ຂ່າວຫຼ້າສຸດ

ການຜະລິດກະສິກຳເພີ່ມຂຶ້ນ ຍ້ອນມີຕະຫຼາດຮອງຮັບ

106 10 ມ.ກ. 2017 ຂ່າວໜ້າ​ໜຶ່ງ

ໂດຍ​ອີງ​ຕາມ​ຂໍ້​ມູນ​ຈາກ​ກະຊວງ​ກະສິກຳ ແລະ ປ່າໄມ້ ຮູ້​ວ່າ: ປັດຈຸບັນ​ການ​ຜະລິດ​ເປັນ​ສິນຄ້າ ໄດ້​ຂະຫຍາຍຕົວ​ດີ​ສົມຄວນ ແລະ ພົ້ນ​ເດັ່ນ​ກວ່າ​ໝູ່​ແມ່ນ 10 ປະເພດ ພືດ​ບຸລິມະສິດ​ທີ່​ເປັນ​ປາຍ​ແຫຼມ ສາມາດ​ປະຕິບັດ​ໄດ້​ລື່ນ​ແຜນການຄາດໝາຍ​ວາງ​ໄວ້ ຍ້ອນ​ມີ​ຕະຫຼາດ​ຮອງ​ຮັບ​ລາຄາ​ເປັນ​ທີ່​ພໍໃຈຂອງ​ຊາວ​ກະສິກອນ ທັງ​ໄດ້​ຮັບການ​ຊຸກຍູ້​ສົ່ງເສີມ​ຈາກ​ພາກ​ລັດ ແລະ ບັນດາ​ບໍລິສັດ​ຜູ້​ລົງທຶນຕ່າງໆ ​ໃນ​ຂົງເຂດ​ກະສິກຳ ແລະ ອຸດ​ສະຫະ​ກຳ​ປຸງ​ແຕ່ງ ເຊັ່ນ: ການຜະລິດ​ກາເຟ​ເພີ່ມ​ຂຶ້ນ 52 ພັນໂຕນ ຈາກ​ສົກ​ປີ 2010-2011 ມາເປັນ 99 ພັນ​ໂຕນ​ໃນ​ສົກ​ປີ 2014 -2015 ລື່ນ​ແຜນການ​ປະມານ 80% ປູກ​ຫຼາຍ​ກວ່າ​ໝູ່​ຢູ່​ແຂວງຈຳປາ​ສັກ ສາລະ​ວັນ ແລະ ເຊກອງ ຖັດ​ລົງ​ມາແມ່ນ​ສາລີ​ອາຫານ​ສັດ​ເພີ່ມ​ຂຶ້ນ​ຈາກ 917 ພັນ ໂຕນ​ມາ​ເປັນ 1,1 ລ້ານ​ໂຕນ ລື່ນແຜນການ 94% ພົ້ນ​ເດັ່ນ​ກວ່າໝູ່ແມ່ນ​ຢູ່​ແຂວງ​ໄຊ​ຍະ​ບູ​ລີ ອຸດົມໄຊ ຫົວພັນ ຊຽງ​ຂວາງ ແລະ ແຂວງ​ບໍ່​ແກ້ວ ມັນຕົ້ນ​ເພີ່ມ​ຂຶ້ນຈາກ 743 ພັນ​ໂຕນ​ມາ​ເປັນ 1,5 ລ້ານ​ໂຕນ ລື່ນ​ແຜນການ​ຫຼາຍເທົ່າ​ຕົວ ເດັ່ນ​ກວ່າ​ໜູ່​ແມ່ນ​ຢູ່​ນະຄອນ​ຫຼວງ​ວຽງ​ຈັນ ແຂວງ​ວຽງຈັນ ແລະ ບໍ​ລິ​ຄຳ​ໄຊ ອ້ອຍ​ເພີ່ມຂຶ້ນ​ຈາກ 1,22 ລ້ານ​ໂຕນ​ມາ​ເປັນ 1,75 ລ້ານ​ໂຕນ ພົ້ນ​ເດັ່ນ​ແມ່ນຢູ່​ແຂວງ​ສະຫວັນ​ນະ​ເຂດ ແລະ ບໍ​ລິ​ຄຳ​ໄຊ ຢາສູບ​ມີ​ອັດຕາ​ສ່ວນຫຼຸດ​ລົງ​ຈາກ 81 ພັນ​ໂຕນ​ລົງ​ເປັນ 64 ພັນ​ໂຕນ ເຊິ່ງ​ຍັງ​ມີ​ຢູ່​ແຂວງຈຳປາ​ສັກ ສະຫວັນ​ນະ​ເຂດ ບໍ​ລິຄຳ​ໄຊ ຄຳ​ມ່ວນ ຫຼວງ​ພະ​ບາງ ແລະ ແຂວງ​ວຽງ​ຈັນ ຝ້າຍ​ເພີ່ມຂຶ້ນຈາກ 1.840 ໂຕນ​ມາ​ເປັນ 22 ພັນ​ໂຕນ ໝາກເດືອຍ​ເພີ່ມຂຶ້ນ​ຈາກ 103 ພັນ​ໂຕນ​ມາ​ເປັນ 180 ພັນ​ໂຕນ ນອກຈາກ​ນີ້ ພືດຕະກູນ​ຖົ່ວ ເຊັ່ນ: ຖົ່ວເຫຼືອງ ຖົ່ວດິນ ກໍ່​ເພີ່ມ​ຂຶ້ນ ສ່ວນ​ການ​ປູກ​ຢາງພາລາ​ມາ​ຮອດ​ປັດຈຸບັນ ທົ່ວ​ປະເທດ​ມີ​ເນື້ອທີ່​ຫຼາຍ​ກວ່າ 248 ພັນເຮັກຕາ.

ນອກ​ນີ້​ການ​ລ້ຽງສັດ​ເປັນ​ສິນຄ້າ ກໍ່​ມີ​ການ​ຫັນ​ໄປ​ສູ່​ການ​ລ້ຽງ​ແບບອຸດສາຫະກຳ ແລະ ນຳ​ໃຊ້​ແນວພັນ​ປັບປຸງ​ຫຼາຍ​ຂຶ້ນ ເຊັ່ນ: ໝູ ໄກ່ ປາ ງົວ ແລະ ສ່ວນ​ຫຼາຍ​ແມ່ນລ້ຽງ​ແບບ​ເປັນ​ຟາມ ເພື່ອ​ຕອບສະໜອງ​ໃຫ້​ແກ່​ຕະຫຼາດ​ພາຍ​ໃນ ແລະ ສົ່ງ​ອອກ​ຈຳນວນ​ໜຶ່ງ ເຖິງວ່າ​ສິນຄ້າ​ກະສິກຳ​ທີ່​ຜະລິດ​ໄດ້​ມີ​ບໍ​ລິ​ມາດ​ເພີ່ມ​ຂຶ້ນ​ກໍ່​ຕາມ ແຕ່​ສ່ວນໃຫຍ່​ຍັງ​ເປັນ​ວັດຖຸ​ດິບ​ບໍ່​ທັນ​ມີ​ການປຸງ​ແຕ່ງ​ເພື່ອ​ສ້າງ​ມູນ​ຄ່າ​ເພີ່ມ ເອົາໃຈໃສ່​ຂົນຂວາຍ​ໃຫ້​ລົງທຶນ ປຸງ​ແຕ່ງ​ຜະລິດ​ຕະ​ພັນ​ກະສິກຳ​ໃຫ້​ນັບ​ມື້​ຫຼາຍ​ຂຶ້ນ​ຕື່ມ.

ຂ່າວທີ່ກ່ຽວຂ້ອງ