ຂ່າວຫຼ້າສຸດ

ຫຼາຍບັນຫາສຳຄັນ ຖືກຍົກຂຶ້ນມາຊີ້ແຈງຕໍ່ກອງປະຊຸມສະພາ

170 11 ມ.ກ. 2017 ຂ່າວໜ້າ​ໜຶ່ງ
ຫຼາຍບັນຫາສຳຄັນ ຖືກຍົກຂຶ້ນມາຊີ້ແຈງຕໍ່ກອງປະຊຸມສະພາ

ກອງ​ປະຊຸມ​ສະໄໝ​ສາມັນເທື່ອ​ທີ 2 ຂອງ​ສະພາ​ປະຊາຊົນນະຄອນຫຼວງ​ວຽງ​ຈັນ (ນວ) ໄດ້ດຳເນີນ​ເປັນ​ມື້​ທີ 2 ໃນ​ວັນ​ທີ 10 ມັງກອນ 2017 ໂດຍ​ເປັນ​ປະທານຂອງ​ທ່ານ ອຸດອນ ໄຊ​ມຸນຕີ ຮອງປະທານ​ສະພາ​ປະຊາຊົນ ນວ ມີທ່ານ​ເຈົ້າ​ຄອງ ຮອງ​ເຈົ້າ​ຄອງ ນວ ພ້ອມ​ດ້ວຍ​ບັນດາ​ສະມາຊິກ​ສະພາ​ແຫ່ງ​ຊາດ ການ​ນຳ ນວ ອະດີດ​ການ​ນຳ ນັກ​ປະຕິວັດ​ອາວຸໂສ ຕົວ​ແທນ​ນັກທຸລະກິດ ແລະ ແຂກຖືກ​ເຊີນ​ເຂົ້າ​ຮ່ວມ.

ກອງ​ປະຊຸມ​ໄດ້​ຮັບ​ຟັງ​ລາຍງານ​ຈາກ​ພະແນກການ​ຕ່າງໆ​ ທີ່ໄດ້​ຜັດປ່ຽນ​ກັນ​ຂຶ້ນ​ສະເໜີ ແລະ ຊີ້​ແຈງ​ຄຳ​ຊັກ​ຖາມ​ບັນຫາ​ສຳຄັນຕ່າງໆ​ຂອງ ​ສສ ນວ ເປັນຕົ້ນ ບົດ​ລາຍ​ງານ​ກ່ຽວ​ກັບ​ສະພາບການຈັດຕັ້ງ​ປະຕິບັດ​ແຜນ​ງົບ​ປະມານ​ແຫ່ງ​ລັດ ສົກ​ປີ 2015-2016 ການຈັດຕັ້ງ​ປະຕິບັດ​ເກັບລາຍ​ຮັບ​ເຂົ້າ​ງົບປະມານ 3 ເດືອນ​ຂ້າມ​ຜ່ານ​ທ້າຍ​ປີ 2016 ແລະ ແຜນ​ງົບປະມານ​ແຫ່ງ​ລັດ 2017 ສາເຫດ​ທີ່​ພາໃຫ້​ເກັບ​ລາຍຮັບ​ອາກອນ​ບໍ່​ໄດ້​ຕາມ​ແຜນການ 4 ປີ​ຕໍ່​ເນື່ອງ ບົດ​ລາຍ​ງານ​ຫັນ​ດິນສອງ​ຟາກ​ຖະໜົນ​ເພື່ອ​ເປັນ​ທຶນຂອງ​ໂຄງການ​ກໍ່ສ້າງ​ທາງ 450 ປີ ບັນຫາ​ຕອນ​ດິນ​ທີ່​ຕົກ​ຄ້າງ ແລະ ບໍ່​ທັນ​ອອກ​ໃບ​ຕາດິນ ການຄຸ້ມ​ຄອງ​ເຂດ​ປ່າ​ສະຫງວນ​ດົງ​ໂພສີ ເຫດຜົນ​ຂອງ​ການ​ຖອນ​ໃບຕາດິນ​ຂອງ​ປະຊາຊົນຢູ່​ເສັ້ນທາງ 450 ປີ ແລະ ໄດ້​ມີ​ມາດ​ຕະການຄຸ້ມ​ຄອງ​ຕໍ່​ໂຮງ​ຈັກ​ໂຮງງານ ທີ່ປ່ອຍ​ມົນ​ລະ​ພິດ​ທາງ​ອາກາດ-ທາງນ້ຳ.

ໂອກາດ​ນີ້ ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ໄດ້​ສະຫຼຸບ​ຄຳ​ຊີ້ແຈງ​ຕໍ່​ກອງ​ປະຊຸມ ເຊິ່ງບັນຫາ​ສຳຄັນ​ນັ້ນ ​ຕ້ອງ​ມີ​ການ​ປັບປຸງ​ແບບແຜນ​ວິທີ​ເຮັດ​ວຽກ​ຄືນໃໝ່ ພ້ອມ​ທັງ​ເນັ້ນ​ການ​ຫັນ​ລົງ​ກໍ່ສ້າງ​ຮາກ​ຖານ ຖື​ເອົາ​ວຽກ​ງານ 3 ສ້າງ​ເປັນ​ບັນຫາ​ຕົ້ນຕໍ ແບ່ງ​ຂັ້ນຄວາມ​ຮັບຜິດຊອບ​ເປັນ​ອັນ​ລະອຽດ ແລະ ບັນຫາ​ສຳຄັນ​ແມ່ນການ​ຍົກ​ສູງ​ຄວາມ​ຮູ້​ຄວາມ​ສາມາດ​ຂອງ​ພະນັກງານ​ນຳພາ ແລະ ຜູ້​ລົງ​ປະຕິບັດ​ໜ້າທີ່​ວິຊາສະເພາະ​ໃນ​ແຕ່​ລະ​ຂະແໜງການ ເພື່ອ​ພ້ອມ​ກັນ​ພັດທະນາ​ນະຄອນຫຼວງ ​ໃຫ້​ມີ​ຄວາມ​ຈະເລີນ​ຮຸ່ງເຮືອງ​ສີວິໄລ ໃຫ້​ສາມາດ​ເທົ່າທຽມ​ກັບ​ພາກ​ພື້ນ ແລະ ສາກົນ.

ຂ່າວທີ່ກ່ຽວຂ້ອງ