ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ເຕີ​ຄີ ສາ­ທາ­ລະ­ນະ​ເຊັກ

101 10 ມ.ກ. 2017 ຫົວຂໍ້ຂ່າວອື່ນໆ

ຄໍ​ລຳ “ເບິ່ງ​ບ້ານ​ເຂົາ​ເອົາ​ບົດ­ຮຽນ” ສະ­ບັບແຮກ​ໝານ​ປີ​ໃໝ່ 2017 ນີ້ ພວກ​ເຮົາ​ພາ­ກັນ​ໄປ​ເບິ່ງມາດ​ຕະ­ການ​ຈຳ­ກັດ ແລະ ກຳ­ຈັດ​ເຄື່ອງ​ດື່ມ​ປະເພດ​ມຶນ­ເມົາ​ທີ່​ເຄີຍ​ເປັນ​ຂ່າວ​ມາ​ແລ້ວ​ຢູ່​ປະ­ເທດເຕີ​ຄີ ແລະ ປະ­ເທດ​ສາ­ທາ­ລະ­ນະ​ເຊັກ (ເຊັກ​ໂກ ສະໂລ​ວາ​ກີ​ເກົ່າ).

ທີ່​ ປະ­ເທດ​ເຕີ​ຄີ: ກ່ອນ​ໜ້າ​ນີ້​ສອງ​ປີ​ເຄິ່ງ ທາງ​ການຂອງ​ເຕີ​ຄີ ໄດ້​ປັບ­ປຸງ​ກົດ­ໝາຍ​ຄວບ​ຄຸມ​ເຄື່ອງ​ດື່ມປະ­ເພດ​ມຶນ­ເມົາ ໂດຍໄດ້​ກຳ­ນົດ​ຂໍ້​ຈຳ­ກັດ​ໃໝ່ໆ​ເຂົ້າຕື່ມ ເຊິ່ງ​ໄດ້­ແກ່​ການ​ເລີກ​ຮື້​ປ້າຍ​ໂຄ­ສະ­ນາ​ເຄື່ອງດື່ມ​ປະ­ເພດ​ມຶນ­ເມົາ​ທີ່​ຕິດ­ຕາມ​ສະ­ຖານ­ທີ່ເປີດ​ທັງໝົດ​ໃນ​ທົ່ວ​ປະ­ເທດ ນັບ​ແຕ່​ວັນ​ທີ 12 ເດືອນ​ມິ­ຖຸ­ນາ ປີ 2014 ເປັນ­ຕົ້ນ​ມາ.

ຂໍ້​ກຳ­ນົດ​ນີ້​ມີ​ຜົນ​ສັກ­ສິດ​ໂດຍ​ໄວ​ກັບ​ບັນ­ດາ​ຮ້ານຂາຍ­ເຄື່ອງ​ດື່ມ ຮ້ານ​ອາ­ຫານ ບາ ແລະ ຮ້ານ​ກາເຟ (ທີ່​ມີ​ການ​ບໍ­ລິ­ການເຫຼົ້າ) ຫຼັງ​ຈາກ​ການ​ເລີກ​ຮື້ປ້າຍ​ໂຄ­ສະ­ນາ​ຕິດ​ຕັ້ງ​ຕາມ​ສະ­ຖານ­ທີ່​ເປີດ (ຢູ່​ພາຍນອກ) ຊຶ່ງ​ກຳ­ນົດ​ໃຫ້​ສຳ­ເລັດ​ພາຍ​ໃນ​ເດືອນກັນ­ຍາ ປີ 2014 ແລ້ວ ກໍ່​ໄດ້​ເລີ່ມ​ປົດ​ປ້າຍ​ໂຄ­ສະ­ນາ​ຢູ່​ພາຍໃນ​ຫ້າງ​ຮ້ານ ແລະ ບາ​ເຄື່ອງ​ດື່ມ ລວມ​ທັງ​ເຄື່ອງໝາຍ​ການ​ຄ້າ​ເຄື່ອງ​ດື່ມ​ປະ­ເພດ​ມຶນ­ເມົາ​ທັງ​ໝົດທີ່ຕິດ­ຕາມ​ຕູ້­ເຢັນ ບັ້ນ​ທີ​ສອງ​ນີ້​ກຳ­ນົດ​ໃຫ້​ສຳ­ເລັດ​ພາຍໃນ​ສອງ​ປີ​ເຄິ່ງ ພາຍ­ຫຼັງ​ກົດ­ໝາຍເລີ່ມ​ມີ​ຜົນ​ສັກ­ສິດ ຈາກ​ນັ້ນ​ກົດ­ໝາຍ​ຍັງ​ໄດ້​ກຳ­ນົດ​ຫ້າມ​ຂາຍ­ເຄື່ອງດື່ມ​ປະ­ເພດ​ມຶນ­ເມົາ ນັບ​ແຕ່​ເວ­ລາ 10 ໂມງ​ກາງຄືນ ຫາ 6 ໂມງ​ເຊົ້າ ເພາະ​ເປັນ​ເວ­ລາ​ທີ່​ພວກ​ຄໍທອງ­ແດງ​ກຳ­ລັງ​ເມົາ​ມັນ ແລະ ອ່ອນ­ເພຍ​ຈາກ​ນ້ຳເມົາ​ພໍ­ແຮງ​ແລ້ວ.

