ສົ່ງເສີມການຮ່ວມມືທາງດ້ານທຸລະກິດ

148 14 ກ.ພ. 2017 ຂ່າວໜ້າ​ໜຶ່ງ
ສົ່ງເສີມການຮ່ວມມືທາງດ້ານທຸລະກິດ

ທ່ານ ສົມ​ດີ ດວງ​ດີ ຮອງ​ນາຍົກ​ລັດຖະມົນຕີ ລັດຖະມົນຕີ​ກະຊວງ​ການ​ເງິນ ໄດ້​ໃຫ້​ກຽດ​ຕ້ອນຮັບ​ການ​ເຂົ້າ​ຢ້ຽມ​ຄຳນັບ​ຂອງຄະນະ​ຜູ້​ແທນ​ທຸລະ​ກິດ ສ ເກົາຫຼີ ນຳ​ໂດຍ​ທ່ານ Yoon Jong Kyoo ປະທານກຸ່ມ​ບໍລິສັດ KB Financial ໃນ​ວັນ​ທີ 13 ກຸມພາ 2017 ຢູ່​ທີ່​ສຳນັກງານ​ນາຍົກ​ລັດຖະ​ມົນຕີ ເຊິ່ງ​ການ​ເຂົ້າ​ຢ້ຽມ​ຄຳນັບ​ຄັ້ງ​ນີ້ ເພື່ອ​ສະແດງ​ຄວາມຂອບໃຈ​ຕໍ່​ລັດຖະບານ​ລາວ ​ທີ່​ໄດ້ອຳນວຍ​ຄວາມ​ສະດວກ​ໃຫ້​ແກ່ກຸ່ມ​ບໍລິສັດ ກໍ່​ຄືບັນດາ​ນັກ​ທຸລະກິດ​ຂອງ ສ ເກົາຫຼີ ທີ່​ມາ​ດຳເນີນທຸລະ​ກິດ​ຢູ່​ລາວ ພ້ອມ​ທັງ​ປຶກສາຫາລືເຖິງ​ການ​ຮ່ວມ​ມື​ທາງ​ດ້ານທຸລະ​ກິດ ໂດຍ​ສະເພາະແມ່ນ ການ​ດຳເນີນ​ທຸລະ​ກິດ​ດ້ານ​ການເງິນ ການ​ຄ້າຂາຍ​ລົດ​ທີ່​ນຳ​ເຂົ້າຈາກ ສ ເກົາຫຼີ ທີ່​ມີ​ຈຳນວນ​ນັບມື້​ສູງ​ຂຶ້ນ​ຢ່າງ​ຕໍ່​ເນື່ອງ.

ທ່ານ​ຮອງ​ນາຍົກລັດຖະມົນຕີ ໄດ້​ສະແດງ​ຄວາມ​ຍ້ອງຍໍ​ຕໍ່​ການເດີນທາງ​ມາ​ຢ້ຽມຢາມ ແລະ ເຮັດ​ວຽກ​ຂອງ​ຄະນະ​ຜູ້​ແທນ​ກຸ່ມບໍລິສັດ ເຄ​ພີ ເຊິ່ງ​ຖື​ເປັນ​ການ​ປະກອບ​ສ່ວນຮັດ​ແໜ້ນ​ສາຍ​ພົວພັນຮ່ວມ​ມື​ລະຫວ່າງ​ສອງ​ປະເທດ ໃຫ້​ນັບ​ມື້​ໜັກ​ແໜ້ນ ແລະ ເຂັ້ມແຂງ​ຍິ່ງ​ຂຶ້ນ ນອກ​ນີ້ຍັງ​ເປັນ​ການສົ່ງເສີມ​ໃຫ້​ວຽກ​ງານ​ການ​ລົງທຶນ​ສອງ​ຝ່າຍ ​ນັບ​ມື້​ສູງ​ຂຶ້ນ​ຕາມລຳດັບ ໂດຍ​ປັດຈຸບັນ ເຫັນ​ວ່າການ​ລົງທຶນ​ຂອງ​ນັກທຸລະກິດ ສ ເກົາຫຼີ ໄດ້​ມີ​ການ​ເຕີບ​ໃຫຍ່ ແລະ ກວ້າງຂວາງ​ຢູ່​ໃນ​ພາກ​ພື້ນອາຊີ​ປາ​ຊີ​ຟິກ ລວມ​ທັງ ​ສປປ ລາວ ອັນ​ໄດ້​ເຮັດ​ໃຫ້​ເສດຖະກິດຂອງ​ປະເທດ​ມີ​ການ​ຂະຫຍາຍຕົວຢ່າງ​ຕໍ່​ເນື່ອງ ແລະ ໄດ້​ປະກອບສ່ວນ​ສຳຄັນ​ໃນ​ການ​ສ້າງ​ວຽກເຮັດ​ງານ​ທຳ​ໃຫ້​ແຮງ​ງານ​ລາວ ນັບ​ມື້​ສູງ​ຂຶ້ນ​ເປັນ​ກ້າວໆ ໂອກາດນີ້ ທ່ານ​ປະທານ​ກຸ່ມ​ບໍລິສັດ ເຄ​ບີ ໄດ້​ສະແດງ​ຄວາມ​ຂອບໃຈ​ຕໍ່​ການ​ຕ້ອນຮັບ​ອັນ​ອົບ​ອຸ່ນ ພ້ອມ​ທັງລາຍ​ງານ​ຜົນສຳເລັດ​ການ​ເດີນທາງ​ມາ​ຢ້ຽມຢາມ ແລະ ເຮັດວຽກ​ຢູ່ ​ສປປ ລາວ ເຊິ່ງ​ທ່ານ Yoon Jong Kyoo ຢືນຢັນ ຈະສືບຕໍ່​ດຳເນີນ​ທຸລະ​ກິດຢູ່ ​ສປປ ລາວ ພາຍ​ໃຕ້​ລະບຽບ​ກົດໝາຍຢ່າງ​ເຂັ້ມ​ງວດ ເພື່ອ​ປະກອບສ່ວນເຂົ້າ​ໃນ​ການ​ສ້າງ​ເສດຖະກິດ-ສັງຄົມ​ຂອງ​ລາວ ​ໃຫ້​ມີ​ການ​ຂະຫຍາຍ​ຕົວ​ຮອບດ້ານ ​ຕາມ​ແນວທາງ​ນະໂຍບາຍ​ຂອງ​ພັກ-ລັດ​ຖະບານ​ວາງ​ໄວ້ ​ປາກົດ​ຜົນ​ເປັນ​ຈິງ.

ຂ່າວທີ່ກ່ຽວຂ້ອງ