ເປີດນຳໃຊ້ໂຄງການສາຍສົ່ງ ໜອງເດີ່ນ-ເຊໂນ-ເມືອງພິນ

175 11 ມ.ກ. 2017 ຂ່າວໜ້າ​ໜຶ່ງ
ເປີດນຳໃຊ້ໂຄງການສາຍສົ່ງ ໜອງເດີ່ນ-ເຊໂນ-ເມືອງພິນ

ພິທີ​ເປີດ​ການ​ນຳ​ໃຊ້​ໂຄງການ​ສາຍ​ສົ່ງ 115 ກິ​ໂລ​ໂວນ ໜອງ​ເດີ່ນ-ເຊ​ໂນ-ເມືອງ​ພິນ ຢ່າງເປັນ​ທາງ​ການ ຈັດ​ຂຶ້ນ​ວັນ​ທີ 9 ມັງກອນ 2017 ທີ່​ສະຖານີ​ເຊ​ໂນ ເມືອງ​ອຸທຸມພອນ ແຂວງ​ສະຫວັນນະ​ເຂດ ໃຫ້​ກຽດ​ເຂົ້າ​ຮ່ວມ​ຂອງທ່ານ ສີ​ນາວາ ສຸ​ພານຸ​ວົງ ຮອງລັດຖະມົນຕີ​ກະຊວງ​ພະລັງງານ ແລະ ບໍ່​ແຮ່ ທ່ານ ທ່ອນ​ແກ້ວ ພຸດ​ທະ​ໄກລາດ ຮອງ​ເຈົ້າແຂວງສະຫວັນ​ນະ​ເຂດ ທ່ານ ດວງ​ສີ ພາ​ຣາ​ຍົກ ຮອງ​ຜູ້ອຳນວຍການໃຫຍ່​ລັດ​ວິ​ສາ​ຫະ​ກິດ​ໄຟຟ້າລາວ ທ່ານ Wang Long Hai ປະທານບໍລິສັດ CERIECO ພ້ອມ​ທັງ​ອົງການ​ປົກຄອງ​ທ້ອງຖິ່ນ ແລະ ແຂກ​ຖືກ​ເຊີນ.

ທ່ານ ດວງ​ສີ ພາ​ຣາ​ຍົກ ໄດ້​ກ່າວ​ວ່າ: ໂຄງການ​ສາຍ​ສົ່ງ 115 ກິ​ໂລ​ໂວນ ໜອງ​ເດີ່ນ-ເຊ​ໂນ-ເມືອງ​ພິນ ແມ່ນ​ໂຄງການ​ໜຶ່ງທີ່ເຊື່ອມ​ຕໍ່​ສາຍ​ສົ່ງ​ແຮງ​ສູງ 115 ກິໂລ​ໂວນ ລະຫວ່າງແຂວງ​ສະຫວັນ​ນະ​ເຂດຫາ​ແຂວງ​ສາລະວັນ ແລະ ແຂວງ​ເຊ​ກອງ ພ້ອມດຽວ​ກັນ​ນີ້ ກໍ່​ເຊື່ອມ​ຕໍ່​ກັບ​ບັນດາເຂື່ອນ​ຕ່າງໆ​ທາງ​ພາກ​ໃຕ້​ຂອງ ​ສປປ ລາວ ເປັນຕົ້ນ​ແມ່ນເຂື່ອນຫ້ວຍ​ລຳ​ພັນ​ໃຫຍ່ ເຂື່ອນ​ເຊ​ເສັດ 1 ແລະ 2 ສິ່ງ​ສຳຄັນ​ຍັງ​ເປັນ​ຈຸດເຊື່ອມ​ຕໍ່​ກັບ​ລະບົບ​ສາຍ​ສົ່ງ 115 ກິ​ໂລ​ໂວນ​ຂອງ​ປະເທດ​ຫວຽດນາມ ໃນ​ອະນາຄົດ ພ້ອມ​ດຽວກັນ​ນີ້ ສາຍ​ສົ່ງ​ດັ່ງກ່າວ​ຍັງ​ສາມາດ​ເຊື່ອມ​ຕໍ່​ກັບ​ສາຍ​ສົ່ງ​ທີ່​ມີແລ້ວ​ເປັນ​ວົງ​ແຫວນ ເພື່ອ​ຮັບ​ປະກັນ​ການ​ສະໜອງ​ພະລັງງານ​ໄຟຟ້າ​ໃຫ້​ແກ່​ພາກ​ກາງ ເວົ້າ​ລວມ ເວົ້າ​ສະເພາະແມ່ນ​ເຂດ​ເສດ​ຖະກິດ​ພິເສດ​ສະຫວັນ-ເຊ​ໂນ ອີກດ້ວຍ.

ໂຄງການ​ດັ່ງກ່າວ​ນີ້ ໄດ້​ກວມເອົາຈຳນວນ 5 ເມືອງ​ຂອງແຂວງ​ສະຫວັນ​ນະ​ເຂດ ເຊິ່ງປະກອບ​ມີເມືອງ​ອຸທຸມພອນ ໄກສອນ ພະ​ລານ​ໄຊ ອາດ​ສະພັງທອງ ແລະ ເມືອງ​ພິນ ປະກອບມີ​ພາກ​ກໍ່ສ້າງ​ສາຍ​ສົ່ງ ແລະ ພາກ​ກໍ່ສ້າງ​ສະຖານີ.

ຂ່າວທີ່ກ່ຽວຂ້ອງ