ສະ­ຖິ­ຕິ​ຂອງ​ທາງ​ການ​ເຕີ​ຄີ ຊີ້​ອອກ​ວ່າ ຄົນ​ສ່ວນຫຼາຍ ໂດຍ​ສະ­ເພາະແມ່ນ​ນັກ​ທ່ອງ​ທ່ຽວ​ເກືອບ​ທັງໝົດ​ ຊື້​ເຫຼົ້າ​ຫຼັງ 10 ໂມງກາງ­ຄືນ​ເປັນ​ສ່ວນ​ໃຫຍ່ ກົດໝາຍ​ຄວບ​ຄຸມ​ເຫຼົ້າ​ທີ່​ປະ­ກາດ​ໃຊ້​ໃນ​ປີ 2013 ໄດ້​ກໍ່­ໃຫ້­ເກີດ​ສຽງ​ວິ­ພາກ​ວິ­ຈານ​ຈາກ​ຜູ້​ປະ­ກອບການຂາຍ­ເຄື່ອງ​ດື່ມ​ປະ­ເພດ​ມຶນ­ເມົາ​ຢ່າງ​ຟົດ​ເດືອດ ເພາະລາຍ​ໄດ້​ຈາກ​ການ​ຂາຍ​ຫຼຸດ​ລົງ​ຢ່າງ​ຫຼວງຫຼາຍ ມີ​ບາງ​ຮ້ານ​ເຖິງ 60% ຜູ້​ປະ­ກອບ​ການຂາຍ​ເຫຼົ້າຈຳ­ນວນ​ໜຶ່ງ ​ຕ້ອງ​ໄດ້​ປ່ຽນ​ອາ­ຊີບ​ໃໝ່ ແນວ­ໃດ​ກໍ່​ດີ ທາງ​ການ​ເຕີ​ຄີ ເດັດ­ຂາດ​ບໍ່​ອ່ອນ​ຂໍ້​ຕໍ່ສຽງ​ວິ­ພາກ​ວິ­ຈານ ແລະ ຍັງ​ໄດ້​ເດີນ​ໜ້າ​ປັບ​ໃໝ​ຜູ້ລະ­ເມີດ​ກົດ­ໝາຍ​ໃນ​ອັດ­ຕາ​ສູງ ແຕ່ 2.300-95.000 ໂດ​ລາ​ສະ­ຫະ­ລັດ.

ທີ່ ສາ­ທາ­ລະ­ນະ​ເຊັກ: ໃນ​ທ້າຍ​ປີ 2014 ລັດ​ຖະບານ​ສາ­ທາ­ລະ­ນະ​ເຊັກ ໄດ້​ຮັບ­ຮອງ​ເອົາ​ການ​ຂະຫຍາຍ​ມາດ​ຕະ­ການ​ຈຳ­ກັດ​ເຄື່ອງ​ດື່ມ​ປະ­ເພດ​ມຶນເມົາ ແລະ ການ​ພະ­ນັນ ຊຶ່ງ​ໄດ້​ເລີ່ມ​ປະ­ຕິ­ບັດ​ນັບ​ແຕ່ຕົ້ນ​ປີ 2015 ແລະ ຈະ​ສິ້ນ​ສຸດ​ລົງ​ໃນ​ທ້າຍ​ປີ 2018 ສະ­ຖິ­ຕິ​ປີ 2012 ບົ່ງ​ບອກ​ວ່າ ເຊັກ ເປັນ​ປະ­ເທດ​ໜຶ່ງທີ່​ມີ​ຄົນ​ດື່ມ​ເຫຼົ້າ​ຫຼາຍ​ທີ່​ສຸດ ໂດຍ​ສະ­ເລ່ຍ 9,9 ລິດ ເຫຼົ້າ​ເດັດ​ຕໍ່ຄົນ ລວມ​ທັງ​ເດັກນັກ­ຮຽນ​ຂັ້ນ​ປະ­ຖົມ ເຫຼົ້າ​ເປັນ­ຕົ້ນ​ເຫດ­ການ​ເສຍ​ຊີ­ວິດ​ໃນ​ອັດ­ຕາ 6% ຂອງ​ການ​ເສຍ​ຊີ­ວິດ​ທັງ​ໝົດ​ໃນ 1 ປີ ໃນ​ປີ 2007 ການ​ໃຊ້​ຈ່າຍ​ຄ່າ​ປິ່ນ­ປົວ​ພະ­ຍາດ​ທີ່​ເກີດ​ມາ​ຈາກ​ດື່ມເຫຼົ້າ​ນັ້ນ​ຕົກ​ເປັນ​ເງິນ​ເຖິງ 2,6 ຕື້​ຄຣາວ (ເທົ່າ​ກັບ 117,3 ລ້ານ​ໂດ​ລາ​ສະ­ຫະ­ລັດ).

ເພື່ອ​ແກ້​ໄຂ​ບັນ­ຫາ​ນ້ຳ​ເມົາ​ລະ­ບາດ​ນີ້ ທາງ​ການເຊັກ ໄດ້​ປັບ­ປຸງ​ກົດ­ໝາຍ​ຄວບ​ຄຸມ​ເຫຼົ້າ ໂດຍ​ໄດ້ເພີ່ມ​ໂທດ​ຕໍ່​ຜູ້​ສະ­ໜອງເຫຼົ້າ​ໃຫ້​ເດັກ­ນ້ອຍ.

ຂ່າວທີ່ກ່ຽວຂ້ອງ