ເບິ່ງບ້ານເຂົາ ເອົາບົດຮຽນ - ໂດຍ: ວິເສດ ສະແຫວງສຶກສາ : ກູ​ບາ ​ອິນ​ເດຍ ມາ​ເລ​ເຊຍ

181 31 ມ.ກ. 2017 ຫົວຂໍ້ຂ່າວອື່ນໆ

ພົບ​ກັນ​ປະ­ຈຳ​ວັນ​ນີ້ ໄປ​ຮູ້­ຈັກ​ກັບ​ປະ­ໂຫຍກ​ຄຳສັ່ງ​ສຸດ​ທ້າຍ​ຂອງ​ທ່ານ ພີ​ເດນ ກັດ​ສະ​ໂຕຣ ອະ­ດີດ​ຜູ້ນຳ​ສູງ​ສຸດ​ຂອງ​ພັກ-ລັດ​ກູ​ບາ ທີ່​ລ່ວງ​ລັບ​ໄປ​ແລ້ວ ຕໍ່​ໃສ່​ເລື່ອງ​ທາງ​ການ​ອິນ​ເດຍ ຫ້າມ​ນັກ​ການ­ເມືອງນຳ​ໃຊ້​ບັນ­ຫາ​ສາ­ສະ­ໜາ ແລະ ວັນ­ນະ ເພື່ອຜົນ​ປະໂຫຍດ​ໃນ​ການ​ເລືອກ​ຕັ້ງ ແລະ ສຸດ​ທ້າຍແມ່ນ​ບັນຫາ​ທີ່​ເກີດ​ຈາກ​ການ​ເຊື່ອ​ງົມ​ງາຍຢູ່​ມາ​ເລ​ເຊຍ.

ທີ່ ກູ​ບາ: ຂ່າວ​ທີ່​ໂດ່ງ​ດັງ​ໄປ​ທົ່ວ​ໂລກ​ໃນ​ທ້າຍ​ປີ 2016 ກໍ່​ຄືການ​ເຖິງ​ແກ່​ກຳ ໃນ​ວັນ​ທີ 25 ພະ­ຈິກ ຂອງ​ປະ­ທານ ພີ​ເດນ ກັດ​ສະ​ໂຕຣ ອະ­ດີດ​ຜູ້­ນຳ​ພັກ-ລັດ​ສູງ​ສຸດ​ຂອງ​ກູ​ບາ ນັກ​ປະ­ຕິ­ວັດ​ທີ່​ກ້າ­ແກ່ນ​ຂອງຊົນ​ຊັ້ນ​ກຳ­ມະ­ກອນ ທັງ​ແມ່ນ​ບຸກ­ຄົນ​ທີ່​ຖືກຈົດ​ໃຫ້ເປັນ​ບຸກ­ຄົນ​ແຫ່ງ​ສະ­ຕະ­ວັດ​ທີ 20.

ກ່ອນ​ຊິ້ນ​ລົມ​ຫາຍ­ໃຈ ທ່ານ ພີ​ເດນ ໄດ້​ສັ່ງ​ໄວ້​ກັບ ທ່ານ ຣາ​ອູນ ກັດ​ສະ​ໂຕຣ ນ້ອງ​ຊາຍ​ທີ່​ເປັນ​ຜູ້­ນຳ​ພັກ-ລັດ​ສູງ​ສຸດ​ຂອງ​ກູບາ ​ໃນ​ປັດ­ຈຸ­ບັນ​ວ່າ ຫ້າມ​ສ້າງ​ອະນຸ​ສອນ​ສະ­ຖານ ອາ​ນຸ​ສາ​ວະ­ລີ ຮູບ​ປັ້ນ ເພື່ອ​ອຸ­ທິດເປັນ​ກຽດ​ແກ່​ທ່ານ ຫ້າມ​ເອົາ​ຊື່​ຂອງທ່ານ​ໄປ​ເປັນ​ຊື່ຖະ­ໜົນ​ຫົນ­ທາງ ຫຼື ສຳ­ນັກ­ງານ​ສະ­ຖານ­ທີ່​ຕ່າງໆ ຫ້າມ​ໃຊ້​ຮູບ ແລະ ຊື່​ຂອງ​ທ່ານ ເພື່ອ​ຜົນ​ປະ­ໂຫຍດທາງການ​ຄ້າ ຫຼື ເພື່ອ​ເປັນ​ສື່​ໂຄ­ສະ­ນາ.

