ຂ່າວຫຼ້າສຸດ

ສານຕັດສິນຄະດີຄ້າຂາຍຢາເສບຕິດ

119 11 ມ.ກ. 2017 ຂ່າວໜ້າ​ໜຶ່ງ

ໃນ​ອາທິດ​ຜ່ານ​ມາ ຄະນະ​ສານ​ອາຍາສານ​ປະຊາຊົນ​ຂັ້ນ​ຕົ້ນ ນະຄອນຫຼວງ​ວຽງ​ຈັນ ນຳ​ເອົາ​ຈຳເລີຍ​ຊື່​ນາງ ພວງ​ວັນ ອາຍຸ 44 ປີ ຢູ່​ບ້ານ​ນາ​ໄຊ ນະຄອນຫຼວງ​ວຽງ​ຈັນ ຂຶ້ນ​ມາ​ຕັດສິນ​ໃນ​ສະຖານ​ຄ້າຂາຍ​ຢາ​ເສບ​ຕິດ.

ຜ່ານ​ການ​ວິ​ນິໄສ ການ​ຄົ້ນຄວ້າ​ບັນດາ​ຂໍ້​ມູນ​ຫຼັກ​ຖານ ແລະ ເອກະສານ​ຕ່າງໆ​ທີ່​ມີ​ຢູ່​ໃນ​ສຳນວນ​ຄະດີ​ຢ່າງ​ຄົບ​ຖ້ວນ​ຂອງ​ສານ​ແລ້ວ ເຫັນ​ວ່າການ​ກະທຳ​ຂອງ​ຈຳເລີຍ​ເປັນ​ການ​ກະທຳ​ຜິດ​ທາງ​ອາຍາ ໃນ​ຂໍ້​ຫາ​ການ​ຄ້າຂາຍ​ຢາ​ເສບ​ຕິດ ​ດັ່ງ​ທີ່​ໄດ້​ກຳນົດ​ໄວ້​ໃນ​ມາດຕາ 2 ຂໍ້ 2 ວັກ 1 ຂອງ​ກົດໝາຍ​ວ່າ​ດ້ວຍ​ການ​ປັບປຸງ ມາດຕາ 146 ຂອງກົດໝາຍ​ອາຍາ ເຊິ່ງ​ການ​ກະທຳ​ດັ່ງກ່າວ​ຂອງ​ຈຳເລີຍ ​ແມ່ນ​ໄດ້​ສະແດງ​ອອກຄື: ນາງ ພວງ​ວັນ ໄດ້​ເລີ່ມ​ຄ້າຂາຍ​ຢາ​ເສບ​ຕິດ​ມາ​ແຕ່ເດືອນ​ມີນາ 2016 ຢາ​ບ້າ​ທີ່​ນຳ​ມາ​ຂາຍ​ແມ່ນໄດ້​ຊື້​ນຳ​ທ້າວ ນ້ອຍ ຄົນ​ບ້ານ​ດຽວ​ກັນ ຊື້​ຄັ້ງ​ລະ 10 ເມັດ ເມື່ອ​ໄດ້ຢາ​ບ້າ​ມາ​ແລ້ວ ​ກໍ່​ນຳໄປ​ຂາຍ​ໃຫ້​ໄວ​ລຸ້ນ​ແຖວ​ບ້ານ​ນາ​ໄຫ ເດືອນ​ເມສາ 2016 ຜູ້ກ່ຽວ​ໄປ​ຊື້ຢາ​ບ້າ​ນຳ​ທ້າວ ນ້ອຍ ຈຳນວນ 190 ເມັດ ແລ້ວ​ນຳ​ມາ​ຂາຍ​ໝົດ 38 ເມັດ ຍັງ​ເຫຼືອ 152 ເມັດ ມາ​ວັນ​ທີ 13 ພຶດສະພາ 2016 ຈຶ່ງ​ຖືກ​ເຈົ້າໜ້າທີ່​ເຂົ້າ​ກັກ​ຕົວ​ມາ​ດຳເນີນ​ຄະດີ.

ເມື່ອ​ສານ​ຄົ້ນຄວ້າ​ຂໍ້​ມູນ​ຫຼັກ​ຖານ​ແລ້ວ​ເຫັນ​ວ່າ​ມີ​ຄວາມ​ຜິດຢ່າງ​ຈິງ ດັ່ງນັ້ນ ເຫັນ​ຄວນ​ຈຳ​ຄຸກນາງ ພວງ​ວັນ 5 ປີ 9 ເດືອນ ປັບໃໝ 25 ລ້ານ​ກີບ ຢຶດ​ຢາ​ບ້າ​ຈຳນວນ 152 ເມັດ ມອບ​ໃຫ້​ເຈົ້າ​ໜ້າທີ່​ກ່ຽວຂ້ອງ​ນຳໄປ​ທຳລາຍ​ຖິ້ມ ຢຶດ​ເງິນ​ຈຳນວນ 1.720.000 ກີບ ເຂົ້າ​ເປັນ​ຂອງ​ລັດ ທີ່​ເຫັນ​ວ່າເງິນ​ຈຳນວນ​ດັ່ງກ່າວ ແມ່ນ​ມີສ່ວນ​ກ່ຽວຂ້ອງ​ຈາກ​ການ​ຄ້າຂາຍຢາ​ເສບ​ຕິດ.

ຂ່າວທີ່ກ່ຽວຂ້ອງ