ຮ່ວມກັນສະໜອງລະບົບໂທລະຄົມ ຮັບໃຊ້ໂຄງການທາງລົດໄຟ ລາວ-ຈີນ

184 11 ມ.ກ. 2017 ຂ່າວໜ້າ​ໜຶ່ງ
ຮ່ວມກັນສະໜອງລະບົບໂທລະຄົມ ຮັບໃຊ້ໂຄງການທາງລົດໄຟ ລາວ-ຈີນ

ພິທີ​ເຊັນ​ສັນຍາໂຄງການ​ລະບົບ​ສື່ສານ-ໂທລະ​ຄົມມະນາຄົມ ແລະ ICT ເພື່ອ​ຮັບ​ໃຊ້​ໂຄງການກໍ່ສ້າງ​ທາງ​ລົດໄຟ ລາວ-ຈີນ (ບໍ່ເຕັນ-ນະຄອນຫຼວງ​ວຽງ​ຈັນ) ໄດ້ຈັດ​ຂຶ້ນ​ວັນ​ທີ 9 ມັງກອນ 2017 ທີ່ໂຮງແຮມ​ດອນ​ຈັນ​ພາ​ເລດ ລະຫວ່າງທ່ານ Zhao Xiang ຜູ້ອຳນວຍການບໍລິສັດ​ ທາງ​ລົດໄຟ ລາວ-ຈີນ ຈຳກັດ ທ່ານ ຖາວອນ ສົມ​ສະ​ກຸນ ຜູ້ອຳນວຍການໃຫຍ່​ບໍລິສັດ​ລັດ​ວິ​ສາ​ຫະ​ກິດລາວ​ໂທລະ​ຄົມມະນາຄົມ ທ່ານ Ding Yongbing ຜູ້​ຈັດການທົ່ວ​ໄປ ບໍລິສັດ Lao Asia Pacific Satellite ແລະ ທ່ານ Sun Lei ຫົວໜ້າຝ່າຍ​ເຕັກ​ໂນໂລ​ຊີ ບໍລິສັດ Huawei Technologies (Lao) Sole ໂດຍ​ມີ​ທ່ານ ທັນ​ສະໄໝ ກົມ​ມະສິດ ລັດຖະມົນຕີກະຊວງ​ໄປ​ສະນີ ໂທລະ​ຄົມມະນາຄົມ ແລະ ການ​ສື່ສານ ພ້ອມ​ດ້ວຍ​ຫົວໜ້າກົມ-ຮອງ​ກົມ ຫົວໜ້າ​ສູນ​ອິນ​ເຕີເນັດ​ແຫ່ງ​ຊາດ ຄະນະ​ບໍລິຫານຂອງ​ທັງ 4 ບໍລິສັດ ແລະ ສື່​ມວນຊົນ​ເຂົ້າ​ຮ່ວມ.

ທ່ານ ຖາວອນ ສົມ​ສະ​ກຸນ ກ່າວ​ວ່າ: ບໍລິສັດ ​ລັດ​ວິ​ສາ​ຫະ​ກິດລາວ​ໂທລະ​ຄົມມະນາຄົມ ໄດ້​ຖືກຄັດ​ເລືອກ​ຈາກ​ບໍລິສັດ ທາງ​ລົດໄຟ ​ລາວ-ຈີນ ໃຫ້​ເປັນ​ຜູ້​ສະໜອງລະບົບ​ຕິດຕໍ່​ສື່ສານ-ໂທລະ​ຄົມມະ​ນາ​ຄົມ ແລະ ICT ທັງ​ໝົດຂອງ​ໂຄງການ ເຊິ່ງ​ລາວ​ໂທລະຄົມ ໄດ້​ຮ່ວມ​ກັບ​ບໍລິສັດ​ຄູ່​ຮ່ວມທຸລະ​ກິດທີ່​ເປັນ​ບໍລິສັດ​ທີ່​ມີ​ຊື່​ສຽງ ເປັນ​ອັນ​ດັບ​ແຖວ​ໜ້າ​ໃນ​ອຸດ​ສາຫະ​ກຳ ທາງ​ດ້ານ​ໂທລະ​ຄົມ​ມະນາ​ຄົມ ແລະ ການ​ສື່ສານ ເຊັ່ນ: ບໍລິສັດ Lao Asia Pacific Satellite ແລະ ບໍລິສັດ Huawei Technologies ໃນ​ການ​ດຳເນີນ​ການ​ສ້າງ​ລະບົບການ​ສື່ສານ​ໂທລະ​ຄົມມະນາຄົມ ແລະ ICT ເພື່ອ​ຮັບ​ໃຊ້​ໂຄງການດັ່ງກ່າວ​ໃນ​ການ​ບໍລິການ​ເປັນ​ເວລາ 5 ປີ ເທົ່າ​ກັບໄລຍະ​ທີ່​ໃຊ້​ໃນການ​ດຳເນີນ​ການ​ກໍ່ສ້າງ​ທາງລົດໄຟ ແຕ່​ຊາຍ​ແດນ ລາວ-ຈີນ (ບໍ່​ເຕັນ-ຫຼວງ​ນ້ຳ​ທາ-ນະຄອນຫຼວງ​ວຽງ​ຈັນ) ມີ​ໄລຍະ​ທາງຍາວ 414,6 ກິໂລແມັດ.

ລາວ​ໂທລະ​ຄົມ ແລະ ຄູ່ຮ່ວມ​ທຸລະ​ກິດ ຈະ​ດຳເນີນ​ການສ້າງ​ລະບົບ​ການ​ສື່ສານ​ໂທລະຄົມມະນາຄົມ ແລະ ICT ສະໜອງ​ໃຫ້​ຄວບ​ຄຸມ​ສະຖານທີ່​ຫ້ອງການ​ເຮັດ​ວຽກ ສູນ​ຄວບ​ຄຸມ​ການປະຕິບັດ​ການ​ກໍ່ສ້າງ ຕະຫຼອດເສັ້ນທາງ ລວມ​ຈຳນວນ 77 ຈຸດ ໂດຍ​ການ​ນຳ​ໃຊ້​ລະບົບສາຍ​ສົ່ງ ສາຍ​ໄຟ​ເບີ​ອອບ​ຕິກ ແລະ ດາວທຽມ ເພື່ອ​ສະໜອງບໍລິການ​ໂທລະ​ສັບ​ມື​ຖື 3G 4G ອິນ​ເຕີ​ເນັດຄວາມ​ໄວ​ສູງ ການ​ຮັບ​ສົ່ງ​ຂໍ້​ມູນການ​ປະຊຸມ​ທາງໄກຜ່ານ​ລະບົບວິ​ດີ​ໂອ ແລະ Wi-Fi ເປັນຕົ້ນ ມູນ​ຄ່າ​ຂອງ​ໂຄງການ​ນີ້​ແມ່ນຫຼາຍ​ກວ່າ 22 ລ້ານ​ຢວນ ຫຼື ປະມານ 27 ຕື້​ກີບ.

ຂ່າວທີ່ກ່ຽວຂ້ອງ