ສິ່ງ​ທີ່​ທ່ານ ພີ​ເດນ ອະ­ນຸ­ຍາດ​ໃຫ້​ເຮັດ​ໄດ້ກໍ່​ຄື ໃຊ້ຊື່ ແລະ ຮູບ​ຂອງ​ທ່ານ ເພື່ອ​ເປົ້າ​ໝາຍ​ສ້າງ­ສັນ​ງານສິ­ລະ​ປະ ໃຊ້​ໃນ​ງານໂຮມ​ຊຸມ­ນຸມ​ທາງ​ການ­ເມືອງ ແລະ ເປັນ​ບ່ອນ​ອ້າງ​ອີງ​ໃນ​ການ​ສຶກ​ສາ​ຄົ້ນ­ຄວ້າບົດ­ບາດ​ຂອງ​ທ່ານ​ໃນ​ຂະ​ບວນ​ວິ­ວັດ​ທາງປະ­ຫວັດສາດ​ກູ​ບາ​ເທົ່າ​ນັ້ນ ໃນ​ຍາມ​ມີ​ຊີ­ວິດ​ຢູ່ ທ່ານ ພີ​ເດນ ຍາມ​ໃດ​ກໍ່​ຄັດ­ຄ້ານ​ຂໍ້​ສະ­ເໜີເພື່ອ​ໃສ່​ຊື່​ສະ­ຖານ­ທີ່ຕ່າງໆ​ຕາມຊື່​ຂອງ​ທ່ານ ກໍ່​ຄືການ​ສ້າງ​ເຄື່ອງ­ໝາຍ ຫຼື ສັນ­ຍະ­ລັກ​ຕ່າງໆເພື່ອ​ເທີດ​ທູນ​ກຽດ ແລະ ຄຸນງາມ​ຄວາມ​ດີ​ຂອງ​ທ່ານ.

ກ່ຽວ​ກັບ​ບັນ­ຫາ​ທີ່​ວ່າ​ເປັນ​ຫຍັງ​ທ່ານ ພີ​ເດນ ຈິ່ງຫ້າມ ​ເລື່ອງ​ນີ້​ນັ້ນ​ບໍ່​ມີ​ໃຜ​ສາ­ມາດ​ໃຫ້​ເຫດ­ຜົນ​ໄດ້ ເພາະ​ທ່ານ​ເອງ​ເປັນ​ຜູ້​ໜຶ່ງ​ທີ່​ລິ​ເລີ່ມ​ສ້າງ​ອາ​ນຸ​ສາ​ວະ­ລີເພື່ອ​ເຊີດ​ຊູ​ກຽດ ແລະ ຄຸນ­ງາມ­ຄວາມ­ດີ​ຂອງ​ບັນດາ​ນັກ​ປະ­ຕິ­ວັດ​ທີ່​ຍິ່ງ​ໃຫຍ່​ໃນ​ອະ­ດີດ ເຊັ່ນ: ທ່ານ ໂຮ​ເຊ ມາກ​ຕີ ເຈ​ເກ​ວາ​ຣາ ແລະ ຜູ້​ອື່ນໆ.

ຂ່າວ​ໃຫ້​ຮູ້​ຕື່ມ​ວ່າ: ລັດ​ຖະ​ສະ­ພາ​ກູ​ບາ ໄດ້​ເປັນເອ­ກະ­ສັນ​ຮັບ­ຮອງ​ເອົາ ແລະ ເຫັນ​ດີ​ເອົາ​ຄຳ​ສັ່ງ​ສຸດທ້າຍ​ຂອງ​ທ່ານ ພີ​ເດນ ເປັນ​ກົດ­ໝາຍ.

ທີ່ ອິນ​ເດຍ: ແຫຼ່ງ​ຂ່າວ AFP ໄດ້​ໃຫ້​ຊາບ​ໃນ​ຕົ້ນເດືອນ​ມັງ­ກອນ​ນີ້​ວ່າ ສານ​ສູງ​ສຸດ​ອິນ​ເດຍ ໄດ້​ສັ່ງຫ້າມ​ບັນ­ດາ​ນັກ​ການ­ເມືອງ​ນຳ​ໃຊ້​ສາ­ສະ­ໜາ ແລະ ວັນ­ນະ (ຢູ່​ອິນ​ເດຍ ມີ 4 ວັນ­ນະ ຄື: ວັນ­ນະ​ພາມ ວັນ­ນະ​ກະ­ສັດ ວັນ­ນະ​ແພດ ແລະ ວັນ­ນະສູດ) ເພື່ອໃຫ້​ຊະ­ນະ​ການ​ເລືອກ​ຕັ້ງ ທີ່​ຕ້ອງ​ມີ​ການ​ເກືອດ​ຫ້າມກໍ່​ເພາະ­ວ່າ ການ​ນຳ​ໃຊ້​ສາ­ສະ­ໜາ ແລະ ວັນ­ນະ ນຳ​ໃຊ້​ເພື່ອຫາ​ສຽງ​ເລືອກ​ຕັ້ງ ໃນ​ຄຳ​ສັ່ງ​ຫ້າມສານ​ສູງ​ສຸດ​ອິນ​ເດຍ ໄດ້​ບອກ​ວ່າ ການ​ເລືອກ​ຕັ້ງຮັກ­ສາ​ລັກ­ສະ­ນະ​ທາງ​ໂລກ (ບໍ່​ກ່ຽວ​ກັບສາ­ສະ­ໜາ) ຂອງ​ການ​ເລືອກ​ຕັ້ງ ຖ້າ​ຜູ້​ລົງ​ສະ­ໝັກ​ຄົນ​ໃດ​ນຳ​ໃຊ້ບັນ­ຫາ​ສາ­ສະ­ໜາ ຫຼື ວັນ­ນະ ໃນ​ການ​ລົງ​ໂຄ­ສະ­ນາຫາ​ສຽງ ຈະ​ຖືກ​ຕັດ​ສິດ​ໃນ​ການ​ສະ­ໝັກ​ຮັບ​ເລືອກຕັ້ງ.

