ຂ່າວຫຼ້າສຸດ

ລາວ-ກຳປູເຈຍ ເປີດນຳໃຊ້ດ່ານສາກົນເພື່ອເຊື່ອມຈອດອາຊຽນ-ພາກພື້ນ

123 11 ມ.ກ. 2017 ຂ່າວໜ້າ​ໜຶ່ງ

ລາວ-ກຳປູເຈຍ ຮ່ວມ​ກັນ​ເປີດ​ນຳ​ໃຊ້​ດ່ານ​ສາກົນ​ໜອງ​ນົກຂຽນ-ຕຣາ​ປຽງ​ກຣຽນ ລະຫວ່າງ​ສອງ​ປະເທດ​ຢ່າງ​ເປັນ​ທາງ​ການ ໃນ​ວັນ​ທີ 10 ມັງກອນ 2017 ນີ້ ຢູ່​ເມືອງ​ໂຂງ ແຂວງ​ຈຳປາ​ສັກ ເພື່ອ​ຍົກ​ລະດັບດ້ານ​ການ​ພັດທະນາ​ເສດຖະກິດ-ສັງຄົມ ທ່ອງ​ທ່ຽວ ການ​ຄ້າ ການ​ລົງທຶນ ແລະ ເຊື່ອມ​ຈອດ​ກັບ​ອາ​ຊຽນ ແລະ ພາກ​ພື້ນ ເຊິ່ງ​ພິທີ​ເປີດ​ດ່ານ​ດັ່ງກ່າວ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ແຫ່ງ ​ສປປ ລາວ ແລະ ທ່ານສົມເດັດ​ອັກຄະມະຫາເສນາ​ບໍດີ ເຕ​ໂຈ​ຮຸນ​ແຊນ ນາຍົກລັດຖະມົນຕີ ແຫ່ງ ​ຣາ​ຊະ​ອານາຈັກ​ກຳປູເຈຍ ໄດ້​ໃຫ້​ກຽດ​ເຂົ້າ​ຮ່ວມ.

ທ່ານ ທອງ​ລຸນ ສີ​ສຸ​ລິດ ກ່າວ​ວ່າ: ດ່ານ​ສາກົນ​ໜອງ​ນົກຂຽນ-ຕຣາ​ປຽງ​ກຣຽນ ເປັນ​ດ່ານ​ສາກົນ​ແຫ່ງທຳ​ອິດ​ລະຫວ່າງ ​ສປປ ລາວ ແລະ ຣາ​ຊະ​ອານາຈັກ​ກຳປູເຈຍ ຜ່ານ​ມາ​ເຄີຍ​ເປັນ​ດ່ານ​ທ້ອງຖິ່ນ ແລະ ໄດ້​ຍົກ​ລະດັບ​ຂຶ້ນ​ເປັນ​ດ່ານ​ສາກົນ ລັດຖະບານ​ສອງ​ປະເທດ​ ໄດ້​ຕົກລົງ​ຍົກ​ລະດັບ​ໃຫ້​ເປັນ​ດ່ານ​ສາກົນມາ​ແຕ່​ຕົ້ນ​ເດືອນ​ເມສາ 2009 ຈົນ​ມາ​ເຖິງ​ປັດຈຸບັນ ເຊິ່ງ​ການ​ເປີດ​ດ່ານ​ສາກົນ​ນີ້ ຈັດ​ຂຶ້ນ​ໃນ​ທ່າມກາງ​ບັນຍາກາດ​ທີ່ສອງ​ປະເທດ​ ໄດ້​ສະເຫຼີມສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດລະຫວ່າງ​ສອງ​ປະເທດ ລາວ-ກຳປູເຈຍ ແລະ ກຳປູເຈຍ-ລາວ ຄົບຮອບ 60 ປີ ທັງ​ເປັນ​ການ​ຕອບ​ສະໜອງ​ຄວາມ​ມຸ່ງ​ມາດ​ປາຖະໜາ ເພື່ອ​ຮັດແໜ້ນ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ອັນ​ດີລະຫວ່າງ​ປະຊາຊົນ​ສອງ​ປະເທດ ​ໃຫ້​ແໜ້ນ​ແຟ້ນຍິ່ງໆ​ຂຶ້ນ.

​ສປປ ລາວ ແລະ ຣາ​ຊະ​ອານາຈັກ​ກຳປູເຈຍ ເປັນ​ປະເທດ​ບ້ານ​ໃກ້​ເຮືອນ​ຄຽງ ບ້ານ​ພີ່​ເມືອງ​ນ້ອງ ມີຊາຍ​ແດນ ແລະ ແມ່ນ້ຳ​ລຳເຊ​ຕິດ​ຈອດ​ກັນ 535 ກິໂລແມັດ ນັບ​ແຕ່​ປີ 2000 ເປັນຕົ້ນ​ມາຈົນ​ເຖິງ​ປັດ​ຈຸບັນ​ ສອງ​ປະເທດ​ສາມາດ​ສຳ​ຫຼວດ ແລະ ປັກ​ຫຼັກ​ໝາຍ​ໄດ້​ທັງ​ໝົດ 126 ຫຼັກ ລວມ​ຄວາມ​ຍາວ​ທັງ​ໝົດ 465 ກິໂລແມັດ ກວມ​ເອົາ 87% ຂອງ​ຄາດໝາຍ​ທີ່​ວາງ​ໄວ້ ແລະ ອື່ນໆ.

ຂ່າວທີ່ກ່ຽວຂ້ອງ