ຊຽງ​ຂວາງ ພ້ອມ​ສົ່ງ 10 ປະ­ເພດ​ກີ­ລາ ຮ່ວມ“ ນົກ­ກົກ​ຄຳ ເກມ 2017”

102 11 ມ.ກ. 2017 ວົງຈອນກີລາ
ຊຽງ​ຂວາງ ພ້ອມ​ສົ່ງ 10 ປະ­ເພດ​ກີ­ລາ ຮ່ວມ“ ນົກ­ກົກ​ຄຳ ເກມ 2017”

ທ່ານ ທອງ​ຜີວ ສີ​ປັນ­ຍາ ຮອງ​ຫົວ­ໜ້າ​ພະແນກ​ສຶກ​ສາ​ທິ​ການ ແລະ ກີ­ລາ​ແຂວງ​ຊຽງຂວາງ ແຈ້ງ​ໃຫ້​ຮູ້​ໃນ​ວັນ​ທີ 6 ມັງ­ກອນ 2017 ຜ່ານ​ມາວ່າ: ທາງ​ພະ​ແນກ​ສຶກ​ສາ​ທິ​ການ ແລະ ກີ­ລາ​ແຂວງ ກໍ່​ໄດ້​ສົມ­ທົບ​ກັບ​ບັນ­ດາ​ສະຫະ​ພັນ​ກີ­ລາ​ປະ­ເພດ​ຕ່າງໆ ເພື່ອ​ຂົນ­ຂວາຍ ແລະ ຄັດ​ເລືອກ​ເອົາ​ນັກ­ກີ­ລາ​ເປົ້າ​ໝາຍ​ທີ່​ມີຄວາມ​ສາ­ມາດ ແລະ ພອນ​ສະ­ຫວັນ​ດີ­ເດັ່ນ ເພື່ອ​ກຽມ​ເປັນ​ຕົວ​ແທນ​ແຂວງ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ນັກ­ຮຽນ​ມັດ­ທະ­ຍົມ​ສຶກ​ສາທົ່ວ​ປະ­ເທດ ຄັ້ງ​ທີ 6 ທີ່​ແຂວງ​ບໍ​ລິ​ຄຳ​ໄຊ ເປັນ​ເຈົ້າ­ພາບ ໃນ​ລະ­ຫວ່າງ​ວັນ​ທີ 1-9 ກຸມ­ພາ 2017.

ມາ​ຮອດ​ປັດ­ຈຸ­ບັນ ສາ­ມາດ​ຄັດ​ເລືອກ​ນັກ­ກີ­ລາ​ເປົ້າ​ໝາຍ​ໄດ້​ແລ້ວ ຈຳ­ນວນ 141 ຄົນ ໃນ 10 ປະ­ເພດ​ທີ່​ຈະ​ສົ່ງ​ເຂົ້າ​ຮ່ວມ​ຊີງ​ໄຊ ປະ­ກອບ​ມີ ເຕະ­ບານ​ຍິງ-ຊາຍ ບານ­ສົ່ງ​ຍິງ-ຊາຍ ເທ​ຄວັນ​ໂດ​ຍິງ-ຊາຍ ເປ​ຕັງ​ຍິງ-ຊາຍ ແລ່ນ-ລານ​ຍິງ-ຊາຍ ໜ້າ​ເກັກ​ຍິງ-ຊາຍ ໝາກ​ຂ່າງ​ຍິງ-ຊາຍ ປິ່ງ​ປ່ອງ​ຊາຍ ແລະ ດອກ​ປີກ​ໄກ່​ຊາຍ ເຊິ່ງ​ພວກ​ເຮົາ​ໄດ້​ເລີ່ມ​ເຂົ້າ​ເກັບ​ຕົວ​ເຝິກ­ຊ້ອມຢ່າງ​ເປັນ​ທາງ​ການ​ນັບ​ແຕ່​ວັນ​ທີ 8 ມັງ­ກອນ ເປັນ­ຕົ້ນ​ມາ ແລະ ຮອດ​ວັນ​ທີ 25 ມັງ­ກອນ 2017 ກໍ່​ຈະ​ອອກ​ເດີນ­ທາງ​ໄປ​ສູ່ແຂວງ​ບໍ​ລິ​ຄຳ​ໄຊ ຕາມ​ແຜນ­ການ.

ສຳ­ລັບ​ການ​ເຂົ້າ​ຮ່ວມ​ງານ “ນົກ­ກົກ​ຄຳ ເກມ 2017” ທີ່​ແຂວງ​ບໍ​ລິ​ຄຳ​ໄຊ ພວກ​ເຮົາ​ຕັ້ງ​ເປົ້າ​ຈະ​ພະ­ຍາ­ຍາມ​ສູ້​ຊົນ​ຍາດ​ໃຫ້ໄດ້​ຢ່າງ​ໜ້ອຍ 8 ຫຼຽນ​ຄຳ ຈາກ 4 ປະ­ເພດ​ກີ­ລາ​ປາຍ​ແຫຼມ ປະ­ກອບ​ມີ: ແລ່ນ-ລານ ໜ້າ​ເກັກ ໝາກ​ຂ່າງ ແລະ ເທ​ຄວັນໂດ ຢ່າງ­ໃດ​ກໍ່​ຕາມ ໃນ​ການ​ເຂົ້າ​ຮ່ວມຄັ້ງ​ທີ 5 ທີ່​ແຂວງ​ຈຳ­ປາ​ສັກ ເປັນ​ເຈົ້າ­ພາບ ໃນ​ປີ 2014 ນັກ­ກີ­ລາ​ແຂວງ​ຊຽງ​ຂວາງ ດິນ­ແດນ​ວິ­ລະ​ຊົນ​ພວກ​ເຮົາ ​ສາ­ມາດຍາດ​ມາ​ໄດ້​ທັງ​ໝົດ 8 ຫຼຽນ​ຄຳ 8 ຫຼຽນ​ເງິນ ແລະ 3 ຫຼຽນ​ທອງ ລວມ 21 ຢູ່​ອັນ​ດັບ 4 ຂອງ​ຕາ­ຕະ­ລາງ.

ຂ່າວທີ່ກ່ຽວຂ້ອງ