ຈະເປີດດ່ານສາກົນ ໜອງນົກຂຽນ-ຕຣາປຽງກຣຽນ

190 09 ມ.ກ. 2017 ຂ່າວໜ້າ​ໜຶ່ງ

ວັນ​ທີ 10 ມັງກອນ 2017 ​ສປປ ລາວ ແລະ ຣາ​ຊະ​ອານາຈັກ​ກຳປູເຈຍ ຈະ​ໄດ້​ຈັດ​ພິທີ​ເປີດດ່ານ​ສາກົນ​ໜອງ​ນົກຂຽນ-ຕຣາປຽງ​ກຣຽນ ລະຫວ່າງ​ສອງ​ປະເທດ​ຂຶ້ນ​ຢ່າງ​ເປັນ​ທາງ​ການ ເຊິ່ງຈະ​ມີ​ນາຍົກລັດຖະມົນຕີ ເຈົ້າ​ໜ້າທີ່​ກ່ຽວຂ້ອງ ແລະ ປະຊາຊົນ​ສອງປະເທດ​ລາວ ແລະ ກຳປູເຈຍ ​ເຂົ້າຮ່ວມ.

ດ່ານ​ສາກົນ​ໜອງ​ນົກຂຽນ-ຕຣາ​ປຽງ​ກຣຽນ ຈະ​ເປັນ​ດ່ານສາກົນ​ແຫ່ງ​ທຳ​ອິດ​ລະຫວ່າງ ລາວ ແລະ ກຳປູເຈຍ ເຊິ່ງ​ຜ່ານມາ​ເຄີຍ​ເປັນ​ດ່ານ​ທ້ອງຖິ່ນ ເພື່ອອຳນວຍ​ຄວາມສະດວກ​ໃຫ້​ແກ່ການ​ໄປມາຫາສູ່​ກັນ ລະຫວ່າງປະຊາຊົນ​ແຂວງ​ຈຳປາ​ສັກ ແລະ ແຂວງ​ຊຽງ​ແຕງ ມາ​ຮອດ​ວັນ​ທີ 9 ເມສາ 2009 ລັດຖະບານ​ສອງປະເທດ ໄດ້​ຕົກລົງ​ເຫັນ​ດີ​ຍົກ​ລະດັບ​ໃຫ້​ເປັນ​ດ່ານ​ສາກົນ ໂດຍຄວາມ​ພະຍາຍາມ​ຂອງ​ສອງຝ່າຍ​ ໃນ​ການ​ກະກຽມ​ດ້ານ​ຕ່າງໆ ທັງ​ການ​ກໍ່ສ້າງ​ພື້ນຖານ​ໂຄງ​ລ່າງ ແລະ ຂັ້ນ​ຕອນ​ເອກະສານ​ລະບຽບ​ການ​ກ່ຽວຂ້ອງ ເພື່ອ​ສ້າງດ່ານ​ແຫ່ງ​ນີ້​ໃຫ້​ກາຍເປັນ​ດ່ານ​ສາກົນ​ຈົນ​ສຳເລັດ ການ​ເປີດ​ດ່ານສາກົນ​ນີ້ ​ແມ່ນ​ມີ​ຄວາມ​ໝາຍຄວາມ​ສຳຄັນ​ປະຫວັດສາດ​ສຳລັບ​ສອງ​ປະເທດ ​ທີ່​ເກີດ​ຂຶ້ນ​ໃນທ່າມກາງ​ບັນຍາກາດ​ທີ່​ສອງ​ປະເທດ ​ໄດ້​ສະເຫຼີມສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດສອງ​ປະເທດ ລາວ-ກຳປູເຈຍ ແລະ ກຳປູ​ເຈຍ-ລາວ ຄົບຮອບ 60 ປີ ແລະ ທັງ​ຈະ​ເປັນ​ການ​ຕອບ​ສະໜອງ​ຄວາມ​ມຸ່ງ​ມາດ​ປາຖະໜາຂອງ​ປະຊາຊົນ​ສອງ​ປະເທດ​ ທີ່ຢາກ​ຮັດ​ແໜ້ນ​ສາຍ​ພົວພັນ​ມິດ​ຕະພາບ​ທີ່​ເປັນ​ມູນເຊື້ອ​ມາ​ແຕ່​ດົນນານ ແລະ ການ​ຮ່ວມ​ມື​ອັນ​ດີ​ລະຫວ່າງ​ປະຊາຊົນ​ສອງ​ປະເທດ​ໃຫ້ແໜ້ນ​ແຟ້ນ​ຍິ່ງ​ຂຶ້ນ ໂດຍ​ຜ່ານການ​ໄປມາຫາສູ່​ກັນ​ໃຫ້​ຫຼາຍ​ຂຶ້ນ ແລະ ສະດວກ​ສະບາຍ​ຕາມ​ບໍ​ລິເວນ​ຊາຍ​ແດນ ແລະ ຈະ​ເປັນການ​ຊຸກຍູ້​ສົ່ງເສີມ​ການທ່ອງທ່ຽວ​ລະຫວ່າງ​ປະຊາຊົນ​ສອງ​ຊາດ ກໍ່ຄືຕໍ່​ຕ່າງປະເທດ.

ຂ່າວທີ່ກ່ຽວຂ້ອງ