ອາຊຽນ-ຣັດເຊຍ ຮ່ວມມືດ້ານຍຸດທະສາດການຂົນສົ່ງ

141 10 ມ.ກ. 2017 ຂ່າວໜ້າ​ໜຶ່ງ
ອາຊຽນ-ຣັດເຊຍ ຮ່ວມມືດ້ານຍຸດທະສາດການຂົນສົ່ງ

ໃນ​ລະຫວ່າງ​ວັນ​ທີ 5-9 ທັນວາ 2016 ທ່ານ ສັນຕິ​ສຸກ ສິມມາລາ​ວົງ ຮອງ​ລັດຖະມົນຕີ ກະຊວງ​ໂຍທາ​ທິ​ການ ແລະ ຂົນສົ່ງ ພ້ອມ​ດ້ວຍ​ຄະນະ​ນຳ ໄດ້​ເຂົ້າ​ຮ່ວມກອງ​ປະຊຸມ​ລັດຖະມົນຕີ​ຂົນສົ່ງ ສະໄໝ​ທີ 3 ຂອງ​ອົງການສະຫະປະຊາ​ຊາດ UNESCAP ແລະ ກອງ​ປະຊຸມ​ລັດຖະມົນຕີ​ຂົນສົ່ງ ອາ​ຊຽນ-ຣັດ​ເຊຍ ທີ່​ນະຄອນຫຼວງ​ມົດ​ສະ​ກູ ສະຫະພັນ​ຣັດ​ເຊຍ.

ໃນ​ໂອກາດ​ດັ່ງກ່າວ ທ່ານ ສັນຕິ​ສຸກ ສິມ​ມາລາ​ວົງ ໄດ້​ລາຍງານ​ບາງ​ຂໍ້​ລິ​ເລີ່ມ ແລະ ຄວາມຄືບ​ໜ້າ​ຂອງ​ການຈັດຕັ້ງ​ປະຕິບັດ ບັນດາ​ໂຄງການພາຍ​ໃຕ້​ຄຳຂວັນ “ຫັນ​ວິໄສ​ທັດ​ໃຫ້​ປາກົດ​ຜົນເປັນ​ຮູບ​ປະ​ທຳ ເພື່ອ​ຄວາມ​ເຂັ້ມແຂງ​ຂອງ​ປະຊາ​ຄົມ​ອາ​ຊຽນ”.

ສະພາບ​ການ​ພັດທະນາ​ຄົມ​ມະນາ​ຄົມ-ຂົນສົ່ງ ແລະ ໂລ​ຈິສ​ຕິກ ທີ່ ​ສປປ ລາວ ໄດ້​ຮັບຮອງ ແລະ ຈັດ​ຕັ້ງ​ປະຕິບັດ​ໃນ​ຊຸມ​ປີຜ່ານມາ ໂດຍ​ມີ​ເນື້ອ​ໃນ​ບາງ​ຕອນຄື: ລັດຖະ​ບານ ​ສປປ ລາວ ໄດ້​ວາງ​ທິດທາງ​ແຜນ​ງານ ແລະ ໂຄງການລະອຽດ ເພື່ອ​ຫັນ​ປະເທດ​ທີ່​ບໍ່​ມີຊາຍ​ແດນ​ຕິດ​ກັບ​ທະເລ ໃຫ້​ກາຍເປັນ​ປະເທດ​ເຊື່ອມ​ຈອດ ຫຼື ບໍ​ລິການ​ທາງ​ຜ່ານດ້ານ​ຄົມ​ມະ​ນາຄົມ-ຂົນສົ່ງ ເພື່ອ​ເຊື່ອມ​ຈອດ​ກັບພາກ​ພື້ນ ແລະ ອະນຸ​ພາກ​ພື້ນ ບົນ​ພື້ນຖານ​ການ​ປະຕິບັດ​ຕາມບັນດາ​ສົນທິສັນຍາ​ສາກົນທີ່ ​ສປປ ລາວ ເປັນ​ສະມາຊິກຄື: ສົນທິສັນຍາ​ສາກົນ​ວ່າ​ດ້ວຍ​ທາງຫຼວງ​ອາຊີ ສົນທິສັນຍາ​ສາກົນວ່າ​ດ້ວຍ​ຕາ​ໜ່າງ​ທາງ​ລົດໄຟ ອາຊີ-ເອີ​ຣົບ ແລະ ສົນທິສັນຍາ​ສາກົນວ່າ​ດ້ວຍ​ທ່າ​ບົກຂອງ​ອົງການ UNESCAP ນອກຈາກນັ້ນ ​ສປປ ລາວ ໄດ້​ຮັບຮອງ​ຍຸດທະ​ສາດ​ໂລ​ຈິສ​ຕິກແຫ່ງ​ຊາດ ໃນ​ປີ 2015 ແລະ ປັດຈຸບັນ ກຳລັງ​ກະກຽມ​ເພື່ອ​ໃຫ້​ສັດຕະ​ຍາບັນ​ຕໍ່​ສົນທິສັນຍາ​ສາກົນວ່າດ້ວຍ​ທ່າ​ບົກ (Dry Port) ຂອງອົງການ UNESCAP ອີງໃສ່ຜົນສຳເລັດ​ຈາກ​ການ​ທົດ​ລອງໃຫ້​ບໍລິການ​ທ່າ​ບົກ​ແຫ່ງ​ທຳ​ອິດຂອງ ​ສປປ ລາວ ຢູ່​ແຂວງ​ສະຫວັນ​ນະ​ເຂດ ເຊິ່ງ​ມີ​ທີ່​ຕັ້ງ​ຕາມແລວ​ທາງ​ຫຼວງ​ອາຊີ ເລກ​ທີ 16 (ທາງ​ຫຼວງ​ແຫ່ງ​ຊາດ​ເລກ​ທີ 9) ແລະ ຈະ​ນຳ​ໃຊ້​ບົດຮຽນ​ຈາກການ​ສ້າງ​ທ່າ​ບົກ​ດັ່ງກ່າວ ເພື່ອເປັນ​ຕົວ​ແບບ​ໃນ​ການຈັດຕັ້ງ​ປະຕິບັດ​ທ່າ​ບົກ​ອີກ 8 ແຫ່ງທີ່​ຍັງ​ເຫຼືອຕໍ່​ໄປ ເຊິ່ງ​ອົງການ UNESCAP ກໍ່​ໄດ້​ຊົມເຊີຍ ​ສປປ ລາວ ທີ່​ສະແດງ​ອອກ​ໃນ​ບົດ​ກ່າວ​ປິດ​ຂອງທ່ານ​ນາງ Dr. Shamshad Akhtar ຮອງ​ເລຂາທິການ​ໃຫຍ່ UN ເລຂາທິການ ESCAP ຕໍ່ຄວາມ​ພະຍາຍາມ​ຂອງ ​ສປປ ລາວ ໃນ​ການຈັດຕັ້ງ​ປະຕິບັດ​ສົນທິ​ສັນຍາ​ດັ່ງກ່າວ ​ໃຫ້​ເປັນ​ຕົວແບບ​ແກ່​ປະເທດ​ສະມາຊິກອື່ນໆ.

