...ຖຽງ​ນາຍ ພາຍ​ຖົງ​ໜີ ບໍ່​ຖືກ​ສະ­ເໝີ​ໄປ... - ໂດຍ : ດັ້ນ​ກີບ​ເມກ

315 30 ມ.ກ. 2017 ນານາສາລະ

ຈິດ​ສຳ­ນຶກ​ທົ່ວ​ໄປ​ຂອງ​ຄົນ​ລາວ ເວົ້າ​ເຖິງ​ການ­ສະ­ແດງ​ຄຳ​ເຫັນ​ແບບ​ຖົກ​ຖຽງ ສ່ວນ​ໃຫຍ່​ຈະ​ເຂົ້າໃຈ​ວ່າ ​ເປັນ​ສິ່ງ​ບໍ່​ດີ ໂດຍສະ­ເພາະເລື່ອງ​ລູກ​ນ້ອງ​ກັບ​ຜູ້​ເປັນ​ຫົວ­ໜ້າ ຫຼື ຜູ້​ບັງ­ຄັບ​ບັນ­ຊາ ເຊິ່ງ​ຄວາມ​ຈິງ​ແລ້ວ​ສັງ­ຄົມ​ທຸກ​ມື້­ນີ້​ແມ່ນ​ເປີດ​ກວ້າງ​ຫຼາຍສຳ­ລັບ​ແຕ່­ລະ­ຄົນ​ ໃຫ້​ສະ­ແດງ​ຄວາມ​ຄິດ​ເຫັນ ເຊັ່ນ: ໃນ​ແວດ​ວົງ​ຂອງ​ການ​ສິດ­ສອນ ບໍ່​ແມ່ນ​ຄູ​ເວົ້າ​ຜູ້​ດຽວ​ອີກ​ແລ້ວ ເພາະເອົາ​ນັກ­ຮຽນ​ເປັນ­ໃຈ​ກາງ ຄູ​ຈຶ່ງ​ຕ້ອງ​ຮັບ​ຟັງ​ຄວາມ​ເຫັນ​ທີ່​ແຕກ​ຕ່າງ ເຊິ່ງ​ຖ້າ​ຄູ​ຍັງ​ຂຶ້ນ​ເວົ້າ​ຜູ້​ດຽວ ແລະ ບໍ່​ຍອມ​ຟັງ​ນັກ­ຮຽນ ເຂົາ​ອາດ​ເອີ້ນ​ຄູ​ຄົນ​ນັ້ນ​ວ່າ ​ເປັນ​ຄົນ​ອັດ​ຕະ​ວິ­ໄສ (ໃນ​ຕົວ) ເຖົ້າ​ແກ່​ບູ­ຮານ​ຍັງ​ກ່າວ​ວ່າ: “ຫຼາຍ​ຄົນ​ດີ​ຫຼາຍ​ຜີ​ເປືອງ​ໄກ່...”.

