ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ຍີ່­ປຸ່ນ ມາ​ເລ​ເຊຍ ສ ເກົາ­ຫຼີ

82 11 ມ.ກ. 2017 ຫົວຂໍ້ຂ່າວອື່ນໆ

ມື້­ນີ້​ມີ​ເລື່ອງ​ນັກ­ທຸ­ລະ­ກິດ​ຍິງ​ມື​ໃໝ່​ໃນ​ຍີ່­ປຸ່ນ ໄດ້​ຮັບ​ເງິນ​ກູ້​ຢືມ​ຫຼາຍ​ຂຶ້ນ​ຈາກ​ລັດ­ຖະ­ບານ ເລື່ອງ​ການປັບ​ໃໝ​ການ​ຄ້າ­ຂາຍສັດ­ປ່າຢູ່​ມາ​ເລ​ເຊຍ ແລະ ເລື່ອງ​ບໍ­ລິ­ສັດ​ລົດ​ຮຸນ​ໄດ ມີ​ແຜນ​ຜະ­ລິດ​ລົດ​ສະ­ອາດທີ່​ແສນ​ສະ­ບາຍ ທີ່ ສ ເກົາ­ຫຼີ.

ທີ່ ຍີ່­ປຸ່ນ: ຂ່າວ​ຕ່າງ­ປະ­ເທດ​ຈາກ​ຍີ່­ປຸ່ນ ໃນ​ວັນ​ທີ 5 ເດືອນ​ທັນ­ວາ​ປີ​ກາຍ​ນີ້​ໃຫ້​ຊາບ​ວ່າ ນັກ­ທຸ­ລະ­ກິດຍິງ​ມື​ໃໝ່ ຊຶ່ງ​ຫາ­ກໍ່​ເລີ່ມດຳ­ເນີນ​ທຸ­ລະ​ກິດພາ­ກັນຍິ້ມ​ອອກ ຍ້ອນ​ໄດ້​ຮັບ​ການ​ສະ­ໜັບ­ສະ­ໜູນ​ໃນ​ຫຼາຍໆ​ດ້ານ​ຈາກ​ລັດ­ຖະ­ບານ ໃນ​ໄລ­ຍະ​ຫຼັງໆ​ມາ​ນີ້ ລັດ­ຖະ­ບານ​ຍີ່­ປຸ່ນ ໄດ້​ໃຫ້​ຄວາມ​ສຳ­ຄັນ​ເປັນ​ພິ­ເສດໃນ​ການ​ເພີ່ມ​ທະ­ວີ​ບົດ­ບາດ​ຂອງ​ແມ່­ຍິງ​ໃນ​ຂົງ­ເຂດເສດ­ຖະ­ກິດ ແລະ ສັງ­ຄົມ ໂດຍ​ສະ­ເພາະແມ່ນ​ນັກທຸ­ລະ​ກິດ​ຍິງ​ທີ່​ລິ​ເລີ່ມ​ດຳ­ເນີນ​ທຸ­ລະ​ກິດ​ຂະ­ໜາດນ້ອຍ ຊຶ່ງ​ຍັງ​ຂາດ­ທຶນ​ຮອນ​ອັນ​ຈຳ­ເປັນ.

ຕາມ​ສະ­ຖິ­ຕິ​ແຕ່​ເດືອນ​ເມ­ສາ ເຖິງ​ເດືອນ​ກັນ­ຍາ ປີ 2016 ລັດ­ຖະ­ບານ​ຍີ່­ປຸ່ນ ໄດ້​ອອກ​ເງິນ​ກູ້​ຢືມ​ໃຫ້​ປະ­ກອບ​ການ​ເພດ​ຍິງ ທີ່​ຕ້ອງ­ການ​ທຶນ​ບໍ່​ເກີນ 3 ລ້ານ​ເຢັນ (1 ໂດ​ລາ​ສະ­ຫະ­ລັດ ແລກ​ໄດ້ 79,34 ເຢັນ ອັດ­ຕາ​ແລກ­ປ່ຽນ​ປີ 2012) ເປັນ​ຈຳ­ນວນ​ທັງໝົດ 1.282 ລາຍ­ການ ເພີ່ມ​ຂຶ້ນ 21% ທຽບ​ກັບ ໄລ­ຍະ​ດຽວ​ຂອງ​ປີ 2015 ຂ່າວ​ໃຫ້​ຊາບ​ຕື່ມ​ວ່າ ນັກທຸ­ລະ​ກິດ​ເພດ​ຍິງ​ທີ່​ເພີ່ມ​ຈຳ­ນວນ​ຂຶ້ນ​ຢ່າງ​ຫຼວງ­ຫຼາຍນີ້ ແມ່ນ​ຜູ້​ທີ່​ຕ້ອງ­ການ​ມີ​ທຸ­ລະ​ກິດ​ເປັນ​ຂອງ​ຕົນ​ເອງ ພາຍ­ຫຼັງ​ອອກ​ຈາກ​ບໍ­ລິ­ສັດ​ຕ່າງໆ ເພື່ອ​ສ້າງ​ຄອບຄົວ ແລະ ມີ​ພັນ­ທະ​ລ້ຽງ​ດູ​ລູກ­ເຕົ້າ.