ກອງ​ປະຊຸມ​ໄດ້​ຮັບ​ຟັງ​ການລາຍ​ງານ​ຂອງ​ປະເທດ​ຟີ​ລິ​ປິນ ໃນນາມ​ປະທານ​ອາ​ຊຽນ ສຳລັບ​ຂົງເຂດ​ການ​ຂົນສົ່ງ ໃນ​ປີ 2016 ກ່ຽວ​ກັບ​ການ​ພັດທະນາ​ດ້ານການ​ຄົມມະນາຄົມ-ຂົນສົ່ງຂອງອາຊີ​ປາ​ຊີ​ຟິກ ແລະ ພາກ​ພື້ນ ແລະ ການ​ລາຍ​ງານ​ຂອງ​ປະເທດ​ສິງກະໂປ ກ່ຽວ​ກັບ​ການ​ພັດທະ​ນາ​ລະບົບ Intelligent Transport System (ITS) ຂອງ​ສິງກະ​ໂປ ແລະ ຂອງ​ອາ​ຊຽນ ພ້ອມກັນ​ນັ້ນ ຣັດ​ເຊຍ​ຍັງ​ລາຍ​ງານກ່ຽວ​ກັບ​ການ​ຄຸ້ມ​ຄອງ​ການ​ຂົນສົ່ງ​ແບບ ITS ຂອງ​ຕົນ ດ້ວຍ​ລະບົບ Era-GLONASS. ຈາກ​ນັ້ນ ຣັດ​ເຊຍ ແລະ ອາ​ຊຽນ ເຫັນ​ດີ​ເປັນເອກະ​ພາບ ​ໃນ​ການຈັດຕັ້ງ​ປະຕິບັດ​ຂໍ້​ລິ​ເລີ່ມ​ໃນ​ການ​ຮ່ວມ​ມື​ໃນ 2 ດ້ານຄື: ຄວາມ​ປອດ​ໄພ​ໃນ​ການຂົນສົ່ງ ແລະ ໂລ​ຈິສ​ຕິກ ແລະ ລະບົບ​ການ​ຄຸ້ມ​ຄອງ​ການ​ຂົນສົ່ງດ້ວຍ​ລະບົບ​ທັນ​ສະໄໝ (Intelligent Transport System “ITS”) ດ້ວຍ​ລະບົບ Global Navigation Satellite System (Era-GLONASS) ໂດຍ​ການ​ມອບໝາຍ​ໃຫ້​ລະດັບ​ວິຊາ​ການ (Working Group) ນຳໄປ​ປຶກສາ​ຫາລື ແລະ ວາງ​ແຜນການຈັດ​ຕັ້ງ​ປະຕິບັດ​ລະອຽດ​ຕໍ່​ໄປ.

ຂ່າວທີ່ກ່ຽວຂ້ອງ