ທີ່ ມາ​ເລ​ເຊຍ: ຂ່າວ​ແປກໆ ແຕ່​ເປັນ​ເລື່ອງ​ຈິງ​ທີ່ເກີດ​ຂຶ້ນ​ຢູ່​ມາ​ເລ​ເຊຍ ໃນ​ທ້າຍ​ເດືອນ​ທັນ­ວາ​ປີ​ຜ່ານມາ ກໍ່​ຄືການ​ຮ້ອງ​ຟ້ອງໝໍ​ຜີ​ທີ່​ໃຊ້​ເລ່­ຫຼ່ຽມ​ຫຼອກ​ຕົ້ມເອົາ​ເງິນ​ຄົນ​ອື່ນ ເລື່ອງ​ນີ້​ຖືກ​ເປີດ­ເຜີຍ​ໂດຍ​ທ່ານ ຊາມູ​ເອນ ມັດ​ຈອນ ບຣອດ​ດີ (Samuel Mut John Brody) ຫົວ­ໜ້າ​ຫ້ອງ­ການ​ສານ​ໂຈ​ຮໍ ວ່າ​ ມີ​ຊາຍມາ​ເລ​ເຊຍ​ຄົນ​ໜຶ່ງ​ຮ້ອງ​ຟ້ອງ​ທວງ​ຄືນ​ຄ່າ​ຊົດ​ເຊີຍຈາກ​ໝໍ​ຜີ​ທີ່​ບອກວ່າ ຈະ​ປິ່ນ­ປົວ​ພໍ່​ຂອງ​ຕົນ​ທີ່​ປ່ວຍແບບ​ຊຳ​ເຮື້ອ​ໃຫ້​ດີ​ດ້ວຍ ​ການ​ສະ­ເດາະ​ເຄາະ​ເຂັນອອກ​ຈາກ​ຮ່າງ­ກາຍ​ໃຫ້​ໝົດ.

ຊາຍ​ມາ​ເລ​ເຊຍ​ຄົນ​ດັ່ງ­ກ່າວ​ຫຼົງ​ເຊື່ອ ​ເຖິງ​ຂັ້ນ​ໄດ້ວາງ­ເງິນ​ຄ່າ​ຄາຍ​ຈຳ­ນວນ 810 ຣິງ​ກິດ (ປະ­ມານ 16 ລ້ານ​ກີບ) ເພື່ອ​ໃຫ້ໝໍ​ຜີ​ສະ­ເດາະ 9 ວິນ​ຍານຮ້າຍ​ອອກ​ຈາກ​ຄີງ​ຜູ້​ເປັນ​ພໍ່ ແຕ່​ສຸດ​ທ້າຍ​ກໍ່​ເປິ! ຜູ້ເປັນ​ພໍ່​ແຮງ​ຍິ່ງ​ຊຸດ­ໂຊມ​ລົງ​ກວ່າ​ເກົ່າ ໃນ​ທີ່​ສຸດ​ກໍ່ເສຍ​ຊີ­ວິດ ດັ່ງ­ນັ້ນ ຜູ້​ເຄາະ​ຮ້າຍ​ຈຶ່ງ​ໄດ້​ເຂົ້າ​ໄປ​ເພິ່ງສານ ເພື່ອ​ທວງ​ເອົາ​ເງິນ​ຄ່າ​ຄາຍ​ຄືນ ທາງ​ຝ່າຍສານ​ກໍ່​ບໍ່​ຮູ້​ຈະ​ຊ່ວຍ​ແນວ­ໃດ ເພາະ​ການ​ເຮັດ​ພິ­ທີກຳ​ທາງ​ໄຊ​ຍະ​ສາດ​ນັ້ນ​ມັນ​ເປັນ​ເລື່ອງ​ຄວາມ​ເຊື່ອ ແລະ ທາງ​ເລືອກ​ຂອງ​ສ່ວນ​ບຸກ­ຄົນ ແລະ ໝໍ​ຜີທັງຫຼາຍ​ກໍ່​ບໍ່​ໄດ້​ຈົດ​ທະ­ບຽນ​ທຸ­ລະ​ກິດ​ຂອງ​ພວກ​ຕົນ​ກັບທາງ​ການ​ເລີຍ.

ຂ່າວທີ່ກ່ຽວຂ້ອງ