ໄຊຍະບູລີ ຖືເອົາບຸນກອງເຂົ້າໃຫຍ່ ເປັນອີກໜຶ່ງເທສະການດ້ານທ່ອງທ່ຽວ-ຄ້ຳປະກັນສະບຽງອາຫານ

142 10 ມ.ກ. 2017 ຂ່າວໜ້າ​ໜຶ່ງ

ມວນ​ຊົນ​ພ້ອມ​ແຂກ​ພາຍ​ໃນ ແລະ ຕ່າງປະເທດ​ຈຳນວນ​ຫຼາຍ​ຮ້ອຍ​ຄົນ ​ເຂົ້າ​ຮ່ວມ​ສະຫຼອງ​ບຸນ​ກອງ​ເຂົ້າ​ໃຫຍ່ ປະຈຳ​ປີ 2017 ໃນ​ວັນ​ທີ 8 ມັງກອນ 2017 ຜ່ານ​ມາ ຢ່າງ​ຟັດ​ຟື້ນ ຢູ່​ເມືອງ​ພຽງ ແຂວງ​ໄຊ​ຍະ​ບູ​ລີ ຂະນະ​ທີ່​ອຳນາດ​ການ​ປົກຄອງ​ແຂວງ​ດັ່ງກ່າວ​ໄດ້​ປະກາດ​ວ່າ ຈະ​ຖື​ເອົາ​ບຸນ​ດັ່ງກ່າວ​ເປັນ​ຍຸດ​ທະ​ສາດ​ຂອງ​ເມືອງ “ສ້າງ​ເມືອງ​ພຽງ​ເປັນ​ເມືອງ​ຜະລິດ​ສະບຽງ​ອາຫານ ຕິດ​ພັນ​ກັບ​ການ​ປຸງ​ແຕ່ງ ບໍ​ລິການ​ທາງ​ຜ່ານ ທ່ອງ​ທ່ຽວ​ທຳ​ມະ​ຊາດ ແລະ ວັດທະນະທຳ”.

ເມືອງ​ພຽງ​ເປັນ 1 ໃນ 11 ຕົວ​ເມືອງຂອງ​ແຂວງ​ໄຊ​ຍະ​ບູ​ລີ ທີ່​ມີ​ຊັບພະຍາກອນ​ທຳ​ມະ​ຊາດ​ທີ່​ອຸດົມ​ສົມບູນ ປະຊາຊົນ​ມີ​ມູນເຊື້ອ​ດຸໝັ່ນ​ຂະຫຍັນ​ພຽນ​ໃນ​ການ​ຜະລິດ ແລະ ມີ​ຮີດຄອງ​ປະເພນີ​ອັນ​ດີງາມ​ທີ່​ເປັນເອກະລັກ​ ຕັ້ງແຕ່​ໃດໆ​ມາ ຊາວ​ເມືອງ​ພຽງ​ແມ່ນ​ຢຶດ​ຖື​ເອົາ​ມູນເຊື້ອ​ປູກ​ເຂົ້າ-ປູກ​ພືດເປັນຕົ້ນ​ຕໍ ແຕ່​ລະ​ປີ​ພາຍຫຼັງ​ເກັບ​ກູ້​ຜົນ​ຜະລິດ​ແລ້ວ ປະຊາຊົນ​ໄດ້​ພ້ອມ​ກັນ​ສະເຫຼີມສະຫຼອງ​ບຸນ​ປະເພນີ ​ດ້ວຍ​ການ​ເຮັດບຸນ​ເຂົ້າເປືອກ ເຂົ້າສານ​ຂຶ້ນ​ຢູ່​ແຕ່​ລະ​ບ້ານ ເຊິ່ງ​ແຕ່​ລະ​ຄອບຄົວ​ໄດ້​ນຳ​ເອົາ​ເຂົ້າເປືອກເຂົ້າສານ​ໄປ​ທານ​ຢູ່​ວັດ ເພື່ອ​ລະນຶກ​ເຖິງ​ບຸນຄຸນ​ເຂົ້າ ແລະ ເປັນ​ການ​ເຕົ້າໂຮມ​ທຶນຮອນ ເພື່ອ​ປະຕິສັງຂອນ​ວັດ​ວາ​ອາ​ຣາມ.

ໂດຍ​ເຫັນ​ໄດ້​ຄູ​ວາມ​ສຳຄັນ ແລະ ມູນເຊື້ອ​ທີ່​ເປັນ​ທ່າແຮງ​ດັ່ງກ່າວ ຄະນະ​ພັກອຳນາດ​ການ​ປົກຄອງ​ເມືອງ ຈຶ່ງ​ໄດ້​ຍົກ​ລະດັບ​ບຸນ​ປະເພນີ​ດັ່ງກ່າວ ​ຂຶ້ນ​ເປັນ​ງານ​ເທ​ສະການ​ລະດັບ​ເມືອງ ເລີ່ມ​ແຕ່​ປີ 2010 ເປັນຕົ້ນ​ມາ ໂດຍ​ຕິດ​ພັນ​ກັບ​ຍຸດ​ທະ​ສາດ​ຂອງ​ເມືອງ​ວາງ​ອອກ “ສ້າງ​ເມືອງ​ພຽງ​ເປັນ​ເມືອງ​ຜະລິດ​ສະບຽງ​ອາຫານ ​ຕິດ​ພັນ​ກັບ​ການ​ປຸງ​ແຕ່ງ ບໍລິການ​ທາງ​ຜ່ານ ທ່ອງ​ທ່ຽວ​ທຳ​ມະ​ຊາດ ແລະ ວັດທະນະທຳ” ແຕ່​ລະ​ປີ​ໄດ້​ຖື​ເອົາ​ມື້ 13-15 ຄ່ຳ ເດືອນ​ຍີ່​ເພັງ ຫຼື ເດືອນ 2 ລາວ (ກົງ​ກັບ​ເດືອນ​ມັງກອນ ​ເປັນ​ມື້​ຈັດ​ເທ​ສະການ​ບຸນ​ກອງ​ເຂົ້າ​ໃຫຍ່​ປະຈຳ​ປີ ສຳລັບ​ປີ 2017 ນີ້ ແມ່ນ​ກົງ​ກັບ​ວັນ​ທີ 8-12/1/2017 ເຊິ່ງ​ມີ​ຫຼາຍ​ກິດຈະກຳ ເຊັ່ນ: ກິດຈະກຳ​ທາງ​ສາສະໜາ ພິທີ​ແຫ່​ເຂົ້າເປືອກ ເຂົ້າສານ ປະ​ກວດ​ນາງ​ທິດາ​ກອງ​ເຂົ້າ​ໃຫຍ່ ປະ​ກວດ​ນັກ​ຮ້ອງ​ສຽງ​ດີ ສິລະ​ປະ​ວັນນະຄະດີ ກີລາ ຕະຫຼາດນັດ ປະກາດ​ສິນຄ້າ​ໂອ​ທ໊ອບຂັ້ນ​ເມືອງ ຂະ​ບວນ​ຂີ່​ຊ້າງ​ທ່ຽວ​ຊົມ​ທຳ​ມະ​ຊາດ ທ່ຽວ​ຊົມ​ກອງ​ເຂົ້າ​ໃຫຍ່ ຂະ​ບວນ​ການ​ແຫ່​ກ້ອນ​ກຳລັງ​ຂອງ​ມວນ​ຊົນ ແລະ ອື່ນໆ.

ຂ່າວທີ່ກ່ຽວຂ້ອງ