ວະ­ລີ​ທີ່​ວ່າ ຖຽງ​ນາຍ​ພາຍ​ຖົງ​ໜີນີ້​ ຫາກ​ມາ​ປຽບ­ທຽບ​ໃສ່​ການ­ເຄື່ອນ­ໄຫວ​ໃນ​ຊີ­ວິດ​ສັງ­ຄົມ​ແລ້ວ​ກໍ່​ບໍ່​ຖືກ​ທັງ​ໝົດ ແຕ່​ບາງ​ຄົນກະ​ບໍ່​ຢາກ​ເວົ້າ​ເຖິງ​ ເພາະ​ຮູ້­ສຶກ​ຫົດ​ຂຶ້ນ​ມາ​ທັນ­ທີ ອາດ​ເນື່ອງ​ມາ​ຈາກ​ການ​ອົບ­ຮົມ​ກ່ອມ​ເກົາ​ແຕ່​ຍັງ​ນ້ອຍ​ ຈົນ​ເບິ່ງ​ຄື​ວ່າ​ ວະ­ລີ​ນີ້​ເວົ້າ​ໄດ້​ແຕ່​ຫ້າມ​ເຮັດ ພວກ​ເຮົາ​ລອງ​ຄິດ​ພາບ​ຂອງ​ການ​ເຮັດ​ວຽກ ຫຼື ການ​ບໍ­ລິ­ການ​ໃນ​ຍຸກ​ປັດ­ຈຸ­ບັນ​ເບິ່ງ​ວ່າ ຫົວ­ໜ້າ​ໜ່ວຍ​ງານ ຫຼື ຜູ້​ບໍ­ລິ­ຫານ ແລະ ຜູ້​ບັງ­ຄັບ​ບັນ­ຊາ​ເຂົາ​ຈະ​ມັກ​ໃຫ້​ລູກ​ນ້ອງ​ເຮັດ​ຕາມ​ຢ່າງ​ດຽວ ໂດຍ​ບໍ່​ອອກ​ຄຳ​ເຫັນ​ຢ່າງ­ໃດ​ເລີຍ ຫຼື ບໍ່? ຜູ້​ບໍ­ລິ­ຫານ​ແບບ​ນີ້​ອາດ​ມີ​ໜ້ອຍ ແຕ່​ສ່ວນ​ໃຫຍ່​ແລ້ວ ຫົວ­ໜ້າ​ທຸກ​ມື້­ນີ້​ເຂົາ​ມັກ​ຟັງ​ຄຳ​ເຫັນ​ລູກ​ນ້ອງ ເພື່ອ​ຈະ​ໄດ້​ແງ່​ຄິດດີໆ​ໃນ​ການ​ປັບ­ປຸງ​ວຽກ​ງານ​ໃຫ້​ດີ​ຂຶ້ນ ຫຼື ເວົ້າ​ອີກ​ຢ່າງ​ໜຶ່ງ​ກໍ່​ແມ່ນ​ ການ​ສະ­ທ້ອນ​ຄວາມ​ຈິງ​ທີ່​ເປັນ­ຄວາມ​ຄິດ​ອອກ​ມາ​ຈາກຈິດ­ໃຈ​ຂອງ​ລູກ​ນ້ອງ ຕົວ­ຢ່າງ: ສຳ­ນັກ­ງານ-ອົງ­ການ​ກໍ່​ມີ​ເບີ​ໂທ​ສາຍ​ດ່ວນ​ໃຫ້​ປະ­ຊາ­ຊົນ​ໄດ້​ສະ­ແດງ​ຄວາມ​ຄິດ ລັດ­ຖະ­ບານ​ກໍ່​ມີ 1516 ເພື່ອ​ໃຫ້​ປະ­ຊາ­ຊົນ​ສະ­ແດງ​ຄວາມ​ຄິດ​ເຫັນ ເພາະ​ຖື​ວ່າ​ສຽງ​ສະ­ທ້ອນ​ເຖິງ​ແມ່ນ​ມັນ​ຈະ​ແຕກ​ຕ່າງ​ທາງ​ດ້ານຄວາມ​ຄິດ ແຕ່​ມັນ​ກໍ່​ອາດ​ເຮັດ​ໃຫ້​ຜູ້​ກ່ຽວ­ຂ້ອງ​ໄດ້​ຄົ້ນ​ຄິດ​ພິ­ຈາ­ລະ­ນາ ຖ້າ­ວ່າ​ແງ່​ຄິດ​ຕ່າງໆ​ມັນ​ດີ ມີ​ທ່າ​ກ້າວ­ໜ້າ ກໍ່​ສາ­ມາດນຳ­ໄປ​ປະ­ຕິ­ບັດ ໂດຍ​ບໍ່​ຢຶດ​ເອົາ​ຄວາມ​ຄິດ​ຂອງ​ຕົນ​ເອງ​ເປັນ​ໃຫຍ່​ຝ່າຍ​ດຽວ ເຊິ່ງ​ທາງ​ພຸດ​ທະ​ສາ­ສະ­ໜາ​ເອີ້ນ​ວ່າ ອັດ­ຕາ​ທິປະ​ໄຕ.

