ນັກທ່ອງທ່ຽວເກົາຫຼີ ມາທ່ຽວລາວເພີ່ມຂຶ້ນກວ່າ 70%

161 10 ມ.ກ. 2017 ຂ່າວໜ້າ​ໜຶ່ງ
ນັກທ່ອງທ່ຽວເກົາຫຼີ ມາທ່ຽວລາວເພີ່ມຂຶ້ນກວ່າ 70%

ລັດຖະບານ​ລາວ​ໄດ້​ເອົາໃຈໃສ່​ຢ່າງ​ຕັ້ງໜ້າ​ ເຂົ້າ​ໃນ​ການ​ສົ່ງເສີມ​ວຽກ​ງານ​ການທ່ອງທ່ຽວ ທັງ​ແບບ​ອະນຸ​ຮັກ​ທຳ​ມະ​ຊາດ ສະຖານທີ່​ທ່ອງ​ທ່ຽວ​ປະຫວັດສາດ ວັດທະນະທຳ ແລະ ຮີດຄອງ​ປະເພນີ​ອັນ​ດີງາມ​ຂອງ​ຊາດ ເຊິ່ງ​ໄດ້ເຮັດ​ໃຫ້​ໃນ​ຊຸມ​ປີຜ່ານມາ ມີ​ນັກທ່ອງ​ທ່ຽວ​ຈາກ​ທົ່ວ​ໂລກ​ເຂົ້າ​ມາທ່ຽວ​ລາວ​ຈຳນວນ​ຫຼາຍ​ລ້ານ​ຄົນ ລວມ​ທັງ​ນັກ​ທ່ອງ​ທ່ຽວຈາກ​ປະເທດ ສ ເກົາຫຼີ ກໍ່​ມີ​ອັດຕາ​ສ່ວນເພີ່ມ​ຂຶ້ນ​ຈາກປີ 2014 ຈຳນວນ 96.085 ຄົນ ມາ​ເປັນ 165.328 ຄົນ​ໃນ​ປີ 2015 ເພີ່ມ​ຂຶ້ນ 72%.

ເພື່ອ​ເປັນ​ການ​ສົ່ງເສີມ​ການທ່ອງ​ທ່ຽວ​ໃຫ້​ມີ​ການ​ຂະຫຍາຍຕົວຢ່າງ​ຕໍ່​ເນື່ອງ ກົມ​ໂຄສະນາການທ່ອງທ່ຽວ ໄດ້​ຮ່ວມ​ມື​ກັບ​ມູນນິທິ​ຮ່ວມ​ໃຈ​ຂອງ ສ ເກົາຫຼີ ຈັດຕັ້ງ​ປະຕິບັດ​ໂຄງການ​ຜະລິດແຜນທີ່​ທ່ອງ​ທ່ຽວ​ລາວ ເປັນ​ພາສາ​ເກົາຫຼີ ແນໃສ່​ແຈກ​ຢາຍ ແລະ ຂະຫຍາຍ​ຕະຫຼາດ​ນັກ​ທ່ອງ​ທ່ຽວຊາວ​ເກົາຫຼີ ທີ່​ນັບ​ມື້​ມີ​ຈຳນວນເພີ່ມ​ຂຶ້ນ​ຕາມ​ລຳດັບ ເຊິ່ງ​ໂຄງການ​ນີ້​ໄດ້​ຮ່ວມ​ກັນ​ຈັດ​ຕັ້ງ​ປະຕິບັດ​ແຕ່​ປີ 2015 ເປັນຕົ້ນ​ມາ ເປັນເວລາ 3 ປີ ແລະ ແຕ່​ລະ​ປີ ຈະ​ຜະລິດ​ແຜນທີ່​ທ່ອງ​ທ່ຽວ​ລາວ ຈຳນວນ 5.000 ສະບັບ ລວມ​ທັງໝົດ 15.000 ສະບັບ ໂດຍ​ຜ່ານການຈັດຕັ້ງ​ປະຕິບັດ​ຕົວ​ຈິງ ເຫັນວ່າ​ມາ​ຮອດ​ປັດຈຸບັນ ການ​ຜະລິດ​ແຜນທີ່​ທ່ອງ​ທ່ຽວ​ລາວ ທີ່​ມີຂະໜາດ 60x80cm ແລະ ມີ​ຂໍ້​ມູນ​ການທ່ອງທ່ຽວ​ທີ່​ສຳຄັນຂອງ​ປະເທດ​ລາວ ​ຢູ່​ໃນ​ແຜນທີ່ໄດ້​ສຳເລັດ​ແລ້ວ.

ວັນ​ທີ 9 ມັງກອນ 2017 ຢູ່​ທີ່ກົມ​ໂຄສະນາ​ການທ່ອງທ່ຽວ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ໄດ້​ມີ​ພິທີ​ມອບ-ຮັບແຜນທີ່​ທ່ອງ​ທ່ຽວ​ລາວ ສະບັບ​ເປັນ​ພາສາ​ເກົາຫຼີ ຂຶ້ນ​ກ່າວມອບ​ໂດຍ​ທ່ານ ຊັນ​ນີ ປະທານມູນ​ນິທິ​ຮ່ວມ​ໃຈ ກ່າວ​ຮັບ​ໂດຍທ່ານ ອຸ່ນ​ທວງ ຂາວ​ພັນ ຮອງ​ລັດຖະ​ມົນຕີ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ມີບັນດາ​ຫົວໜ້າ​ກົມ ຫ້ອງການ ແລະ ພະນັກງານ-ວິຊາ​ການກ່ຽວຂ້ອງ​ສອງ​ຝ່າຍ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