ໂຣ​ນັນ​ໂດ ຄວ້າ​ລາ­ງວັນ “ໂດດ​ເດັ່ນ​ທີ່​ສຸດ" ຂອງ​ຟີ​ຟ່າ

85 11 ມ.ກ. 2017 ວົງຈອນກີລາ
ໂຣ​ນັນ​ໂດ ຄວ້າ​ລາ­ງວັນ “ໂດດ​ເດັ່ນ​ທີ່​ສຸດ" ຂອງ​ຟີ​ຟ່າ

ລາ­ງວັນ​ນັກ​ເຕະ­ບານ​ຊາຍ​ໂດດ​ເດັ່ນ ຫຼື The Best FIFA Men’s Player Award ຄື​ສຸດ​ຍອດ​ລາ­ງວັນ​ອັນ​ຍິ່ງ​ໃຫຍ່​ທີ່​ນັກເຕະ​ທຸກ​ຄົນ​ໄຝ່​ຝັນ​ຢາກ​ຈະ​ຄອບ​ຄອງ​ຈັກ​ຄັ້ງ​ໃນ​ຊີ­ວິດ​ຄ້າ​ຝີ​ຕີນ ເຊິ່ງ​ໃນ​ປີ 2016 ມີ​ຜູ້​ເຂົ້າ​ຊີງ 3 ຄົນ​ສຸດ​ທ້າຍ ໄດ້­ແກ່ ຄຣິ​ສ​ເຕຍ​ໂນ່ ໂຣ​ນັນ​ໂດ, ລິ​ໂອ​ເນວ ເມ​ສ​ຊີ່ ແລະ ອັອງ​ຕວນ ກຣີ​ຊ​ມັນ.

ງານ​ປະ­ກາດ​ລາ­ງວັນ​ໂດດ​ເດັ່ນ​ແຫ່ງ​ປີ​ຂອງ​ຟີ​ຟ່າ​ໃນ​ຄັ້ງ​ນີ້ ທີ່​ຖືກ​ຈັດ​ຂຶ້ນ​ທີ່​ເມືອງ​ຊູ​ຣິກ ປະ­ເທດ​ສວິດ ໄດ້​ປະ­ກາດ​ຜົນ​ອອກມາ​ແລ້ວ ໂດຍ​ເປັນ ຄຣິ​ສ​ເຕຍໂນ່ ໂຣ​ນັນ​ໂດ ດາວ​ເຕະ​ຊາວ​ປອກ​ຕຸຍ​ການ ເຈົ້າ​ຂອງລາ­ງວັນ​ບັນ​ລົງດໍ ປີ​ນີ້ ທີ່​ຄວ້າ​ລາ­ງວັນດັ່ງ­ກ່າວ​ໄປຄອງ​ອີກ​ລາ­ງວັນ.

ສຳ­ລັບ​ຜົນ­ງານ​ຂອງ ໂຣ​ນັນ​ໂດ ໃນ​ປີ​ທີ່​ຜ່ານ​ມາ ຖື​ວ່າ​ໂດດ​ເດັ່ນ​ສຸດໆ ຫຼັງ​ມີ​ສ່ວນ​ພາ​ທີມ​ຊາດ​ປອກ​ຕຸຍ​ການ​ ຄວ້າ​ແຊັມ​ເອີໂຣ 2016 ນອກ­ຈາກ​ນີ້​ຍັງ​ພາ​ສະ­ໂມ­ສອນ ຣີວ ມາດ​ຣິດ ຊູ​ຂັນ​ແຊັມ​ຢູ​ຟ່າ ແຊັມ​ປຽນ ລີກ ອີກ​ດ້ວຍ.

ທັງ​ນີ້​ຍັງ​ມີ​ລາ­ງວັນ​ອື່ນ​ອີກ​ທີ່​ປະ­ກາດ​ພ້ອມ​ກັນ​ໃນ​ງານ​ດັ່ງ­ກ່າວ ສຳ­ລັບ​ລາ­ງວັນ​ນັກ​ເຕະ​ເພດ​ຍິງ​ໂດດ​ເດັ່ນ​ແຫ່ງ​ປີ​ໄດ້­ແກ່ ຄາລີ ລອຍ ກອງ​ກາງ​ທີມ​ຊາດ​ສະ­ຫະ­ລັດ​ອາ​ເມ​ຣິ​ກາ ຂອງ​ທີມ​ຮຸ​ສ​ຕັນ​ແດ​ຊ.

ໃນ​ຂະ­ນະ​ທີ່​ລາ­ງວັນ​ຜູ້​ຈັດ­ການ​ທີມ​ໂດດ​ເດັ່ນ​ຕົກ​ເປັນ​ຂອງ ເຄ​ລາ​ດິ​ໂອ ຣາ​ນິ​ເອ​ຣີ່ ຫຼັງ​ພາ ເລ​ສ​ເຕີ ຊິ​ຕີ ຄວ້າ​ແຊັມ ​ພຣີ​ເມຍ​ລີກ ເປັນ​ສະ­ໄໝ​ທຳ​ອິດຂອງ​ສະ­ໂມ­ສອນ ສ່ວນ​ລາ­ງວັນ​ລູກ​ຍິງ​ສຸດ​ສວຍ​ງາມແຫ່ງ​ປີ ຫຼື ປຸ​ສກັສ ອະ​ວອດ ຕົກ​ເປັນ​ຂອງ ໂມດ ຟາ​ອິ​ຊ ຊູບ​ຣີ ກອງ​ກາງ​ຊາວ​ມາ​ເລ​ເຊຍ ຈາກ​ສະ­ໂມ­ສອນ ປີ​ນັງ ເອ​ຟ​ເອ ຍິງ​ລູກ​ໂທດ​ນອກ​ເຂດ​ສຸດ​ມະ­ຫັດ­ສະ­ຈັນໃສ່​ທີມ​ປາ​ຫັງ.

ຂ່າວທີ່ກ່ຽວຂ້ອງ