ຄຳ​ວ່າ “ຖຽງ​ນາຍ​ພາຍ​ຖົງ​ໜີ” ຈຶ່ງ​ບໍ່​ໜ້າ​ຈະ​ແມ່ນ​ສິ່ງ​ທີ່​ໜ້າ​ຢ້ານ​ກົວ​ໃດໆ​ສຳ­ລັບ​ຜູ້​ຕ້ອງ­ການ​ຄວາມ​ກ້າວ­ໜ້າ ເພາະ​ຖ້າ​ຕີຄວາມ​ການ​ອະ­ທິ­ບາຍ ຫຼື ສະ­ແດງ​ຄວາມ​ຄິດ​ເຫັນ​ທີ່​ແຕກ​ຕ່າງ​ວ່າ ​ເປັນ​ການ​ຖົກ​ຖຽງ ຄົງ​ເປັນ​ສິ່ງ​ກີດ​ກັນ​ບໍ່​ໃຫ້​ຄົນ​ອື່ນ​ຄິດຕ່າງ​ກັບ​ຕົນ​ເອງ ເຊິ່ງ​ບໍ່​ຕ່າງ​ກັບ​ຜູ້​ບໍ­ລິ­ຫານ​ທີ່​ເປັນ​ອັດ­ຕາ​ທິ​ປະ​ໄຕ ຄວາມ​ຈິງ​ຫຼາຍ​ທ່ານ​ກໍ່​ໄດ້​ຍິນ​ຄຳ​ນີ້​ມາ​ຕັ້ງ­ແຕ່​ຈື່​ຄວາມ​ໄດ້ພຸ້ນ​ລະ ແລະ ກໍ່​ອາດ​ເຫັນ​ຕົວ­ຢ່າງ​ມາ​ຫຼາຍ​ພໍ​ສົມ­ຄວນ ແຕ່​ບໍ່​ຄວນ​ລືມ​ວ່າ​ ລະ­ຫວ່າງ​ຂອງ​ໃໝ່ ແລະ ເກົ່າ ຖ້າ​ເຮົາ​ບໍ່​ຄົ້ນ​ຄິດ​ປັບ­ປຸງ​ນຳ​ມາ​ໃຊ້​ ຄົງ​ບໍ່­ເກີດ​ປະ­ໂຫຍດ​ໃຫ້​ແກ່​ຕົນ​ເອງ​ ແລະ ສັງ­ຄົມ.

ຢ່າງ­ໃດ​ກໍ່​ຕາມ ຖ້າ​ຕີ​ຄວາມ​ຄຳ​ວ່າ: ການ​ບໍ­ລິ­ຫານ​ຄື​ການ​ໃຊ້​ຄົນ​ໃຫ້​ເຮັດ​ວຽກ​ສຳ­ເລັດ​ຕາມ​ແຜນ­ທີ່​ວາງ​ໄວ້​ຮ່ວມ​ກັນ ໂດຍສະ­ເພາະ​ໃນ​ສະ­ພາບ​ເງື່ອນ­ໄຂ​ການ​ບໍ­ລິ­ຫານ​ທີ່​ມີ​ກົດ­ໝາຍ​ເປັນ​ເຄື່ອງ­ມື ຫຼື ເວົ້າ​ວ່າ​ເປັນ​ລັດ​ແຫ່ງ​ກົດ­ໝາຍ ທຸກ​ຄົນ​ຍ່ອມສະ­ເໝີ­ພາບ​ໃນ​ການ­ສະ­ແດງ​ຄວາມ​ຄິດ ໝາຍ​ຄວາມ​ວ່າ ຈະ​ມາ​ປິດ​ກັ້ນ​ຄົນ​ບໍ່​ໃຫ້​ຄິດ​ຄົງ​ບໍ່​ໄດ້​ດັ່ງ​ໃຈ​ແນ່­ນອນ ການ​ຕີຄວາມ​ວະ­ລີ​ຂ້າງ​ເທິງ​ນັ້ນ​ເປັນ​ພຽງ​ແງ່​ຄິດ​ເພື່ອ​ແລກ­ປ່ຽນ​ຄຳ​ເຫັນ​ເນີ!.

ຂ່າວທີ່ກ່ຽວຂ້ອງ