ທີ່ ມາ​ເລ​ເຊຍ: ໜັງ­ສື­ພິມ​ວຽງ​ຈັນ​ທາມ ວັນ​ທີ 6 ເດືອນ​ນີ້​ໃຫ້​ຊາບ​ວ່າ ຊາຍ​ມາ​ເລ​ເຊຍ ຊື່​ທ້າວ ມານ​ຊໍ ຮັດ (Manshor Hat) ຖືກ​ສານ​ຕັດ­ສິນ​ລົງໂທດ​ດ້ວຍ​ການ​ປັບ​ໃໝ​ເປັນ​ເງິນ 120.000 ຣິງ​ກິດ (1 ໂດ​ລາ​ສະ­ຫະ­ລັດ ແລກ​ໄດ້ 3 ຣິງ​ກິດ​ປາຍ) ພາຍຫຼັງ​ພົບ​ວ່າ​ມີ​ຄວາມ​ຜິດ​ຖານ​ມີ​ລິ່ນ​ເປັນໆ​ໄວ້​ໃນ​ຄອບຄອງ ຈຳ­ນວນ 109 ໂຕ ສານ​ໄດ້​ກຳ­ນົດ​ລະ­ອຽດວ່າ ຖ້າ​ຜູ້​ກະ­ທຳ​ຜິດ​ບໍ່​ເສຍ​ຄ່າ​ປັບ​ໃໝ​ຕາມ​ຈຳ­ນວນ  ແລະ ຕາມ​ກຳ­ນົດ​ເວ­ລາ​ແລ້ວ ເຂົາ​ຈະ​ຕ້ອງ​ຕິດ​ຄຸກເປັນ​ເວ­ລາ 1 ປີ ທ້າວ ມານ​ຊໍ ຮັດ ມີ​ອາ­ຊີບ​ບໍ່​ຖາວອນ ທັງ​ເຮັດ​ນາ ທັງ​ເປັນ​ແຮງ​ງານ​ຂີດ​ຢາງ­ພາ­ລາ ລິ່ນ 109 ໂຕ​ນັ້ນ ເຂົາ​ມັດ​ໄວ້​ຖົງ​ຕາ​ໜ່າງ ຍັດ​ມ້ຽນໃສ່ກະ­ເປົາ ຊຶ່ງ​ນອກ­ຈາກ​ມີ​ຄວາມ​ຜິດ​ກ່ຽວ​ກັບ​ການຄ້າ​ສັດ­ປ່າ​ທີ່​ຫວງ​ຫ້າມ​ແລ້ວ ເຂົາ​ຍັງ​ຖືກ​ຕິດ​ຄະ­ດີທໍ­ລະ­ມານ​ສັດ​ອີກ​ດ້ວຍ.

ທີ່ ສ ເກົາ­ຫຼີ: ໃນ​ຕົ້ນ​ເດືອນ​ນີ້ ໜັງ­ສື­ພິມ ກໍ​ເຣຍ ເຮຣັນ (Korea Herald) ກະ­ຈາຍ​ຂ່າວ​ວ່າ ຮຸນ​ໄດ ບໍ­ລິ­ສັດ​ຜະ­ລິດ​ລົດ​ລະ­ດັບ​ຫົວ​ແຖວ​ຂອງ ສ ເກົາ­ຫຼີ ມີແຜນ​ຜະ­ລິດ​ລົດ​ໃໝ່ 14 ຍີ່­ຫໍ້ ທີ່​ເປັນ​ມິດ​ກັບ​ສິ່ງ​ແວດລ້ອມ ພາຍ​ໃນ 4 ປີ​ຂ້າງ​ໜ້າ ລົດ​ທີ່​ວ່ານີ້​ມີ​ຄຸນ​ລັກສະ​ນະ​ສາມ​ປະ­ການ ຄື: ສະ­ອາດ ເປັນ​ອິດ­ສະ­ຫຼະ ແລະ ມີ​ຄວາມ​ສຳ­ພັນ​ກັນ (Clean Free & Connected) ທ່ານ ຈຸງ ອຸຍ-ຊຸນ (Chung Eui-Sun) ຮອງ​ປະ­ທານ​ບໍ­ລິ­ສັດ​ຜະ­ລິດ​ລົດ​ຮຸນ​ໄດ ໄດ້​ບອກ​ວ່າ: ນອກ­ຈາກ​ສາມ​ຄຸນ​ລັກ­ສະນະ​ແລ້ວ ທາງ​ບໍ­ລິ­ສັດ​ຍັງຈະ​ຄິດ​ຄົ້ນ​ເລື່ອງ​ວິ­ທີ​ການ​ຂັບ​ຂີ່​ລົດ​ແບບ​ສະ­ບາຍ ທ່ານ​ໃຫ້​ຄວາມ​ໝາຍ​ຂອງ​ຄຳ​ວ່າ “ສະ­ອາດ” ວ່າ ທັງ​ເປັນ​ມິດ​ກັບ​ສິ່ງ­ແວ­ດລ້ອມ ຍ້ອນ​ໃຊ້​ພະ­ລັງ­ງານໄຟ­ຟ້າ ແລະ ທັງ​ສາ­ມາດ​ປັບ​ໃຊ້​ລະ­ບົບ​ໄຮ​ບຣິດ (Hybrids) ໄດ້.

ຂ່າວທີ່ກ່ຽວຂ້ອງ