ​ທິ​ພົນ​ຕໍ່​ສັງ­ຄົມ ແຕ່​ບໍ່ຄວນ​ລືມວ່າ​ ຂ່າວ­ສານ​ທີ່​ສ້າງ​ຂຶ້ນ​ເພື່ອ​ສະ­ເໜີ​ຜ່ານ​ທາງ​ສື່ອອນ​ລາຍ​ນັ້ນ ອາດ​ບໍ່​ເປັນ­ຄວາມ​ຈິງ​ທັງ​ໝົດ ມີຖືກ​ແນ່ ຜິດ​ແນ່​ປົນ​ກັນ​ໄປ ເຮັດ​ໃຫ້​ຜູ້​ບໍ­ລິ­ໂພກ​ສື່ຕ້ອງ​ມີ​ສະ­ຕິ ຮູ້­ຈັກ​ວິ­ເຄາະຄິດ​ຫາ​ເຫດ­ຜົນວ່າ ​ຂ່າວທີ່​ເຮົາ​ອ່ານ​ນັ້ນ ມີ​ຄວາມ​ຈິງ​ຫຼາຍ​ໜ້ອຍ​ພຽງ​ໃດ? ແຕ່​ກໍ່​ມີ​ປະ­ເດັນ​ທີ່​ໜ້າ​ຄິດ​ຊ້ອນ​ຂຶ້ນ​ມາ​ອີ​ກວ່າ ຄົນສ່ວນ​ໜຶ່ງ​ໃນ​ສັງ­ຄົມ​ມັກ​ອ່ານ​ຂ່າວ​ແຕ່​ພຽງ​ຫົວ­ຂໍ້ ບໍ່​ອ່ານ​ເນື້ອ​ໃນ​ລະ­ອຽດ ແລ້ວ​ຟ້າວ​ສະ­ຫຼຸບ​ໂດຍ ບໍ່​ຮູ້​ສາ­ເຫດ​ລະ­ອຽດ ແລະ ບາງ​ຂໍ້​ມູນ​ຂ່າວ­ສານ ຖ້າ​ຫາກ​ຖືກ​ເສກ​ສັນ​ປັ້ນ​ແຕ່ງ​ຂຶ້ນ​ຍິ່ງ​ມີ​ຄວາມ​ສັບຊ້ອນ ກໍ່​ຍິ່ງ​ຍາກ​ທີ່​ຜູ້​ອ່ານ​ແບບ​ມັກ­ງ່າຍ​ຈະ​ສືບສາວ​ຫາ​ຄວາມ​ຈິງ ເຊິ່ງ​ມີ​ແຕ່​ອ່ານຜ່ານ​ແລ້ວ​ລົງຄວາມ​ເຫັນ​ທັນ­ທີ ດັ່ງ­ນັ້ນ ຜູ້​ໃດ​ກໍ່​ຕາມ​ທີ່​ຍັງ​ບໍ​ລິໂພກ​ຂໍ້​ມູນ​ແບບ​ຂາດ​ການຄິດ​ພິ​ຈາລະ​ນາ​ຢ່າງຮອບ​ຄອບ ກໍ່​ມັກ​ຈະ​ຖືກ​ຄອບ​ງຳ​ຈິດ­ໃຈ​ດ້ວຍ​ຄວາມຮູ້­ສຶກ ແລະ ຄວາມ​ເຊື່ອ​ແບບ​ຜິດໆ ແລ້ວ​ຕົກ​ເປັນເຫຍື່ອ​ຂອງ​ຜູ້​ເຈ­ຕະ­ນາ​ຫຼອກ​ລວງ.

