ຂ່າວຫຼ້າສຸດ

ໂຣ​ນັນ​ໂດ, ເມ​ສ​ຊີ່, ກຣີ​ຊ​ມັນ ເຂົ້າ​ຊິງ​ນັກ​ເຕະ​ໂດດ​ເດັ່ນ​ຟີ​ຟ່າ

60 10 ມ.ກ. 2017 ວົງຈອນກີລາ
ໂຣ​ນັນ​ໂດ, ເມ​ສ​ຊີ່, ກຣີ​ຊ​ມັນ ເຂົ້າ​ຊິງ​ນັກ​ເຕະ​ໂດດ​ເດັ່ນ​ຟີ​ຟ່າ

ຄຣິ​ສ​ເຕຍ​ໂນ່ ໂຣ​ນັນ​ໂດ, ລິ​ໂອ​ເນວ ເມ​ສ​ຊີ່ ແລະ ອັອງ​ຕວນ ກຣີ​ຊ​ມັນ ເປັນ​ນັກ​ເຕະ​ທີ່​ໄດ້​ເຂົ້າ​ຊີງ​ລາ­ງວັນ​ນັກ​ເຕະ​ຊາຍ​ໂດດ​ເດັ່ນ​ແຫ່ງ​ປີ​ຂອງຟີ​ຟ່າ ປະ­ຈຳ​ປີ 2016 ໂດຍ​ກ່ອນ​ທີ່​ລາ­ງວັນ​ນີ້​ຈະ​ມີ​ການ​ຄວບ​ລວມ​ກັບ ບັນ​ລົງດໍ ນັ້ນ ທັງ​ໂຣ​ນັນ​ໂດ ແລະ ເມ​ສ​ຊີ່ ຕ່າງ​ກໍ​ເຄີຍ​ໄດ້​ຮັບ​ລາ­ງວັນ​ນີ້​ໄປ​ຄົນ​ລະ 1 ສະ­ໄໝ.

ຄຣິ​ສ​ເຕຍ​ໂນ່ ໂຣ​ນັນ​ໂດ້ ດາວ​ຍິງ​ຂອງ ຣິວ ມາດ​ຣິດ, ລິ​ໂອ​ເນວ ເມ​ສ​ຊີ່ ກອງ​ໜ້າ​ຂອງ ບາ​ເຊ​ໂລ​ນ່າ ແລະ ອັອງ​ຕວນ ກຣີ​ຊ​ມັນ ກອງ​ໜ້າ​ຂອງ ແອດ​ເລ​ຕິ​ໂກ ມາດ​ຣິດ ຄື​ນັກ​ເຕະ 3 ຄົນ​ທີ່​ມີ​ຊື່​ເຂົ້າ​ຊີງ​ລາ­ງວັນ​ນັກເຕະ​ຊາຍ​ໂດດ​ເດັ່ນ​ແຫ່ງ​ປີ​ຂອງ​ສະ­ຫະ­ພັນ​ເຕະ­ບານ​ນາ­ນາ​ຊາດ (ຟີ​ຟ່າ) ປະ­ຈຳ​ປີ 2016.

ຟີ​ຟ່າ ຫາ​ກໍ​ແຍກ​ທາງ​ກັບ​ວາ­ລະ­ສານ ຟຣອງຊ໌ ຟຸດ ບອລ ສື່​ດັງ​ຂອງ​ປະ­ເທດ​ຝຣັ່ງ ທີ່​ຈັດ​ລາ­ງວັນ ບັນ​ລົງດໍ ໄປ​ເມື່ອ​ກ່ອນ​ໜ້າ​ນີ້ ເຮັດ​ໃຫ້​ພວກ​ເຂົາ​ກັບ​ມາ​ຈັດ​ລາງວັນ​ຂອງ​ຕົວ​ເອງ​ອີກ​ຄັ້ງ ເຊິ່ງ​ການ​ມອບ​ລາ­ງວັນ​ໄດ້​ມີຂຶ້ນ​ໃນ​ພິ­ທີ​ທີ່​ນະ­ຄອນ​ຊູ​ຣິກ ປະ­ເທດ​ສວິດ ເມື່ອ​ວັນ​ຈັນ​ທີ 9 ມັງ­ກອນ​ຜ່ານ​ມາ​ນີ້.

ທັງ​ນີ້ ໂຣ​ນັນ​ໂດ ມີ​ຜົນ­ງານ​ທີ່​ໂດດ​ເດັ່ນ​ໃນ​ປີ 2016 ເມື່ອ​ໄດ້​ແຊັມ ຢູ​ຟ່າ ແຊັມ​ປຽນ ລີກ ກັບ​ຕົ້ນ​ສັງ­ກັດ ແລະ ໄດ້​ແຊັມ​ເຕະ­ບານ​ຊິງ​ແຊັມ​ແຫ່ງ​ຊາດ​ເອີ​ຣົບ "ເອີ​ໂຣ 2016" ກັບ​ທີມ​ຊາດ​ປອກ​ຕຸຍ​ການ ​ດ້ວຍ ຂະ­ນະ​ທີ່ ເມ​ສ​ຊີ່ ກໍ​ມີ​ຟອມ​ທີ່​ໂດດ​ເດັ່ນ ເມື່ອ​ຍິງ​ປະ­ຕູ​ໄດ້ ຫຼາຍ​ທີ່​ສຸດ​ໃນ​ໂລກ​ ໃນ​ປີ 2016 ພ້ອມ​ກັບ​ຊ່ວຍ​ໃຫ້ ບາເຊ​ໂລ​ນ່າ ໄດ້​ແຊັມ​ລີກ​ໄປ​ນອນ​ກອດ ດ້ານ ກຣີ​ຊ​ມັນ ກໍ​ບໍ່​ໜ້ອຍ​ໜ້າ ໄດ້​ຮອງ​ແຊັມ​ທັງ​ໃນ​ລີກ​ກັບ​ຕົ້ນ​ສັງ­ກັດ ແລະ ໃນ​ເຕະ­ບານ ເອີ​ໂຣ 2016 ກັບ​ທີມ​ຊາດ​ຝຣັ່ງ.

ຖ້າ​ນັບ​ແຕ່​ລາ­ງວັນ​ນັກ​ເຕະ​ຊາຍ​ໂດດ​ເດັ່ນ​ແຫ່ງ​ປີຂອງ​ຟີ​ຟ່າ ທີ່​ມີ​ການ​ມອບ​ກັນ​ກ່ອນ​ທີ່​ຈະ​ຄວບ​ລວມ​ກັບ ບັນ​ລົງ​ດໍ ແລ້ວ​ນັ້ນ ໂຣ​ນັນ​ໂດ ກັບ ເມ​ສ​ຊີ່ ຕ່າງ​ກໍ​ເຄີຍໄດ້​ຮັບ​ລາ­ງວັນ​ນີ້​ໄປ​ຄົນ​ລະ 1 ສະ­ໄໝ ໂດຍ​ຂອງ​ນັກ​ເຕະຊາວ​ປອກ​ຕຸຍ​ການ ​ເປັນ​ໃນ​ປີ 2008 ຂະ­ນະ​ທີ່​ຫົວ­ໜ້າທີມ​ຊາດ​ອາກ​ຊັງ​ຕິນ ​ໄດ້​ລາ­ງວັນ​ນີ້​ຕອນ​ປີ 2009.

ຂ່າວທີ່ກ່ຽວຂ້ອງ