ກິນ​ກ່ອນ​ໄດ້ ໃຊ້​ກ່ອນ​ມີ - ໂດຍ : ດັ້ນກີບເມກ

348 09 ມ.ກ. 2017 ນານາສາລະ

ມື້­ໜຶ່ງ​ຜູ້​ຂຽນໄດ້​ມີ​ໂອ­ກາດ​ນັ່ງດື່ມ​ກາ­ເຟ​ນຳ​ບັນດາ​ອ້າຍ​ນ້ອງ​ໃນ​ວົງ​ການ​ສື່ ໃນ​ວົງ​ສົນ­ທະ­ນາ​ແລກປ່ຽນ​ຄຳ​ເຫັນ​ນັ້ນ​ ມີ​ຜູ້​ໜຶ່ງເພິ່ນ​ເວົ້າ​ວ່າ: ບາງ​ຄົນ​ອັບຈົນ​ຕົກ​ກະ​ປ໋ອງ ເພາະ​ມີ​ຄວາມ​ຢາກ​ໄດ້​ຢາກ​ດັງ ຢາກ​ມີ​ເກີນ​ຂອບ​ເຂດ ເງິນ​ຄຳ​ຍັງ​ບໍ່​ທັນ​ມາ​ເຖິງ​ມື ກໍ່​ສັ່ງ​ກິນ​ກ່ອນ​ແລ້ວ ຈຶ່ງ​ຕົກ​ໃນ​ຄຳ​ເວົ້າ​ຂ້າງ​ເທິງນັ້ນ​ວ່າ: ກິນ​ກ່ອນ​ໄດ້ ໃຊ້​ກ່ອນ​ມີ ສຳ­ລັບ​ຜູ້​ຂຽນແລ້ວ ວະ­ລີ​ນີ້​ມັນ​ຊ່າງ​ຕຳໜ້າ​ເອິກ​ເຕັມໆ ເພາະ​ເຮົາລອງ​ມາ​ຫວນ​ຄືນ​ເບິ່ງ​ປາ­ກົດ­ການ​ຂອງ​ການ​ໃຊ້​ຊີວິດ​ແຕ່­ລະ­ຄົນ​ໃນ​ສັງ­ຄົມ​ທຸກ​ມື້­ນີ້​ ອາດ​ຖືກ​ກັບຫຼາຍຊີ­ວິດ​ທີ່​ບໍ່​ສາ­ມາດ​ຄວບ​ຄຸມ​ຕັນ­ຫາ​ຕົນ​ເອງ​ໄດ້ ເພາະ​ກະ­ແສ​ວັດ­ຖຸ​ນິ­ຍົມ​ມາ​ແຮງ​ເປັນ​ຕົວ​ລໍ້​ໃຫ້​ຕິດກັບ.