ເມື່ອ​ມີ​ບັນ­ຫາ​ດັ່ງ​ທີ່​ເວົ້າ​ມາ​ຂ້າງ​ເທິງ​ນັ້ນ ຜູ້​ບໍ​ລິໂພກ​ສື່​ຄວນ​ກວດ​ສອບ​ແຫຼ່ງ​ທີ່​ມາ ແລະ ຄວາມໜ້າ​ເຊື່ອ​ຖື​ຂອງ​ຂ່າວ ແລະ ຄວນ​ອ່ານ​ຂ່າວ​ຢ່າງລະ­ອຽດ ວິ­ເຄາະ​ຜູ້​ໃຫ້​ຂ່າວ​ວ່າ​ເຂົາ​ມີ​ຈຸດ­ປະ­ສົງຫຍັງ? ເພາະ​ທຸກ​ມື້­ນີ້​ຜູ້​ໃຫ້​ຂ່າວ​ມີ​ເຈ­ຕະ­ນາ​ທຳລາຍກັນ​ກໍ່​ມີ ສ້າງ​ຂ່າວ ສ້າງ​ພາບ​ກໍ່​ມີ ເພື່ອ​ສ້າງຄວາມ​ສົນ­ໃຈ​ໃຫ້​ເຊື່ອ​ຕາມ​ກໍ່​ມີ ຫຼື ຜູ້​ໃຫ້​ຂ່າວ​ເພື່ອຢາກ​ສ້າງ​ຄວາມ​ແຕກ​ແຍກສາ­ມັກ­ຄີ​ກໍ່​ມີ ດັ່ງ​ທີ່ພວກ​ເຮົາ​ກໍ່​ສາ­ມາດ​ເຫັນ​ໄດ້​ເປັນ​ຕົວ­ຢ່າງ​ມາ​ຫຼາຍວ່າ ບຸກ­ຄົນ​ບາງ​ຄົນ​ສະ­ແດງ​ຄວາມ​ຮູ້­ສຶກ​ແບບເຫັນ­ແກ່​ໂຕ​ອອກ​ທາງ​ສື່​ອອນ​ລາຍ ສຸດ​ທ້າຍ​ກໍ່​ຖືກສັງ­ຄົມ​ປະ­ນາມ​ຈົນ​ອອກ​ມາ​ຂໍ​ໂທດ​ໃຫ້​ເຫັນ​ມີ​ມາແລ້ວ.

ເພື່ອ​ຫຼຸດ­ຜ່ອນ ຫຼື ປ້ອງ​ກັນ​ບໍ່​ໃຫ້​ຕົກ​ເປັນ​ເຫຍື່ອ ຫຼື ຖືກ​ຄອບ​ງຳ​ໂດຍ​ຂ່າວ­ສານ​ທີ່​ບິດ​ເບືອນ​ຄວາມຈິງ ຜູ້​ບໍ­ລິ­ໂພກ​ສື່​ສັງ­ຄົມ​ອອນ​ລາຍ ຄວນ​ມີ​ສະ­ຕິ ຮອບ​ຄອບ ຄິດ​ວິ­ເຄາະ​ໃຫ້​ເປັນ ບໍ່​ອ່ານ​ຂ່າວ​ພຽງ ຫົວ­ຂໍ້ ແລ້ວ​ຟ້າວ​ສະ­ຫຼຸບ ເພາະ​ສັງ­ຄົມ​ທຸກ​ມື້­ນີ້​ມີ​ຜູ້​ຄົນບໍ່​ຫວັງ​ດີ​ຕໍ່​ກັນ​ກໍ່​ສາ­ມາດ​ແຜ່​ຂ່າວ​ລົງ​ໃນ​ເຟດ​ບຸກ ເພື່ອ​ທຳ­ລາຍ​ຊື່​ສຽງ​ກັນ​ໄດ້ ບໍ່​ຄວນ​ຖື​ເບົາ​ວ່າ​ສື່​ສັງຄົມ​ອອນ​ລາຍ​ເປັນ​ເລື່ອງ​ບັນ­ເທີງ​ຢ່າງ​ດຽວ ເພາະ​ອຳ­ນາດ​ທີ່­ແທ້​ຈິງ​ຂອງ​ມັນ​ນັ້ນ​ຄາດ​ເດົາ​ໄດ້​ຍາກ!.

ສຳ­ລັບ​ຜູ້​ສະ­ໜອງ​ຂ່າວ​ຜ່ານ​ສື່​ສັງ­ຄົມ​ອອນ​ລາຍນັ້ນ ​ກໍ່​ຄວນ​ມີ​ຈັນ​ຍາ​ບັນ ບໍ່​ຄວນ​ຟັງ​ຄວາມ​ຂ້າງດຽວ ຫຼື ຟ້າວ​ຟັ່ງ​ໂພດ ເລີຍພາ­ໃຫ້​ເກີດ​ຄວາມ​ແຕກແຍກ​ໃນ​ສັງ­ຄົມ ຢ່າ​ຄິດ​ວ່າ​ກົດ­ໝາຍ​ບໍ່​ສາ­ມາດເອົາ​ຜິດ​ໄດ້​ເນີ!...

(...ຂໍ​ສະ­ເໜີ​ເປັນ​ການ​ແລກ­ປ່ຽນ...)

ຂ່າວທີ່ກ່ຽວຂ້ອງ