ຮູ້ພາສາລາວ ມື້ລະຄຳ : ພຶດ­ຕິ​ກຳ

150 31 ມ.ກ. 2017 ຫົວຂໍ້ຂ່າວອື່ນໆ

ຄຳ​ນາມ ມີ​ເຄົ້າ​ມາ​ຈາກພາ­ສາສັນ­ສະ­ກິດ ເປັນ​ຄຳ​ປະ­ສົມລະ­ຫວ່າງ ພຶດ­ຕິ ແປ​ວ່າ ຄວາມປະ­ພຶດ, ກິດ­ຈະ­ການ, ຄວາມເປັນ​ໄປ ແລະ ກຳ ແປ​ວ່າ ສິ່ງ​ທີ່​ເຮັດ, ທີ່​ທຳ​ໄວ້ ເມື່ອ​ລວມ​ກັນແລ້ວ​ກໍ​ຈະ​ໄດ້ ພຶດ­ຕິ​ກຳ ແປ​ວ່າ ການ​ກະ­ທຳ, ການ​ເຮັດ ຫຼື ອາການ... ນອກ­ຈາກ​ນີ້, ຍັງ​ພົບ​ເຫັນ ພຶດ­ຕິ­ການ, ພຶດ­ຕິ­ໄນ, ພຶດ­ຕິບາດ...  (ວັດ­ຈະ­ນາ­ນຸ­ກົມ ​ທອງ­ຄຳ ອ່ອນ​ມະ­ນີ​ສອນ, 2008:614). ທາງ​ດ້ານ​ກົດ­ໝາຍ ພຶດ­ຕິ​ກຳ ນິ​ຍາມ​ຫຍໍ້​ວ່າ ການ​ກະ­ທຳ ລວມ​ມີ ການ​ຄົ້ນ​ຄິດ, ວາງ​ແຜນ, ລົງ­ມື, ພະ­ຍາ­ຍາມ​ກໍ່​ກະ­ທຳ... ຫຼື ການເມີນ­ເສີຍ​ຕໍ່​ເຫດ­ການ​ທີ່​ເກີດ​ຂຶ້ນ​ທີ່​ເປັນ​ອັນ­ຕະ­ລາຍ​ຕໍ່​ສັງ­ຄົມ​ໂດຍລວມ. ພຶດ­ຕິ​ກຳ ຈຶ່ງ​ເປັນ​ຄຳ​ສັບທີ່​ພົບ​ເຫັນ​ໃຊ້​ໃນ​ພາ­ສາ​ທາງ​ການ ຫຼາຍ​ກວ່າ​ພາ­ສາ​ປາກ​ເວົ້າ​ໃນ​ຊີ­ວິດ​ປະ­ຈຳ​ວັນ.             

ຕົວ­ຢ່າງ:

- ພຶດ­ຕິ​ກຳ​ບໍ່​ດີ​ສ້າງ​ຄວາມ​ເສຍ​ຫາຍ ແລະ ເປັນ​ອັນ­ຕະ­ລາຍ​ຕໍ່​ສັງ­ຄົມ

- ພຶດ­ຕິ​ກຳ​ຫຼອກ​ລວງ, ພຶດ­ຕິ​ກຳ​ຊື້​ຈ້າງ​ຈອບ​ອອຍ, ພຶດ­ຕິ​ກຳ​ທຸ​ຈະ­ລິດ​ຕໍ່­ໜ້າ​ທີ່

- ພຶດ­ຕິ​ກຳ​ທີ່​ບໍ່​ໜ້າ​ໄວ້­ໃຈ, ພຶດ­ຕິ​ກຳ​ທີ່​ໜ້າ​ຍ້ອງ­ຍໍ​ສັນ­ລະ­ເສີນ

ຂ່າວທີ່ກ່ຽວຂ້ອງ