ບາງ​ຄົນ​ເຮືອນ​ເຊົ່າ​ເຂົ້າ​ຊື້ ແຕ່​ຂໍ​ຂີ່​ລົດ​ໃຫຍ່​ໄວ້ກ່ອນ ເພື່ອ​ໃຫ້​ໄດ້​ກຽດ​ສັກ​ສີ ແລະ ໜ້າ​ຕາ ແຕ່ປະ­ເດັນ​ບັນ­ຫາ​ຜັດ​ຢູ່​ທີ່​ການໄປ​ດາວ​ລົດ​ມາ​ຂີ່​ກ່ອນ ບໍ່​ແມ່ນ​ຊື້​ຈ່າຍ​ສົດ ເຊິ່ງ​ບາງ​ເດືອນ​ກໍ່​ຈ່າຍ​ເງິນ​ທັນຕາມ​ກຳ­ນົດ​ຂອງ​ບໍ­ລິ­ສັດ ແລະ ມີ​ບາງ​ເດືອນ​ຕ້ອງໄດ້​ຂໍ​ຢືມ​ເງິນ​ໝູ່​ເພື່ອນ​ເພື່ອ​ໄປ​ຈ່າຍ​ຄ່າ​ດາວ​ລົດ ເພາະ​ມັນ​ຮອດ​ມື້​ຈ່າຍ ເຮັດ​ໃຫ້​ຊີ­ວິດ​ຕ້ອງ​ເປັນ​ທຸກກັບ​ຄຳ​ວ່າ ໜ້າ​ຕາ ກຽດ​ສັກ​ສີ ບາງ​ກໍ­ລະ­ນີ​ໄປ​ບໍ່ລອດ​ຈຳ­ເປັນ​ຕ້ອງ​ໄດ້​ເອົາ​ລົດ​ໄປ​ຄືນ​ບໍ­ລິ­ສັດ ເຮັດໃຫ້​ຊີ­ວິດ​ຫົດ​ຫູ່ ແຕ່​ກໍ່​ຍັງ​ເດີນ​ເກມ​ຜັດ​ໜ້າ​ທາແປ້ງ ເພື່ອ​ບໍ່​ໃຫ້​ເສຍ­ໜ້າ​ໃນ​ວົງ​ສັງ­ຄົມ ມີ​ບາງ​ຄົນ​ແລ່ນວຽກ​ລັກ­ສະ­ນະ​ໂຄງ­ການ ມີ​ກຳ­ນົດ​ວົງ​ເງິນ​ສູງກໍ່​ມີ ຄວາມ​ຫວັງ​ແອບດີ­ໃຈ​ຢູ່​ຫຸ່ມໆ ພໍ​ໃກ້​ເວ­ລາ​ໂຄງການ​ຜ່ານ​ຍິ່ງ​ໃຈ​ເຕັ້ນ ອົດ​ບໍ່​ໄດ້​ກໍ່​ສັ່ງ​ຊື້​ສັ່ງ​ກິນ​ກ່ອນໄດ້​ເງິນ​ຕົວ​ຈິງ ແຕ່​ພໍ​ເຖິງ​ເວ­ລາ​ຜົນ​ອອກມາ​ຂອງໜ້າ​ວຽກ​ຜັດ​ບໍ່​ເປັນ​ໄປ​ຕາມ​ທີ່​ຄິດ​ໄວ້ ໂຄງ­ການ​ຄ້າງເຄິ່ງ​ ຜູ້­ກ່ຽວ​ເປັນ​ເຊ່​ເວ່ ເພາະ​ໄດ້​ຢືມ​ເງິນ​ເຂົາ​ມາ​ໃຊ້ກ່ອນ ຈຳ­ເປັນ​ຕ້ອງ​ໄດ້​ຫາ​ໃຊ້​ໜີ້ ຢືມ​ຊ້າຍ ຢືມ​ຂວາ ເຊິ່ງ​ປາ­ກົດ­ການ​ແບບ​ນີ້​ປາ­ກົດ​ມາ​ໃຫ້​ຮູ້​ເຫັນ​ໃນສັງ­ຄົມ ອີກ​ຢ່າງ​ກະ­ແສ​ຄ່າ​ນິ­ຍົມເອົາ­ໜ້າ​ເອົາ​ຕາໃນ​ສັງ­ຄົມ​ມາ​ແຮງ ເຮັດ​ໃຫ້​ຜູ້­ກ່ຽວ​ຈົນ​ຫຼົງ​ລືມ​ວ່າ ກຳ­ລັງ​ຄວາມ​ສາ­ມາດ​ຕົນ​ມີ​ພຽງ​ໃດ ຫຼື ເວົ້າ​ແບບຫຼ້ອນໆ​ກໍ່ວ່າ​ ລືມ​ຮອດ​ກຳ​ພືດ​ຕົນ​ເອງ ກິນ​ກ່ອນ​ໄດ້ ໃຊ້​ກ່ອນ​ມີ​ ຈຶ່ງ​ປາ­ກົດ​ມີ​ໃຫ້​ເຫັນ​ທົ່ວ​ໄປ​ໃນ​ສັງ­ຄົມເວ­ລາ​ນີ້ ບາງ​ຄົນ​ອ່ານ​ມາ​ຮອດອາດ​ຖາມ​ຫາ​ທາງແກ້​ວ່າ ຄວນ​ເຮັດ​ແນວ­ໃດ? ຕໍ່​ປາ­ກົດ­ການ​ຫຍໍ້­ທໍ້ຂ້າງ​ເທິງ​ນັ້ນ ຜູ້​ຂຽນ​ເຫັນ​ວ່າ:

1. ເຮົາ​ຕ້ອງ​ບໍ່​ຫຼົງ​ເຫີ່​ຕາມ​ກະ­ແສ​ວັດ­ຖຸ​ນິ­ຍົມ​ທີ່ ທຸກ​ມື້​ເຕັກ­ນິກ​ໂຄ­ສະ­ນາ​ສິນ­ຄ້າ​ມາ​ເໜືອ​ເມກ ຄື: ຫຼອກ​ລໍ້​ໃຫ້​ເກີດ​ຄວາມຢາກ​ແບບ​ບໍ່​ຮູ້­ສຶກ​ໂຕ.

2. ເຮົາ​ຕ້ອງ​ຮູ້​ເພ­ດານ​ການ​ເງິນ​ຂອງ​ຕົນ​ເອງ.

3. ເຮົາ​ຕ້ອງ​ຮູ້­ຈັກ​ວິ­ເຄາະ​ສະ­ພາບ​ຂອງ​ສັງ­ຄົມ.

ສະ­ຫຼຸບ​ວ່າ: ຢາກ​ໃຫ້​ສັງ­ຄົມ​ເຮົາ​ເປັນ​ສັງ­ຄົມ​ທີ່​ຜູ້ຄົນ­ຮູ້​ເພ­ດານ​ລາຍ​ຮັບ​ຂອງ​ຕົນ​ໃນ​ການ​ດຳ­ເນີນ​ຊີວິດ​ຕົນ​ເອງ​ ໃຫ້​ເໝາະສົມ​ກັບ​ລາຍ​ຮັບ​ຕົນ​ເອງ ເຊິ່ງຄຳ​ວ່າ ແກ້​ຜ້າ​ເອົາ­ໜ້າ​ລອດນັ້ນ​ເຂົາ​ໃຊ້​ສຳ­ລັບບາງ​ເຫດ­ການ ບໍ່​ແມ່ນ​ວ່າ​ເຫັນ​ເຂົາ​ມີ​ກວ່າຕົນ​ກະຢາກ​ມີ​ນຳ​ເຂົາ ໂດຍ​ລືມ​ວ່າ​ ຖານ​ຊີ­ວິດ​ຄົນ​ເຮົາ​ມີ​ທີ່ມາ​ຕ່າງ​ກັນ.

...ສະ­ເໜີ​ເປັນ​ການ​ແລກ­ປ່ຽນ...

ຂ່າວທີ່ກ່ຽວຂ້ອງ