ຮູ້ພາສາລາວ ມື້ລະຄຳ : ນ້ຳ​ນິ້ງ​ໄຫຼ​ເລິກ

186 30 ມ.ກ. 2017 ຫົວຂໍ້ຂ່າວອື່ນໆ

ຄຳ​ສຳ­ນວນ ແປ​ວ່າ ນິ­ໄສ, ພຶດ­ຕິ​ກຳ​ພາຍ​ນອກ ຫຼື ຮູບ​ນອກ​ຕ່າງ​ກັບ​ຈິດ­ໃຈ​ພາຍ​ໃນ, ລຶກ​ລັບ, ບໍ່​ມີ​ພິ­ລຸດ. ທີ່​ມີ​ມາ​ແຕ່​ເດີມທີ່​ເກີດ​ຈາກ​ການ​ສັງ­ເກດ​ທຳ​ມະ​ຊາດ​ຂອງ​ຄົນ​ບູ­ຮານ​ລາວ ທີ່​ນຳ​ມາ​ປຽບ­ທຽບ​ໃສ່​ອາ­ການ, ການ​ປະ­ພຶດ​ຂອງ​ຄົນ​ໃນ​ສັງ­ຄົມ. ດ້ານ​ຄວາມ​ໝາຍ​ກົງ​ແມ່ນ ​ນ້ຳ​ຫ້ວຍ, ຮ່ອງ ຫຼື ແມ່­ນ້ຳ​ທົ່ວ​ໄປ ​ທີ່​ເຫັນ​ກັບ​ຕາ​ຄື​ຢູ່​ໜ້າ ­ນ້ຳ​ບໍ່​ໄຫຼ ແຕ່​ໃນ​ຕົວ​ຈິງ​ ນ້ຳ​ແມ່ນ​ໄຫຼຕະ­ຫຼອດ​ຢູ່​ພື້ນ​ນ້ຳ. ດ້ານ​ຄວາມ​ໝາຍ​ທາງ​ອ້ອມ ໝາຍ​ເຖິງ​ອາ­ການ ຫຼື ການ​ປະ­ພຶດ​ຂອງ​ຄົນ ຫຼື ບຸກ­ຄົນ​ທີ່​ບໍ່​ປາກ​ບໍ່​ຕີງ ແຕ່​ພັດ​ມີ​ພຶດ­ຕິ​ກຳ​ເລິກ​ທີ່​ເບິ່ງ​ກັບ​ຕາ​ບໍ່​ເຫັນ​ຫຍັງ ເຊັ່ນ: ບໍ່​ປາກ​ບໍ່​ຕີງ ແຕ່​ລັກ​ໄປ​ເຮັດ​ສິ່ງ​ທີ່​ຄົນ​ອ້ອມ​ຂ້າງ​ບໍ່​ຮູ້​ນຳ ຈົນ​ຫຼາຍ​ຄົນ​ຄຶດ​ວ່າ​ແມ່ນ​ຄົນ​ດີ.

ຕົວ­ຢ່າງ:

- ເບິ່ງ​ຄື​ຄົນ​ກຸໆມຸໆ ຄື: ນ້ຳ​ນິ້ງ​ໄຫຼ​ເລິກ ຍ້ອນ​ວ່າ​ມີ​ພຶດ­ຕິ​ກຳ​ບໍ່​ໜ້າ​ເຊື່ອ​ໃຈ

- ລາວ​ບໍ່​ມັກ​ເວົ້າ​ຫຼາຍ ເຮັດ​ຄື​ນ້ຳ​ນິ້ງ​ໄຫຼ​ເລິກ​ເດີ

ຄຳ​ສຳ­ນວນ​ລາວ​ມີ​ສ່ວນ​ຫຼາຍ​ເປັນ​ຄຳ​ສຸ­ພາ­ສິດ​ສອນ​ໃຈ ເຊັ່ນ: ກິນ​ພໍ​ຮາກ ຢາກ​ພໍ​ຕາຍ... ແລະ ຄຳ​ໂຕງ­ໂຕຍ​ທີ່​ມັກ​ເວົ້າ​ມ່ວນ​ໃຫ້​ເຂົ້າ​ກັບ​ບໍ​ລິ​ບົດ ຫຼື ເລື່ອງ​ທີ່​ກຳ­ລັງ​ເວົ້າ ເຊັ່ນ: ມັນ​ຍ້ອນ​ໝູ, ຕາຍ​ຍ້ອນ​ປາກ... ຄຳ​ສຳ­ນວນ​ຊຸມ​ນີ້​ມີ​ຄວາມ​ໝາຍ​ຕາມ​ຕົວ​ອັກ­ສອນ​ ຈຶ່ງ​ມີ​ຄວາມ​ໝາຍ​ເລິກ­ເຊິ່ງ.

ຂ່າວທີ່ກ່ຽວຂ້ອງ